كەمال محەمەد: پەترۆل بهێتە هنارتن كێشەیا مووچەی دێ چارەسەر بیت
وەزیرێ سامانێن سروشتی ب وەكالەت ل حوكمەتا هەرێما كوردستانێ ئاماژە ب وێ چەندێ كر، پترییا كێشەیێن گرێدای ب دۆسێیا پەرتۆلێڤە هاتینە چارەسەركرن و كۆمپانییان داخوازكریە ل شوونا پارەی پشكەك ژ پەرتۆلێ وەك حەقدەست وەربگرن و هەروەسا كۆمپانییان داخوازا مسۆگەركرنا شایستەیێن دارایی یێن خوە دكەن و ئەڤسالە ژی دێ پەترۆلا سپی ل سەر وەلاتییان بەلاڤ كەین.
كەمال محەمەد، وەزیرێ سامانێن سروشتی ب وەكالەت گوت» دۆسێیا پەترۆلێ دۆسێیەكا ئالۆزە، گەلەك خالێن ناكۆكیێ د ناڤبەرا هەرێما كوردستانێ و بەغدایێدا چارەسەر بووینە، دیاركرنا 16 دۆلاران بۆ بەرهەمئینانا پەترۆلێ وەك پێشینەیە نەك خەرجییا دوماهیێ».
گوت ژی» كێشەیا خەرجییا بەرهەمئینانا پەترۆلێ چارەسەر بوویە، رێككەفتن هاتیە كرن كۆمپانییەكا بریتانی خەرجییا بەرهەمئینانا پەترۆلێ دیاركریە، هەروەسا ئەو كۆمپانی داخوازكریە ل شوونا پارەی پشكەك ژ پەترۆلێ وەك حەقدەست وەربگرن، وان كۆمپانییان داخوازكریە ژی رێككەفتنەكا سێقۆلی بهێتە كرن بۆ وێ چەندێ شایستەیێن وان یێن دارایی بهێنە مسۆگەركرن».
وەزیرێ سامانێن سرۆشتی دیاركر ژی» دادگەها كەرخ دانپێدان ب قانوونییا گرێبەستێن پەترۆلی یێن هەرێما كوردستانێ كریە، پەترۆلا هەرێما كوردستانێ ب رێكا (سۆمۆ) دێ هێتە فرۆتن و سەرپەرشتیكرن، هەروەسا دوپاتی ل وێ چەندێ كریە ل ئەگەرێ هەبوونا هەر كێشەیەكێ پێدڤییە دۆسێ بچیتە دادگەهەكا نێڤدەولەتی، نابیت قانوونا ئیراقی د ڤێ پرسێدا بڕیارێ بدەت».
رۆهنكر ژی» پێشبینیێ دكەین، ل دەمەكێ گەلەك نێزیك بگەهینە رێككەفتنا دوماهیێ، تنێ ئێك خال مایە رێككەفتن ل سەر بهێتە كرن، ئەوژی بابەتێ دادگەهەكا نێڤدەولەتییە ل دەمێ هەبوونا هەر كێشەیەكێ، حوكمەتا ئیراقێ پێنگاڤێن باش هاڤێتینە بۆ رێككەفتنێ و هەر دەمێ پەترۆل بهێتە هنارتن كێشەیا مووچەی دێ هێتە چارەسەركرن، چونكە داهاتێ نە پەترۆلی بەراوردكرن ل گەل داهاتێ پەترۆلی كێمترە، پێدڤییە وەلاتی ژی بزانن پشكا هەرێما كوردستانێ 70% ژ داهاتێ پەترۆلیێ كوردستانێ دهێتە دابینكرن».
پتر گوت» د گەشبینین پرسا پەترۆلێ بهێتە چارەسەركرن، هەروەسا توركیا و ئیراقێ ل دۆر هنارتنا پەترۆلێ كێشە نینە، ل دۆر داهاتێ نە پەترۆلی وەك گومرگ و باج رێككەفتن هاتیە كرن، مووچە مافێ فەرمانبەرایە و نابیت ببیتە منەت، نێزیكی شەش مەهایە مە پەترۆل رادەستكری، پشتی هێرشێن درۆنی ل سەر زەڤیێن پەترۆلی ل هەرێما كوردستانێ، پشكەك ژ كۆمپانییان بەرهەمئینانا پەترۆلێ راگرت و پشكەكا دی كێمتر پەترۆل بەرهەمئینا».
كەمال محەمەد ئاماژە كر» هندەك ئالی دخوازن د ناڤبەرا هەردو حوكمەتاندا تێكبدەن و ئاستەنگان بۆ رێككەفتنا هەردو ئالییان دروست بكەن، هەروەسا ل زەڤییا پەترۆلا خورمەلە 60 هزار بەرمیلێن پەترۆلێ دهێنە بەرهەمئینان، بەلێ نوكە نێزیكی 230 هزار بەرمیلان د رۆژەكێ دا بەرهەم دئینین، هەكە بەغدا گەرەنتیێ بدەتە كۆمپانییان د دەمێ 24 ساتاندا دێ هنارتنا پەترۆلێ دەستپێكەت».
وەزیرێ سامانێن سروشتی ب وەكالەت دوپاتكر» ئەڤسالە ژی دێ پەترۆلا سپی ل سەر وەلاتییان بەلاڤكەین».
ل دۆر پڕۆژەیێ (رۆناهی) دیاركر» نوكە 55% ژ هەڤپشكێن كارەبێ مفادار بووینە ژ پڕۆژەیێ (رۆناهی)، جدییەتا مەسرور بارزانی، سەرۆكێ حوكمەتا هەرێمێ نەبا، ئەڤ پڕۆژە ب ڤی شێوەیە ب لەز نەدهاتە بجهئینان».
