بێی رەزامەندیا هەولێرێ چو بڕیارێن ستراتیژی دەرباز نابن
دلۆڤان ئاكرەیی
پشتی كو نوونەرێن پارتی ژ بەغدا زڤڕین، پارتی پەیامەكا رۆهن دا كو ئامادە نینە ببیتە پشكەك ژ پرۆسەیەكا سیاسی كو مافێن دەستووری یێن هەرێمێ تێدا بهێنە پشتگوه ئێخستن و مەبەست ل هاتنا شاندێن ئیراقێ بۆ هەولێرێ بۆ مەرەما رازیكرنا پارتی یە بۆ زڤڕینێ بۆ ناڤ پەرلەمانی، چونكی هەمی لایەن د وێ راستیێ گەهشتینە كو بێی پارتی چو حكومەتەكا جێگیر ناهێتە پێكئینان و چو بڕیارەكا نیشتمانی بێی رەزامەندیا هێزا ئێكێ یا كوردستانێ ب سەر ناگریت.
ئێك ژ تەوەرێن سەرەكی یێن ناكۆكیان، شێوازێ سەرەدەرییا ئێكەتی نیشتمانی كوردستان بوو بۆ پۆستێ سەرۆك كۆماری و پارتی ڤێ چەندێ ب لادان ژ پرەنسیپێ «تەوافوقێ» دبینیت و پارتی پێداگریێ ل سەر وێ چەندێ دكەت كو پۆستێ سەرۆك كۆماری نوونەراتییا هەمی گەلێ كورد دكەت، نەك بتنێ لایەنەكێ سیاسی، و دڤێت ئەڤ پۆستە ب هەماهەنگی و رێككەفتنەكا نیشتمانی یا كوردی بهێتە ئێكلاكرن.
پارتی ب توندی دژی وێ چەندێ راوەستایە كو لایەنێن شیعە و سونە بڕیارێن چارەنڤیساز ل سەر ئاستێ ئیراقێ بدەن بێی كو ئیرادە و تایبەتمەندیا گەلێ كورد ل بەرچاڤ وەرگرن و پەیاما پارتی ئەوە كو كورد پشكدارێن سەرەكی یێن ئیراقێ نە، نەك پاشكۆ و چو بڕیارەكا ستراتیژی (وەكی یاسایا نەفت و غازێ یان بودجەی) بێی ڕەزامەندیا لایەنێ كوردی ناهێتە قەبوولكرن و ئەگەر ئەم نێرینەكێ ل ناڤا مالا شیعەیان بدەین دێ بینین كو سەرەرای ناكۆكیێن ناڤخۆیی یێن مالا شیعە، لێ د پرسا هەلبژارتنا سەرۆك وەزیران دا، هێزێن شیعە هەوڵ ددا رێگریێ ل هەر دەستوەردانەكا دەرڤەی چوارچێوەیا خۆ بكەن و دبەرامبەردا ب گازیكرنا نووینەرێن خۆ ل بەغدا پارتی ل ڤێرە پەیامەكا ب هێز دا كو پارتی رێ نادت چو سەرۆك وەزیرەك بهێتە دیاركرن كو باوەریا لایەنێن سەرەكی یێن كوردستانێ و سونەیان ل سەر نەبیت، و دڤێت بەرنامێ حكومەتێ گەرەنتیا مافێن هەولێرێ بكەت.
پارتی دیموكراتی ب سیاسەتا خۆ یا نوی، سەلماند كو دابەشبوونا لایەنێن ئیراقی نەكەتە ئەگەرێ لاوازبوونا پێگەهێ كوردان، بەلكو ب ئێكگرتییا ناڤخۆیی و پێداگری ل سەر مافێن دەستووری، بەغدا نەچار كر كو جارەكا دی ڤەگەرێتە سەر مێزا دانوستاندنێ ل گەل هەولێرێ و هەلویستێ پارتی د ڤێ قۆناغێ دا «پاراستنا كیانێ هەرێمێ و سەپاندنا ئیرادەیا كوردستانی یە ل بەغدا، و سەلماند كو چو هەڤپەیمانییەك تەمەنەكێ درێژ ناكێشیت ئەگەر بەرژەوەندیێن بلند یێن گەلێ كورد تێدا نەهێنە پاراستن و پارتی دیاركر كو شەڕێ ئەڤرۆ شەڕێ «پەیامێ» یە و پارتی پەیامەكا رۆهن و مۆدێرن دا جادەیا ئیراقی و جیهانی: كو كێشەیا پارتی نە بتنێ پۆست و پلەیە، بەلكو پاراستنا سیستەمێ فیدراڵی و مافێن قانونی یێن وەلاتیانە.
