ده‌ست ب پرۆژێ پاقژكرنا ئاڤا قوتابخانێن دهۆكێ هاته كرن
ئه‌ڤرۆ نيوز:
پروژێ سیسته‌مێ پاقژكرنا ئاڤێ ل قوتابخانان ب كوژمێ 2 ملیار و 680 ملیون دیناران ده‌ست پێ هاتیه‌كرن و یێ به‌رده‌وامه
چه‌ندین ساله ماموستا و قوتابی گله‌و گازنده ل سه‌ر ئاڤا تانكێت قوتابخانا دكه‌ن ژ به‌ر نه‌پاقژیا ئاڤێ و مه‌ترسیاوێ ل سه‌ر ساخله‌ميێ و ژیانا وان و داخاز دكه‌ن تانك و بوری و حه‌نه‌فیێن پاقژ بۆ وان بهێنه دانان دا كو ئاڤ ل قوتابخانێ یا پاقژ بیت و بكارئینانا وێ نه‌بیته ئه‌گه‌رێ مه‌ترسیا نه‌خوشیان ل سه‌ر ژیانا وان، د هه‌مبه‌ردا رێڤه‌به‌رێ ئاڤاهیێت قوتابخانا رادگه‌هینیت كو ب خوشبه‌ختانه ده‌ست ب پروژێ پاقژكرنا ئاڤا قوتابخانان هاتیه كرن و نها كار ب باشترین شێوه یێ به‌رده‌وامه.
رێڤه‌به‌رێ ئاڤاهیێن قوتابخانا ئه‌ندازیار فه‌رسه‌ت ئه‌حمه‌د سه‌عید ل رێڤه‌به‌ریا گشتی خویاكر : “د پلانا سالا 2012 ێ دا پێشنیاره‌ك ئاراسته‌ی جڤاتا وه‌زیران كر كو هه‌وه‌كا به‌رفرهـ یا پاقژكرنا ئاڤێ د قوتابخانان ڤه بهێته‌كرن و ب خوشحالی ڤه جڤاتا وه‌زیران ئه‌ڤ پێشنیاره په‌سه‌ندكر “.
زێده‌تر گۆت: “هه‌ر ل وی ده‌می كار بۆ هاته‌كرن كا دێ چاوا شێن ڤی پروژه‌ی بجهئینن و ل ده‌ستپێكێ ڤه‌دیتنه‌ك هاته‌كرن كا ڤی پروژه‌ی پێدڤی ب چ كه‌ره‌سته هه‌یه ئه‌و كه‌ره‌سته هاتنه دابه‌شكرن ل سه‌ر چار ڤه‌دیتنان ئه‌و ژی تانكێت ستیلی ب دو جورا 500 لیتر و 1000 لیتر و د گه‌ل بوری و كه‌ره‌ستێن پێكڤه‌گرێدانا بوریا و هه‌روه‌سا ماتورێن كاره‌بێ و فلته‌رێن پاقژكرنا ئاڤێ و ئاڤ ته‌زینك بوون و هه‌ر ئێك ژ وان سه‌رێككێمكرن بۆ هاته‌كرن و هه‌رئێك ژ بۆ كومپانیه‌كێ هاتنه ره‌وانه‌كرن”.
ئه‌ندازیار فه‌رست دا زانين ژى كو وان كۆمپانیان ئه‌ڤ كه‌ره‌سته دابینكرن و گۆت: “مه هزر ل وێ چه‌ندێ كر كا ئه‌و كه‌ره‌سته ل كیرێ بهێنه عه‌مباركرن ژ به‌ر كو هه‌تا ئه‌ڤ كه‌ره‌سته هاتینه دابینكرن وه‌لات تووشی قه‌یرانه‌كا ئابووری بوو و پارێ وێ چه‌ندێ نه‌بوو كو ئه‌ڤ پرۆژه ب ته‌مامی بهێته بجهكرن، له‌ورا ژی نه‌چار بووین وان كه‌ره‌ستا ل هنده‌ك جهان عه‌مبار بكه‌ین هه‌تا كو جاره‌كا دی ب ته‌مامی ده‌ست ب پروژه‌ی بهێته‌كرن”.
