پشتی چەندین سالان ئەز ب بەرهەمەکێ نوو زڤڕیم
زاخۆ، دلۆڤان هالۆ:
هونەرمەندێ ئیدارەیا سەربخوە یا زاخۆ عەدنان سالح د دیدارەکێ دا بۆ ڕۆژناما ئەڤرۆ دیارکر کو پشتی بێ دەنگیا چەندین سالان ئەز ب بەرهەمەکێ نوو یێ سترانێ بناڤێ دێ خوە ڕاگرم ب شێوەیێ ڤیدیۆ کلیپ زڤریم، هیڤیدارم ئەڤ بەرهەمە ب دلێ گۆهدار و حەزژێکەرێن دەنگێ من بیت.
ناڤهاتی ئاماژە ب وێ چەندێ ژی کر کو ئەڤ سترانە ژ پەیڤ و ئاوازێن هونەرمەند یوسف ڕەمەزانی یە، و مۆزیكا سترانێ ژ لایێ هەڤال ڕێبەر هاتیە ئامادەکرن، میکس و ماسترینگ و تۆمارکرنا دەنگی ل ستودیۆیا سەعید ئێس کەی هاتیە تۆمارکرن، و دەرهێنانا ڤیدیۆ کلیپێ ژ لایێ دەرهێنەر سەلام عەلی هاتیەکرن، و کارێ وێنەگرتن و مۆنتاژێ ژ لایێ دەلال تیڤی هاتیەکرن.
گۆت ژی:»بابەتێ ڤێ سترانێ ل دوور عەشقێ یە دەمێ کو کەسەك هەموو بزاڤان دکەت کو خوە ژ عەشقێ دوور بکەت، لێ ئەو کەسە خوە ل بەر جوانیا کەسەکا خۆشتڤی نەگریت و نەشێت دلێ خوە ڕاگریت، لەوما ژ نەچاری عاشق دبیت».
زێدەتر ژی گۆت:»ل 1983 من دەست ب ستران گۆتنێ کر، لێ بۆ ئێکەم جار ل سالا 1984 ل ئامادەیا زاخۆ ب هەلکەفتا سالڤەگەڕا ئێکەتیا قوتابیان ب شێوەیەکێ فەرمی ئەز چوومە سەر دەپێ شانوویێ و من ستران گۆتن، و هەتا نوکە ژی ئەز بەردەوامم ل سەر کارێ خوە یێ هونەری، چونکی ستران گۆتن یا چوویە د ناڤ خوینا من دا».
