شانەیا رێكخستنا مە سەرا شویشتنا وێنەیێن پێشمەرگەی هاتە ئاشكرا كـرن
سالار محەمەد دۆسكی:
1-6
زیندانیێ سیاسی نەورۆز مەجید محەمەد قەنجو بالەتەیی ل سالا 1965لا ل گوندێ بادێ ل دەڤەرا دۆسكییا ژ دایك بوویە، ژ بەر كاودانێن سەختێن دەڤەرێ خواندنا خوە ل دەڤەرێن جودا دەربازكریە.
زیندانیێ سیاسی نەورۆز مەجید محەمەد قەنجو بالەتەیی، د دیداریكێ دا ل گەل بەرپرێ دیرۆك یێ رۆژنامەیا ئەڤرۆ گۆت: ل سالا 1961 دەمێ شۆڕش دەستپێكری ل گوندێ مە (32) كەسان پێكڤە گۆتن دێ قەستا ناڤ شۆڕشێ كەین، و ئێك ژ وانا باپیر و مام و خالێ من بوون و هەر هەمی كەسانێن نێزیكی مە بوون و مرۆڤێن كورد پەروەر و نشتیمان پەروەر بوون، دوڤدا شەر دناڤبەرا سەركردایەتییا شۆڕشێ و حوكمەتێ دا ل دەڤەرێ دروست بوو، گوندێ مە هاتە سۆتن و هاتە چولكرن وئەڤە ل سالا 1963 بوو، و حوكمەتا ئیراقێ هێرشكرە دەڤەرێ و نەچاربووین ژ گوندی دەركەڤن و بەرەف گوندێ بادێ ل دەڤەرا دۆسكی یا چووین.
زیندانیێ سیاسی نەورۆز مەجید محەمەد قەنجو بالەتەیی، هەروەسا گۆت: ل گوندێ بادێ ل سالا 1965 ژ دایك بووم و مە ژیان ل بادێ دەربازكر هەتا سالا 1971 من خواندنا خوە ل گوندێ بادێ دەستپێكر، و سێ سالان هەتا سالا 1974 دووبارە بۆ شەڕ و دناڤبەرا سەركردایەتی یا شۆڕشا ئیلۆنێ و حوكمەتا ئیراقێ یا وی سەردەمی، و ڕەوش ل گوندێ بادێ ژی وەكی هەر دەڤەرەكا كوردستانێ تێكچوو و چونكە گوندێ بادێ نێزیكی سەنتەرێ دهۆكێ بوو، و توپ دگەهشتنێ و فڕۆكە دهاتن و جەبهێ شەری گەلیێ دهۆكێ بوو و رەوشا خەلكێ گوندێن نێزیكی سەنتەرێ دهۆكێ گەلەك تێكچوو، و دووبارە دەربەدەربووینە ڤە و چووینە گوندێ بانیێ و دووبارە مالێن مە ڤەگەریانە نێزیك گوندێ بادێ ئەو ژی گوندێ بابلو بەرامبەر نێزیكی جەبهەی بوو، و ئەم ل بەر پەزی بووین و فڕۆكە هاتن ڕەمی ل مە كر، و سوپاس بۆ خودێ ب سلامەت بووم و گەلەك تەرش و كەوالێ مە بریندار بوو، و ئەم نەچار بووین جارەكا دی ژ وی گوندی بەرەف گوندێ كزو چووین، و ئەم وێ هاڤینێ ماینە ل گوندی هەتا هەیڤا 10 ژ بەر نەبوونا ئاڤاهیان ل گوندی ئەم نەچاربووین بەرەف زاویتە بچین، وی دەمی زاویتە یا ڤالا بوو و هەر دو زاویتە دڤالا بوون، و ڕەنگە ژ بەر كاودانێن وی سەر دەمی خەلكێ زاویتە قەستا گوندێن دوورتر كربیت، و مالا مە ما ل زاویتە وی دەمی حوكمەتێ هاڤێـتە گوندی و چەند ساروخ ل دەڤەرێ دان و گەلەك زیان گەهاندە ئاژەلی و چ ل كەسەكێ نەهات، و ل دەسپێكا تێكچوونا شۆڕشێ جارەكا دی مالا مە ژ زاویتە هاتە ڤەگوهاستن بۆ گوندێ بادێ و جارەكا دی من خواندنا خوە ل بادێ بەردەوامی دایێ، و قوناغێن چار و پێنجێ و شەشێ سەرەتایی من ل وی گوندی دەربازكرن، وی دەمی مە خانی ل دهۆكێ ژی هەبوو بەلێ كاودانیێن وی سەردەمی نە دهاریكاربوون بهێنە ناڤ باژێری و مامێ من پێشمەرگە بوون، و بابێ من ئەو ژی ژ بەر وا نەدشیان بهێنە باژێری و ژ چار برا بتنێ بابێ من كارێ بازرگانیا تەرش و كەوالی و مێویژ و هژیرا دكر.
