ئهز دشێم ب سترانێن خهمگین و نهرم ههستێن خوە دهرببڕم
زنار تۆڤی:
خانما سترانبێژ، ساحل كرماشانی، خهلكا كرماشانێیه ل رۆژههلاتێ كوردستانێ دبێژیت: ئهز گهلهك حهز ژ زمانێ كوردی دكهم و دخوازم ب زمانێ دایكا خوە سترانان بێژم، ههكه دهرفهت ههبیت، دشێم ل پاشهرۆژێ هندهك سترانێن توركی و فارسی بكهمه كوردی و تۆمار بكهم و بهلاڤ بكهم، ههروهسا ههر ژ زارۆكینیێ، د ژییێ پێنج سالی دا، حهزهكا مهزن بۆ سترانگۆتنێ ل دهف من ههبوو، دهستپێكا رێكا من یا هونهری نه ب سترانگۆتنێ بوو، بهلكو پێنگاڤا من یا ئێكێ ب خواندنا قورئانێ بوو، پاشی چوومه د ناڤ سرودێن ئایینی دا و پاشی د ژییێ سنێلهیێ دا، ئهز شیام ههست و سۆزین خۆ ب رێكا گۆتنا سترانان دهرببرم، بهری سالا 2021 ێ، ل رۆژههلاتێ كوردستانێ ل ههلكهفتێن وهكو ژ دایكبوون و هندهك ئاههنگان دا ب زمانێ فارسی و ب شێوهزارێ كهلهۆری من ستران دگۆتن، بهلێ ل سالا 2021 ێ ئێكهم بهرههمێ خوە یێ فهرمی ب ناڤێ باران ب شێوهزارێ سۆرانی من بهلاڤكر.
ساحل كرماشانی گۆت ژی: ههتا نوكه من ههشت تراكێن سترانان و دو موزیك ڤیدیۆ ههنه، كو پتریا وان د ناڤ ئهلبۆما ئێكێ یا (باران) دانه، پشتی هاتیمه ههرێما كوردستانێ ل سالا 2019 ێ، بۆ دهمهكێ ژ كارێ هونهری دوور كهفتیمه، پاشی من پشكداریكر د خولێن خواندنا نۆتان، سۆلفیژ، دهنگسازی و مهقامان دا، ئهز شیام دوباره بزڤرمه دناڤ مهیدانا هونهری دا، پشتی هنگێ د فیستیڤالێن ههلبهست و ئهدهبیاتێ و ئاههنگێن نهورۆزێ و بهرنامێن تایبهت و لایڤ میوزیكان دا من پشكداری كریه، كو ههموو بووینه ئهگهرێ هندێ پتر بهێمه نیاسین.
ناڤهاتیێ گۆت ژی: «ئهز پتر د سترانێن خهمگین و نهرم دا دشێم ههستێن خۆ نیشان بدهم، بهلێ هێشتا ل سهر ههلبژارتنا ستایلهكێ تایبهت ب خۆڤه كاردكهم، چونكی تشتێ ههره گرنگ گههاندنا ههست و پهیامێیه بۆ گۆهداران، نهكو ب تنێ ناڤێ ستایلی، ههروهسا ئهز گهلهك حهز ژ زمانێ كوردی دكهم و دخوازم ب زمانێ دایكا خۆ بهردهوام بم و ل پاشهرۆژێ ئهگهر دهرفهت ههبیت، دێ هندهك سترانێن توركی و فارسی كهمه كوردی و بهلاڤكهم.
ساحل كرماشانی ئهو ژی ئاشكرا كر: نووترین پرۆژێ من یێ هونهری سترانهكه ب ناڤێ (كچا باژێرێ كرماشان)، كو پهیڤ و ئاوازێن وێ من بخوە داناینه و ل هیڤیا دهمهكێ گونجایمه داكو بهلاڤ بكهم، ههروهسا كار ل سهر نووژهنكرنا سترانهكا فۆلكلۆری دكهم ب ناڤێ (كرماشان كرماشان)، كو ب رهنگهكێ نوو ژ لایێ مامۆستا جهمال نهسیمی ڤه هاتیه ئامادهكرن، هیڤیدارم بشێم د نێزیكترین دهمدا ئهوان ههردو بهرههمێن نوو تۆمار بكهم و بهلاڤ بكهم.
