پارێزگارێ دهۆكێ: دڤێت تابلۆیێن جهێن گشتی ب زمان و رێنڤیسا كوردی یا دروست بهێنە نڤیسین
گرنگیدان ب زمان و رێنڤیسا كوردی، د. عەلی تەتەر، پارێزگارێ دهۆكێ و ب ئامادەبوونا دەڤەردارێ دهۆكێ، دوهی 28/7/2025 كۆمبوونەك ل گەل چەند رێڤەبەرێن گشتی و رێڤەبەرێن فەرمانگەهان و بەرپرسێن سەندیكایێن پەیوەندیدار ئەنجام دا.
د كۆمبوونێ دا بەحسێ رەوشا بازاری و تابلۆیێن فەرمانگەهان و جهێن گشتی و گرنگیدان ب زمان و رێنڤیسا كوردی ل سەر هەموو تابلۆیان ب گشتی هاتە كرن.
پارێزگارێ دهۆكێ دوپاتی ل سەر گرنگیا دانانا ناڤێن كوردی ل سەر تابلۆیان كر و گۆت: «دڤێت هەموو تابلۆیێن فەرمانگەهان و جهێن گشتی و بازرگانی و گەشتوگوزاری و كۆمپانی و ماركێت و دوكان و بازارێن هەڤچەرخ ب زمان و رێنڤیسینا كوردی یا دروست بن و ل گەل زمانێن دی یێن عەرەبی و ئنگلیزی بهێنە نڤیسین و بەرچاڤكرن و پشتەڤانیا كارگێریا پارێزگەهێ بۆ بجهئینانا ڤی بەرنامەی ل هەموو جهێن پارێزگەهێ نیشا دا».
هەژی گۆتنێ یە، كو پار بەرپرسێ ناڤەندا خانی ل گەل نڤیسكار موئەیەد تەیب، ئەندامێ ئەكادمیا كوردستانێ و سەنڤیسەرێ رۆژنامەیا ئەڤرۆ هەمان پڕۆژە پێشكێشی پارێزگەهێ كربوو، كو خۆشبەختانە ئەڤرۆ دێ بجه هێت و بتە بڕیار.
دیسا هەر دوهی 28/7/2025 ب ئامادەبوونا د. عەلی تەتەر، پارێزگارێ دهۆكێ و موسا ئەحمەد، سەرۆكێ دەزگەهێ خێرخوازی یێ بارزانی و د. ناسح مەلا محەمەد، ڕێڤەبەرێ گشتی یێ ئەوقافا پارێزگەهێ و قایمقامێ دهۆكێ و هەژمارەكا مامۆستایێن ئاینی، دەزگەهێ خێرخوازی یێ بارزانی ب هەماهەنگیا ئیدارا پارێزگەهێ و ئەوقافا پارێزگەهێ پڕۆژەیێ دابینكرنا موكێتی بۆ 62 مزگەفتێن سنۆرێ پارێزگەها دهۆكێ و ئیدارا سەربخۆ یا زاخۆ ل مزگەفتا زانین ڕاگەهاند.
پارێزگارێ دهۆكێ د پەیڤەكێ دا بناڤێ وەلاتیێن پارێزگەها دهۆكێ سوپاسیا سەرۆكێ دەزگەهێ خێرخوازی یێ بارزانی و تیمێن دەزگەه كر كو بەردەوام پڕۆژەیێن جوراوجور د كەرتێن جودا دا ل هەرێما كوردستانێ بێ جوداهی پێشكێش دكەت و هەتا ل سەر ئاستێ جیهانێ ژی دەزگەهێ ناڤبری ڕولێ خۆ دگێڕیت، ب تایبەت د بیاڤێ مرۆڤایەتی دا.