زیندانیێ سیاسی نەورۆز مەجید محەمەد قەنجو بالەتەیی، زێدەتر گۆت: ئەم هەشت براینە و سێ برا ژ من مەزنتر بوون بەلێ ل سالا 1974 هەرسێ برایێن ژ من مەزنتر ژی بچوویك بوون و ژیێ وا نەگەهشت بوو وێ چەندێ كو ببنە پێشمەرگە.
زیندانیێ سیاسی نەورۆز مەجید محەمەد قەنجو بالەتەیی، گۆتژی: ل سالا 1978 ژ گوندێ بادێ مالا مە هاتە ڤەگوهاستن بۆ باژێرێ دهۆكێ و ل سالا خواندنێ 1978- 1979 دەربازبوو مە قوناغا ناڤنجی و من خواندنا خوە ل ناڤنجی یا هاوكاری ب زمانێ كوردی بدووماهیئنا، و ژ بەركاودانێن مە ل وی سەردەمی ل قوناغا ئێكێ دەربازنەبووم و سالا دووڤدا هاتمە ڤەگوهاستن بۆ ناڤنجی یا مەم ئالان و ئەو قوتابخانە شنی ل تاخێ مە هاتبوو ڤەكرن، و هەرسێ قوناغ من ل وێ قوتابخانێ ب سەركەفتیانە دەربازكرن هەتا سالا 1982ێ .
سەبارەت پەیوەندیا وی ل گەل پارتی دیموكراتی كوردستان نەورۆز بالەتەیی گۆت: 24/1/1980 بۆ جارا ئێكێ هاتمە رێكخستن د ناڤ رێكخراوا (شەهید سلێمان میتكی) دا، وی دەمی ئەو رێكخراو یا گرێدایی بوو ب لژنا ناوچا شێخان ڤە، وی دەمی مالا مە ژی نەدزانی ئەزێ رێكخستی مە، و رێكخراو مە چالاكی هەبوون و ل تاخێ قەرچا ئەوا نوكە دبێژنێ تاخێ زوزان مە دوكانەك هەبوو و زێدەتر كارێ من بەلاڤەكرنا بەلاڤووكێن حزبی بوو و ئەف بەلاڤووكە هەیڤێ جارەكێ یان دو هەیڤا جارەكێ دهاتن، و مە ل دیواران دان یان ل كولانا بەلاڤەدكرن، دیسا ئەم ئەندامێن رێكخستنێ مە كارەكێ دی ژی هەبوو و هەر ئێك ل تاخێ دژیا دەنگوباس و ئامارا ئەوا كوردێن گرێدایی ب حوكمەتا بەعس ڤە دروستكر چ ئەمن یان رەفیق و ئستخبارات یان كێ هاتن و چوون كر، وی دەمی ژی دەسپێكا سەركردایەتی یا بەروەخت بوو و حوكمەتا بەعس گەلەك یا دژوار بوو ل سەر خەلكێ مە و پێشمەرگە گەلەك یێ كێم بوو، و حوكمەتێ گەلەك جاران خەلك راسپارد بچیتە گوندان كا لڤینێن پێشمەرگەی هەنە و كی هاتن و چوونێ ل گەل كەت، و پشتەڤانیێ لێ دكەت و چەوا هاریكاری وەك چەك و دەرمان دگەهنێ، ئەڤجا هەر ئێك ژ مە لایێ خوە پێزانین بۆ سەر خوە دا دگەهاندن.
نورۆزی مەجید زێدەتر دبێژیت: ل سالا 1980 برایێ من شەوكەت زانكو ب دووماهیئینا و ئەندازیار بوو و قەستا دەرڤەی كر، و گەهشتە ناڤ رێزێن شۆڕشا گولانێ، هەر دو برایێن ژمن مەزنتر چوونە ناڤ رێزێن شۆڕشا گولانێ.
