مە دەرگەهێ دانوستاندنێ دانەئێخستییە، بەلێ مەرجێن چو ئالییان قەبوول ناكەین
ئەندامەكێ كۆمیتەیا ناڤین یا پارتی دیموكراتی كوردستان راگەهاند كو وان بزاڤەكا مەزن كریە بۆ كاراكرنا پەرلەمانی و پێكئینانا كابینەیا نوو یا حوكمەتا هەرێما كوردستانێ، بەلێ ئێكەتییا نیشتمانییا كوردستانێ بوویە «رێگر». دبێژیت ژی: پارتی دەرگەهێ دانوستاندنێ دانەخستییە.
د. محەمەد خورشید، ئەندامێ كۆمیتەیا ناڤین یا پارتی دیموكراتی كوردستان، گۆت»پشتی دەستپێكرنا كۆمبوونان ل گەل ئێكەتیێ، بەرنامەیێ كارێ حوكمەتێ ب دوماهی هات و ژڤانەك بۆ كاراكرنا پەرلەمانی هاتە دیاركرن، بەلێ مخابن ئێكەتی ئامادە نەبوو پەرلەمان بهێتە كاراكرن».
ئەو ئەندامێ كۆمیتەیا ناڤین یا پارتی دبێژیت، پارتی هەتا نوكە ژی ل سەر وێ چەندێ بەردەوامە كو «ئارامییەك بكەڤیتە د رەوشا سیاسی دا و بشێین پێكڤە پەرلەمانی كارا بكەینەڤە و كابینەیا دەهێ یا حوكمەتێ پێكبینین ل دویف قەبارە و دەنگێن ئالییان».
د. محەمەد خورشید هۆشداری دا كو» هەكە رەوش ب ڤی رەنگی بەردەوام بیت، دڤێت ئەم بەرەڤ رێكارێن دی بچین ئێك ژ وان رێكاران ژی، زڤڕینە بۆ بۆچوونا مللەتی كو مەبەست پێ هەلبژارتنا پێشوەختە».
دەربارەی دانوستاندنان، رۆهنكر» ئەم دگەل ئێكەتیێ ل سەر بنەمایێ 23 كورسییان دانوستاندنێ دكەین، نەكو 38 كورسییان». هەروەسا ئاماژە ب وێ چەندێ دا كو هەر ئالییەكێ دی بخوازیت پشكداریێ د حوكمەتێ دا بكەت، دڤێت ل گەل پارتی دیموكراتی كوردستان وەك ئالیێ ئێكێ یێ سەركەفتیێ هەلبژارتنان دانوستاندنێ بكەت.
د. محەمەد خورشید دیاركرژی «پەیوەندییێن مە و ئێكەتیێ د قۆناغەكا باش دا دەرباز نابن، بەلێ هێشتا نەگەهشتیە ئاستێ نائۆمێدیێ».
ئەو ئەندامێ كۆمیتەیا ناڤین یا پارتی دبێژیت كو ئێكەتی ب ئەنقەست رێگریێ ل پێكئینانا كابینەیا دەهێ دكەت و گۆت ژی «پارتی حزبەك نینە ئالییەك بشێت مەرجان بۆ دیار بكەت و بژاردەیێن (ئەلیف یان بێ) بێخیتە پێشییا وێ. پێدڤییە وەك هێزا ئێكێ و سەركەفتی، پێكڤە روونین و ل دووف بەركەفتەیان بگەهینە رێككەفتنێ، چونكە پارتی دەرگەهێ دانوستاندنێ دانەخستییە».
