ئەز ب دەنگێ خوە خزمەتا کوردستانێ دکەم
سترانبێژ (سیپان هەرکی) کو شەش سالن سترانان دبێژیت د دیدارەکێ دا بۆ بەرپەرێ هونەری یێ ڕۆژناما ئەڤرۆ گۆت: ئەز د ناڤ ئاهەنگ و شەهیانان دا سترانان دبێژم و هەتا نوکە من سێ کلیپ و 10 بەرهەم هەنە کو ژ پەیڤ و ئاوازێن منن.
سیپانی د بەردەوامیا ئاخفتنا خوە دا گۆت ژی، ل سەرانسەری کوردستانێ من پشکداریا د ناڤ ئاهەنگێن بیک و زاڤایان دا کری، هندی مرۆڤ بشێت خزمەتا وەڵاتێ خوە بکەت هەر کێمە، پێشمەرگە ب چەکێ خوە و ئەز ژی ب دەنگێ خوە خزمەتا کوردستانێ دکەین.
ناڤهاتی ئەو چەندە ژی دا زانین کو ئەو سترانبێژەکێ مللی یە و وی کەنالێ خوە یێ تایبەت ب کارێ خوە یێ سترانگۆتنێ ڤە هەیە و گۆت: بۆ داهاتی ژی من پلان و بەرهەمێن گەلەک باش هەنە، لێ د نوکە دا نەشێم بەلاڤ بکەم، چونکۆ د ڤی دەمی دا زوڵم یا ل مە کوردان دهێتەکرن لەوما وەکو ڕێزگرتن من ئەڤ کارە راوەستاندینە، لێ ب حەزکرنا خودێ ئەگەر دەلیڤە چێبیت ب خوەشحالیڤە دێ خزمەتا مللەتی خوە کەین.
