پەرلەمانتارەك: بێی پشكدارییا پارتی، هیچ حوكمەتەك ل بەغدا جێگیر نابیت
ئەندامەكێ جڤاتا نوونەرێن ئیراقێ ل سەر فراكسیۆنا پارتی دیموكراتی كوردستان دیار كر، كو وان ب فەرمی هەلوەستێ خوە گەهاندییە سەركردایەتییا خوە و پەیاما سەرەكی ئەوە كو ب ڤی رەنگێ نوكە یێ رەفتارێ، بەردەوامبوون د پرۆسەیا سیاسی دا یا ب زەحمەتە. ئەگەرێ سەرەكی ژی ئەوە كو د بن ڤان مەرجان دا، نەشێن خزمەتا مللەتێ خوە بكەن.
بناس دۆسكی، ئەندامێ فراكسیۆنا پارتی دیموكراتی كوردستان ل جڤاتا نوونەرێن ئیراقێ بۆ رۆژنامەیا (ئەڤرۆ) گۆت: داخوازێ ژ هەڤپەیمانێن سیاسی و هەڤپشكێن حوكمەتێ دكەین كو هزرێن خوە باش بكەن، پێدڤییە هەموو ئالی بەرژەوەندییێن نەتەوەیی بخەنە پێش دەستكەفتێن تایبەتی. ژ پێخەمەت بڕێڤەچوونا كاران، دڤێت مالا ئیراقی یا ئێكگرتی بیت و رێگری ل هەر بزاڤەكێ بهێتە كرن كو ببیتە ئەگەرێ شكاندنا ئیرادەیا كوردان، چونكی نوكە رەوش ب گشتی یا هەستیارە و ئیراق پێدڤی ب ئارامیێ یە.
دۆسكی ل دۆر ململانێیێن د ناڤبەرا ئالیێن سیاسی دا گۆت: هەكە ئالیێن دی ب 30 كورسییێن پارتی بڤێن ل دژی پارتی راوەستن، كاركرن دێ یا ب زەحمەت بیت. پارتی دیموكراتی كوردستان خودانا پتر ژ ملیۆنەك و 200 هزار دەنگانە و پتر ژ 30 كورسییان یێن هەین، لەورا نابیت بهێتە پشتگوخستن.
دەربارەی فەرمانا ڤەكێشانێ ئاشكرا كر، پشتی وان دلگرانییا خوە گەهاندییە سەركردایەتییا پارتی ل دۆر رەفتارێن بەغدا بەرامبەر فراكسیۆنا پارتی، داخواز ل هەموو پەرلەمانتار و وەزیرێن كورد هاتییە كرن كو ژ بەغدا ڤەگەرنە كوردستانێ. ب پشتڕاستی ڤە ب حیكمەتا سەرۆك بارزانی و پەیوەندییێن وی یێن دبلۆماسی، دێ بڕیارەكا دروست هێتە دان كو د بەرژەوەندییا خەلكی دا بیت.
دۆسكی گۆت ژی: هەكە حوكمەتەك ل بەغدا بهێتە پێكئینان و ئالیێن سەرەكی وەك (سەدری، مالكی و پارتی) تێدا نەبن، ئەو حوكمەت دێ هەتا چەند یا بەردەوام بیت؟ بێی پشكدارییا ڤان هێزێن مەزن، چو حوكمەتەك نەشێت ئارام بیت.
