فارس تەمەر: مە درێژترین کەڤالێ کەزییێ دروستکریە
شێوەکار فارس تەمەر، بەرپرسێ گرۆپێ مالا شێوەکاران ل ئیدارەیا سەربخوە یا زاخۆ د دیدارەکێ دا بۆ ڕۆژناما ئەڤرۆ دیارکر کو وەکو پشتەڤانی و هەڤسۆزی بۆ گەلێ مە یێ کوردستانا ڕۆژئاڤا ل ژێر درۆشمێ بژی بەرخوەدان درێژترین کەڤالێ نەتەوەیی هێمایێ کەزیێ ژ لایێ گڕۆپێ مالا شێوەکارێن زاخۆ ب درێژاهیا 20 مەتران هاتە دروستکرن و د ڕێوڕەسمەکێ تایبەت دا ل بازاڕێ کەڤن یێ زاخۆ هاتە نیشاندان.
ناڤهاتی ئاماژە ب وێ چەندێ ژی کر کو ئەڤ کەڤالێ هێمایێ کەزیێ ژ لایێ من و چەندین شێوەکارێن دی یێن مالا شێوەکارێن زاخۆ وەکو شێوەکارێن خودان شیان ئیدریس ڕەمەزان و دلێر کامیران و ڕەشا سالح ڤە هاتیە دروستکرن کو پێك دهێت ژ کەزیەکا درێژ و ئالایێ ڕەنگین یێ کوردستانێ.
گۆت ژی:»ئامادەبوویێن نیشاندانا ڤی کەڤالی ژی ب نڤیسینا تێکست و پارچە هەلبەست و دروشمێن نەتەوەیی یێن جیاواز بەشداری د خەملاندنا وی کەڤالی دا کرن، ب ڤێ چەندێ ئەڤ کەڤالە ب شێوەیەکێ جوانتر هاتە پێش چاڤ و بۆ جهێ سەرنج ڕاکێشانا ئامادەبوویان».
