ل سالا 2026ێ دێ مەزنترین هەژمارا پارچەیێن ئەردی هێنە بەلاڤكرن
دیدار و بەرهەڤكرن:
ئەمیر ئەترووشی و سندس سالح سلێڤانەیی
رێڤەبەرێ گشتییێ باژێرڤانیان ل پارێزگەها دهۆكێ دیار كر، پرۆسەیا بەرهەڤكرنا پارچەیێن ئەردی ل سنۆرێ هەموو باژێرڤانیان ب رەنگەكێ گەلەك باش ب رێڤەدچیت و پرۆسە د قۆناغێن دووماهیێ دایە و ئەڤە دێ بیتە گەڕا چارێ، پشتی ڤێ گەڕێ ئێكسەر دێ دەست ب بەرهەڤیان بۆ گەڕا پێنجێ كەین و گۆت: گۆتی هندەك رێكارێن یاسایی یێن هەین هەتا ئەو ژی ب دروستی ب دووماهی دهێن، لێ دبێژمە وان ب ئانەهیا خودێ سالا (2026) دێ بۆ وان هەموویان یا خۆش بیت و هەر ئێك دێ ب پارچەیا خۆ یا ئەردی شاد بیت، هەروەسا ئەم بۆ هەموو وەلاتیان ئاشكرا دكەین كو ل سالا 2026ێ دێ مەزنترین ژمارەیا پارچە ئەردان هێتە بەلاڤكرن و ب ئانەهیا خودێ سالا بهێتدێ بۆ وان هەموویان یا خۆش بیت و پتریا فەرمانبەران دێ ب پارچەیا خۆ یا ئەردی شاد بن.
ئەندازیار دیار بەحری رێڤەبەرێ گشتییێ باژێرڤانیان ل پارێزگەها دهۆكێ د دیدارەكێدا بۆ رۆژنامەیا ئەڤرۆ گۆت: ل هەموو باژێرڤانیێن سەر ب مە ڤە كارێ كۆژاندن و بەرهەڤكرنا پارچەیێن ئەردی یێ بەردەوامە و پرۆسە د قوناغێن دووماهیێ دایە و هژمارەكا زۆر یا پارچەیێن ئەردی بۆ بەلاڤكرنێ د حازرن، بۆ نموونە بەس ل سنۆرێ باژێرڤانیا سێمێلێ دناڤبەرا (1500) هەتا (1600) سەنەدان گەهشتینە دەستێن مە و ل نێزیك دێ هژمارەكا دی ژی گەهن، پاشان دێ رۆژەك هێتە دەستنیشانكرن و ب رێكا پشككێشانێ ئەو پارچەیێن ئەردی دێ ل سەر پێشمەرگەی و فەرمانبەران هێنە بەلاڤكرن.
رێڤەبەرێ گشتییێ باژێرڤانیان ل پارێزگەها دهۆكێ ئەو یەك ژی دیار كر، ل هەولێرێ ل دەستپێكێ كارت هاتنە دابەشكرن و ئەڤە ژی بوو ئەگەر كو ئەو بشێن هژمارەكا زۆر یا پارچە ئەردان دابەشبكەن، پشتی دابەشكرنێ ئاریشا تاپۆكرنا ئەردی بۆ وان چێبوو، لێ مە هەموو رێكارێن خوە ب یاسایی برێڤەبرینە و هەر فەرمانبەرەكێ پارچە ئەردێ خوە ل دهۆكێ وەرگرت ئێكسەر دێ تاپۆكەت و چو ئاریشە ل سەر نینن، ئەڤە ژی ئەو جیاوازیە یا دناڤبەرا مە و هەولێرێ دا و كارێ مە هەموو رێكارێن یاسایی وەرگرتینە و پرۆسەیەكا گەلەك باش و ب كوالێتی برێڤەدچیت.
دیار كر ژی، بەری سالا 2012 پتری 20 هزار فەرمانبەران رازەمەندیێن وەرگرتنا پارچە ئەردی هەبووینە و ل وی سەردەم بریارا دابەشكرنا پارچە ئەردان هاتبوونە راگرتن، ل فەیدیێ و سێمێلێ و خانكێ و شاریا و كەلەكچی و رۆڤیا و كەلەكێ و ل پتریا باژێرڤانیان پرۆسەیا كوژاندنا ئەردی و رێكارێن دابەشكرنا پارچە ئەردان دەستپێكرینە، لێ ئەڤ پرۆسە یا دوور و درێژە و هندەك جاران پێدڤی ب گوهۆرینا ماستەر پلانێ هەیە و چێكرنا نەخشایە و ل فەیدیێ نها نێزیكی 6 هزار پارچەیێن ئەردی چووینە تاپۆیێ و مژوولی توماركرنێ نە.
زێدەتر گۆت: ل هەموو باژێرڤانیێن دی ژی كار یێ بەردەوامە و هەر باژێرڤانیەكا پێدڤی ببیت مە هندەك فەرمانبەر بۆ هنارتینە ژ بۆ هندێ پرۆسە بلەزتر ب دووماهی بهێت، هەر باژێرڤانیەكا كارێ وێ ب دووماهی هات و پارچەیێن ئەردی بەرهەڤكرن بێێ گیرۆبوون دێ هێنە بەلاڤكرن، بۆ زانین ئەڤە گەڕا چارێ یا بەلاڤكرنێ یە و بەری ڤێ مە سێ گەڕەیێن دی یێن پارچەیێن ئەردی ل (فەیدیێ و شاریا و خانكێ) بەلاڤكرینە، كو هژمارەكا زۆرا پێشمەرگەی و فەرمانبەران ژێ مفاداربووینە و ئەڤە مافێ وانە، چونكو ل دووڤ راسپاردەیێن سەرۆكێ حكومەتێ دڤێت ئەم هەموو خزمەتكارێن خەلكێ خۆ بین.
