هیڤیخوازین سەردەمەكێ پڕ ژ ئاشتی و ئارامیێ ل ئیراقێ دەستپێبكەت
مەسرور بارزانی، سەرۆكێ حوكمەتا هەرێما كوردستانێ د پەیوەندییەكا تەلەفۆنی دا پیرۆزباهی ل عەلی زەیدی كر ب هەلكەفتا راسپاردنا وی بۆ پۆستێ سەرۆك وەزیرێن ئیراقا فیدرال.
مەسرور بارزانی پشتەڤانییا حوكمەتا هەرێما كوردستانێ بۆ سەركەفتنا كابینەیا نوو و چارەسەركرنا كێشەیان ل سەر بنەمایێ دەستووری دیار كر.
مەسرور بارزانی سەرۆكێ حوكمەتا هەرێما كوردستانێ ل سەر هەژمارا خۆ یا فەرمی ل تۆڕا جڤاكی یا «ئێكس» راگەهاند، كو پەیوەندییەكا تەلەفۆنی ل گەل عەلی زەیدی، سەرۆك وەزیرێن راسپاردكری یێ ئیراقێ ئەنجامدایە.
مەسرور بارزانی د پەیاما خۆ دا نڤیسییە «مە پیرۆزباهی ل عەلی زەیدی كر ب هەلكەفتا راسپاردنا وی بۆ پۆستێ سەرۆك وەزیرێن ئیراقا فیدرال؛ مە هیڤیا سەركەفتنێ بۆ خواست د ئەركێ وی دا بۆ پێكئینانا كابینەیا نوو یا حوكمەتا فیدرال».
سەرۆكێ حوكمەتا هەرێما كوردستانێ دوپاتی ل سەر گرنگییا پێگیریێ ب دەستووری كر و راگەهاند»مە پشتەڤانییا خۆ بۆ چارەسەركرنا هەموو كێشەیان ل سەر بنەمایێ دەستووری دیار كر».
مەسرور بارزانی ئۆمێدا خۆ نیشاندا كو ئەڤ پێنگاڤە ببیتە دەستپێكەك بۆ قۆناغەكا نوو ل ئیراقێ و گۆت «هیڤیخوازین سەردەمەكێ پڕ ژ ئاشتی و ئارامیێ ل ئیراقێ دەستپێبكەت».
ئەڤ پەیوەندییا تەلەفۆنی پشتی هندێ دهێت كو عەلی زەیدی وەك بەربژارێ كۆدەنگیێ یێ چارچۆڤەیێ هەماهەنگیێ هاتە دیاركرن و ژ ئالیێ سەرۆككۆماری ڤە ب فەرمی بۆ پێكئینانا حوكمەتا داهاتی یا ئیراقێ هاتە راسپاردن.
