مەكتەبا رێكخستنێ و پارێزگارێ دهۆكێ و پشكا ڕەوشەنبیری و راگەهاندنا پارتی 22 سالیا رۆژنامەیا ئەڤرۆ پیرۆز دكەن
ب هەلكەفتا 22 سالیا رۆژنامەیا ئەڤرۆ، هەر ئێك ژ مەكتەبا رێكخستنا پارێزگەها دهۆكێ یا پارتی دیموكراتی كوردستان و دكتۆ عەلی تەتەر، پارێزگارێ دهۆكێ و پشكا رەوشەنبیری و راگەهاندنا پارتی و هەژمارەكا نڤیسەر و مەدیاكار و رەوشەنبیران پەیامێن پیرۆزباهیێ ئاراستەی سەرنڤیسەر و ستافێ كاری و نڤیسەر و خواندەڤانان كرن.
د پەیاما مەكتەبا رێكخستنا پارێزگەها دهۆكێ یا پارتی دا هاتیە: «ب هەلكەفتا دەربازبوونا 22 سالان ل سەر دەركەفتنا ئێكەم هەژمارەیا رۆژنامەیا ئەڤرۆ، پیرۆزباهیێن گەرم ل سەرنڤیسكار و هەمی ستافێ كاری و خواندەڤانێن وێ دكەین و دبێژین رۆژنامەیا ئەڤرۆ هەر ل دەستپێكا دەركەفتنا خۆ هەتا نوكە گەلەك ب وێرەكانە و بابەتیانە و د چارچوڤێ یاسایا كارێ رۆژنامەگەریێ دا كارێ خۆ ئەنجام دایە و شیایە ببیتە پرەكا باوەریێ د ناڤبەرا خەلكی و حكومەتێ دا، ئەڤێ رۆژنامێ شیایە ب سەدان كادران پێ بگەهینیت و د هەمان دام دا بوویە زمانحالێ دەڤەرا بەهدینان بۆ گەهاندنا پەیاما راست و دروست، ئەم گەلەك ژ نێزیك د خوینین و دبینین و هەلسەنگاندنێ بۆ دكەین، دوبارە دەستخوشیێ لێ دكەین و داخوازا سەركەفتنێ بۆ دخوازین».
دیسا هەر ب هەلكەفتا 22 سالیا رۆژنامەیا ئەڤرۆ، دكتۆ عەلی تەتەر، پارێزگارێ دهۆكێ پەیامەكا پیرۆزباهیێ بەلاڤكریە و تێدا هاتیە: «22 سالیا رۆژنامەیا ئەڤرۆ، وەكو تاكە رۆژنامەیا رۆژانە ل پارێزگەها دهۆكێ پیرۆزبیت، هیڤیدارین رۆژناما ئەڤرۆ بەردەوام د پێشڤەچوون و نوویاتیان و خزمەتكرنا پەیاما خواندەڤانان دابیت».
دیسا پشكا ڕەوشەنبیری و راگەهاندنا پارتی دیموكراتی كوردستان ژی ب هەلكەفتا 22 سالیا رۆژنامەیا ئەڤرۆ، پەیامەكا پیرۆزباهیێ ئاراستەی سەرنڤیسەر و كادر و كارمەندێن ڕۆژنامەیا ئەڤرۆ كریە و تێدا هاتیە: «ب هەلكەفتا 22 سالیا دەركەفتا ڕۆژنامەیا (ئەڤرۆ) پیرۆزباهیەكا گەرم ل هەوە و نڤیسەران و خواندەڤاڤێن هێژا یێن ڕۆژنامەیا هەوە دكەین، جهێ دەستی ڕۆژنامەیا هەوە د كاروانێ ڕۆژنامەگەریا كوردی دا یێ دیارە، لەو هوون جهێ پەسن و دەستخۆشیێ نە».
دیسا د پەیاما پشكا ڕەوشەنبیری و راگەهاندنا پارتی دا هاتیە: «ڕۆژنامەیا (ئەڤرۆ) تایبەتمەندیا خۆ هەیە، هەردەم دەنگێ وەلاتیێن دەڤەرێ گەهاندییە و خزمەتەكا زۆر ب بیاڤێ ڕۆژنامەگەریێ و ڕەوشەنبیری كریە، دووبارە د ڤێ هەلكەفتێ دا پشتەڤانیا خۆ بۆ پێشڤەچوونا ڕۆژنامەیا (ئەڤرۆ) دووپات دكەین، هیڤیخوازین هەردەم د پێشكەفتنێ دابن».