خویاژی كر كو ئەڤ گەرا چوارێ یا دێ هێتە دابەشكرن دێ ل سنوورێ باژێرڤانیا فەیدیێ و شاریا و خانكێ بیت و هەر باژێرڤانیەكا كارێ خوە ب دووماهی ئینا دێ دەست ب دابەشكرنێ هێتە كرن و گۆت ژی: ژ ئەڤرۆ و وێڤە دێ پرۆسەیا دابەشكرنا پارچە ئەردان گەلەك بلەزتر لێ هێت و دسالا نوو دا بەحسێ هزار پارچە و دوو هزاران ناهێتە كرن، بەلكو دێ ژمارا دابەشكرنێ گەلەك مەزنتر بیت، چونكو گەلەك ئەرد نێزیكە دێ كوژاندنا وان ب دووماهی هێت.
ئەندازیار دیار بەحری رێڤەبەرێ گشتی یێ باژێرڤانیان ل پارێزگەها دهۆكێ هێشتا گۆت: پشتی گەڕا چارێ ب دووماهی دهێت دێ بەرهەڤیان بۆ گەڕا پێنجێ كەین و وەكو مە گۆتی كار یێ بەردەوامە، ب تایبەت پشتی سەرۆكاتیا جڤاتا وەزیران دەستهەلاتێن زێدەتر داینە پارێزگەری نوكە كار بلەزتر و ب ساناهی تر یێ ب رێڤە دچیت، بۆ زانین هەتا پارچەیێن ئەردی دهێنە بەرهەڤكرن ل دووڤ یاسایێ دڤێت هندەك رێكار بهێنە وەرگرتن، ژ وانا كوژاندنا ئەردی و دانانا نەخشەیان و هندەك رێكارێن دی كو ئەڤا هەموویان دەم پێ دڤێت، لێ سوپاس بۆ خودێ كار گەلەك باش یێ ب رێڤە دچیت و وەكو مە گۆتی ل هەموو باژێرڤانیان، ژ وانا ل (ئاكرێ، سێمێلێ، ئامێدیێ، بەردەڕەش،كەلەكچی، شێلادزێ، دێرەلۆك) و هەموو جهێن دی پرۆسەیە یا د قۆناغێن دووماهیێ دا و ئەو پێشمەرگە و فەرمانبەرێن رازیبوون بۆ هاتی دێ پارچەیێن خوە وەرگرن، هەلبەت ئەڤ بەلاڤكرنە دێ ل دووڤ هندەك پیڤەران بیت، ژ وانا ئەوێن بەری چەند سالان رازیبوون بۆ هاتی، هەروەسا ل دووڤ هژمارا خالان دێ پێدا هێین هەتا هەموو وەردگرن.
ئەندازیار دیار بەحری رێڤەبەرێ گشتی یێ باژێرڤانیان ل پارێزگەها دهۆكێ گۆت: سالا نوو (2026) دێ بۆ وان هەموو فەرمانبەران یا خۆش بیت ئەوێن كو دێ پارچەیێن ئەردی وەرگرن، چونكو بەس ل فەیدیێ نێزیكی شەش هزار مامەلەیان ل تاپۆیێ نە و بەری نوكە مە (1365) سەنەد وەرگرتینە و ل نێزیك دێ هژمارەكا دی ژی گەهنە دەستێن مە پاشی دێ ژڤانێ بەلاڤكرنێ راگەهینین و ئەم پێشمەرگە و فەرمانبەرێن خۆ پشتراست دكەین هندی د شیانێن مە دا بیت دێ لەزێ د بەرهەڤكرنا پارچەیێن ئەردی دا كەین كو ب زووترین دەم ئەو ب مافێن خۆ شادببن، لێ وەكو مە گۆتی هندەك رێكارێن یاسایی یێن هەین هەتا ئەو ژی ب دروستی ب دووماهی دهێن، لێ دبێژمە وان ب ئانەهیا خودێ سالا (2026) دێ بۆ وان هەموویان یا خۆش بیت و هەر ئێك دێ ب پارچەیا خۆ یا ئەردی شاد بیت.
ئاماژە ب وێ یەكێ كر كو ل سێمێلێ ژی هژمارەكا زۆر یا پارچە ئەردان چووینە تاپۆیێ و كار ل سەر دهێتە كرن و ل نێزیك دێ ژڤانێ دابەشكرنێ هێتە دەستنیشانكرن و گۆت: ل نێزیك دێ گەرا پێنچێ ژی هێتە راگەهاندن و ئەڤ پرۆسە ل ئاكرێ و بەردەرەش ژی یا بەردەوامە، بەری نوكە هزار پارچە هاتبوونە سەر ناڤێ مە و هزار پارچێن دی دێ هێن و ل كەلەكچی پتری 800 پارچە ئەرد هاتینە سەر ناڤێ مە و نوكە كارێ قەربوویا وان دهێتە كرن و ل باژێرڤانیا شێلادزێ و دێرالوكێ و مەهەتێ ژی هێنە دابەشكرن.
