سەرۆک بارزانی.. سیمبولێ یەکڕێزیێ و پاراستنا دەستکەفتان
شەمال ئاکرەیی
د ڤێ قۆناغا هەستیار و تژی ئالۆزی یا کو هەرێما کوردستانێ تێدا دەرباز دبیت، پێدڤییا گەلێ کورد گەلەک ب سەرۆک مەسعوود بارزانی هەیە کو ب سەرکردایەتییا خۆ یا حەکیمانە و ب دیدا خۆ یا ستراتیژی، دێ شێت کەشتیێ بگەهینیتە کەنارێ ئارامیێ. د ڤی بیاڤی دا، هەرگاڤ دەستپێشەخەری و پەیامێن سەرۆک مەسعوود بارزانی، ب تایبەتی ئەو پەیامێ د جەژنا قوربانێ یا پیرۆز دا ئاراستەکری، گرۆڤ و بەلگەیەکێ ڕۆهنە ل سەر ئاستێ بلند یێ بیرکرنەڤێ و بەرپرسیارەتییا نیشتمانی هەمبەر ب خەلکێ کوردستانێ و پاشەڕۆژا وەلاتی.
سەرۆک بارزانی، وەک لیڤەگەڕێ بلند و نیشتمانی یێ گەلێ کوردستانێ، هەردەم د قەیرانان دا وەک پەنا و کەنارێ پشتڕاستبوونێ دیار دبیت و پەیاما وی یا ل جەژنێ هاتییە راگەهاندن، نە ب تنێ پیرۆزباهییەکا ئاسایی بوو، بەلکو نەخشەرێکەک بوو بۆ پاراستنا قەوارەیێ هەرێما کوردستانێ و رویبرویبوونا تەحەدیاتان. ئەڤ دەستپێشەخەرییە نیشان ددەت کا چەوا سەرۆک بارزانی بەرپاکرن ودابینکرنا سەقامگیریێ و بەرقەرارکرنا ئاشتیێ د ناڤبەرا لایەنێن سیاسی دا وەک ئەولەوییەتەکا نیشتمانی یا ستراتیژی دبینیت.
ئێک ژ خالێن سەرەکی و گەوهەری د ڤێ دید و گاڤێ دا، داکوکیکرنە ل سەر ئێکڕێزی و تەباییا ناڤخۆیی وەکی چەکێ هەرە ب هێز یێ ملەتی، چونکی دیرۆکێ یێ سەلماندی کو هەر دەمێ گەلێ کورد ئێکدەست و تەبا بووبیت، شیایە مەزنترین دەستکەفتان ب دەست ڤە بینیت و پیلانێن نەیاران پویچ بکەت و تێک ببەت. سەرۆک بارزانی ل سەر ڤێ بنەمایی داخوازێ ژ هەمی هێز و لایەنێن سیاسی دکەت کو بەرژەوەندییێن بلند یێن نیشتمانی بەری بەرژەوەندیێن حزبی و بەرتەسک دابنێن، و ئەڤێ سنگەپێبوونا سیاسی چارەسەر بكەن و دویماهیێ ب ڤێ دۆخێ نە دروست یێ سیاسی بینن. ئەڤە ئەركەكێ ویژدانی و نەتەوەیی و نیشتیمانییە و پێدڤییە هەمی لایەك هەستێ ب بەرپرسیاریێ سەرەدەریێ د گەل دا بكەن و بۆ سەر رێکا راست بزڤڕن. ژبەر کو ئێکڕێزی د ڤێ قۆناغێ دا نە کارەکێ حەزێ و ئارەزوومەندانەیە، بەلکو مەرجەکێ سەرەکییە بۆ مانەڤێ و پاراستنا پێگەهێ سیاسی و دستووری یێ هەرێمێ.
د هەمان دەم دا، پاراستنا دەستکەفتێن نیشتمانی تەوەرەکێ دی یێ سەرەکی یێ ڤێ ستراتیژیەتێیە؛ چونکی ئەڤ دەستکەفتێن ئەڤڕۆ کو هەرێما کوردستانێ خودانێ وانە، بەرهەمێ خوینا هزاران شەهیدان و ئەنفالکرییان و خەباتا چەندین سالێن پێشمەرگەیێن قەهرەمانە، و سەرۆک بارزانی ب توندی داکوکیێ ل سەر هندێ دکەت کو ئەڤ دەستکەفتە هێلا سورن و ب چو ڕەنگان رێ ناهێتە دان کو کارتێکرنێ ل سەر قەوارەیێ شەرعی و دەستووری یێ هەرێمێ بهێتە کرن. ل ڤێرێ بەرپرسیارەتییا نیشتمانی یا مەزن یا سەرۆک بارزانی دیار دبیت دەمێ ل دژی هەر هەولا و بزاڤەکێ بۆ لاوازکرنا پێگەهێ هەرێمێ ڕادەوەستیت، چ ل سەر ئاستێ ناڤخۆیی یان ژی یێ دەرەکی بیت و داخوازییا وی بۆ دیالۆگێ و تێگەهشتنێ ل گەل بەغدا ل سەر بنەمایێ دەستوور و پاراستنا مافێن شایستە یێن گەلێ کوردستانێ، پشکەکا دی یا وێ حیکمەتێ یە کو نیشان ددەت مللەتێ کورد هەردەم لایەنگرێ ئاشتیێ و بجهئینانا دەستوورییە، بەلێ د هەمان دەم دا چ جاران دەستبەرداری مافێن خۆ یێن نەتەوەیی نابیت.
ل دویماهیێ، دشێین بێژین کو پەیام و هەلوەستێن سەرۆک بارزانی د هەر دەمەکێ دا، خۆدیکا خەمخۆری و دلسۆزییا مەرجەعیەتەکێ نیشتمانینە بەرامبەر مللەتێ کورد، و ئەڤ دەستپێشەخەرییە هەمی لایەنێن سیاسی هەمبەر دیرۆکێ دئێخیتە بن بارێ بەرپرسیارەتیێ دا کو پێکڤە کار بکەن بۆ دەربازبوونێ ژ ڤێ قۆناغێ و مسۆگەرکرنا پاشەڕۆژەکا گەشتر و ئارامتر بۆ کوردستانێ.