رێڤه‌به‌رێ ئاڤاهێن قوتابخانا ئاشكه‌را كر كو پشتی وان داخواز ژ وه‌زیری و وه‌زاره‌تێ كری پروژه ب ته‌مامی بهێته بجهئینان و ئه‌و كه‌ره‌ستێن هاتینه عه‌مبار كرن ل قوتابخانا بهێنه گرێدان دا كو ئاڤا پاقژ ل هه‌موو قوتابخانا بهێته دابینكرن وه‌زیری رازه‌مه‌ندیا خوه دیاركر كو ئه‌ڤ پرۆژه بهێته ته‌مامكرن.
ئه‌ندازیاری گۆتژی: “ب پشته‌ڤانیا وه‌زاره‌تا سامانێن سروشتی وه‌ك پرۆژه هاته راگه‌هاندن د سه‌رئێككێمكرنه‌كێ دا ل وه‌زاره‌تێ پروژه بۆ كومپانیا (روا) كه‌ڤت، به‌لێ ژ به‌ر هه‌بونا چه‌ند ئاریشه‌یان دناڤ ڤه‌دیتنێ دا بۆ ده‌مه‌كی جێبه‌جێكرنا پروژه‌ی هاته گیرۆكرن و نها ب خوش حالی ڤه ئه‌ڤ پروژه هاته ده‌سپێكرن ل ده‌ستپێكێ ل هه‌ولێرێ ده‌ستپێكر و ژ هه‌یڤا دو یا ئه‌ڤ ساله پارێزگه‌ها دهوكێ ده‌ست ب ڤی پروژه‌ی كریه و كه‌ره‌ستێن عه‌مباركری یێن دهێنه دابه‌شكرن ل سه‌ر قوتابخانان یێن پێدڤى پێ هه‌يی ئه‌وێن ناڤێن وان ل وه‌زاره‌تێ هاتینه دیاركرن”.
رێڤه‌به‌رێ ئاڤاهیێن قوتابخانا راگه‌هاند ژى: نها كار ب باشترین شێوه برێڤه‌دچیت ل دووڤ رێنمایێن وه‌زاره‌تێ و لیژنه‌ك هاتیه پێك ئینان ل رێڤه‌به‌ریا ئاڤاهیێن قوتابخانان ل په‌روه‌ردا گشتی كو پێكهاتیه ژ سێ ئه‌ندازیاران و ژمێریاره‌كی و فه‌رمانبه‌ره‌كی ل رێڤه‌به‌ریا پێدڤیێت قوتابخانا و ب به‌رده‌وامیا كاری ل سه‌ر پروژه‌ی زوربه‌یا كه‌ره‌ستان هاتینه به‌لاڤكرن ل سه‌ر قوتابخانان.
ل دور رێژا كه‌ره‌سته‌يی ئه‌ندازیار فه‌رسه‌ت رێڤه‌به‌رێ ئاڤاهیێن قوتابخانا گۆت: “رێژا تانكێن ستیلی 575 تانكێتن 500 لیتری و 920 تانكێن هزار لیترى هاتبوونه دابینكرن ژ لایێ كومپانیا ژوری ب كوژمێ 2 ملیار و 680 ملیون دیناران و 920 ئاڤ ته‌زینك هاتبوونه دابین كرن ژ لایێ كومپانیا ئایه ب كوژمێ 634 ملیون 80 هزار دیناران، فلته‌رێن 100 لتری 287 بوون و 200 لتری 288 هاتبوونه دابینكرن ژ لایێ كومپانیا ورلد پامپ ب كوژمێ 336 ملیون و 950 هزار دیناران و ئه‌ڤ رێژه وه‌ك سیسته‌م ل سه‌ر 538 قوتابخانان دێ هێته به‌ستن و هنده‌ك ژ وان قوتابخانان كار تێدا ب دوماهى هاتیه و كار یێ به‌رده‌وامه و به‌ستنا سیسته‌مێ پاقژكرنا ئاڤێ ل قوتابخانان ژ لایێ كومپانیا روایه و به‌ستنا سیسته‌می ب كوژمێ 486 ملیون و 881 هزارو 250 دینار هاتیه مه‌زاختن.
ئه‌ندازیاری ل دووماهێ گۆت: “ئه‌ڤ چه‌نده ژ بوو خزمه‌تكرن و پاقژكرنا ئاڤێ یه ل قوتابخانان و پاراستنا گیانێ ماموستا و قوتابیێن خوشتڤی یه ل قوتابخانێ”.
