ئێكگرتنا فەرماندەییێن پێشمەرگەی، پێنگاڤەكا چارەنڤێسازە بەر ب ئاڤاكرنا هێزەكا نیشتمانی
ل رۆژا سێشەمبی، 30/6/2026 قۆناغا ئێكێ یا ئێكگرتنا فەرماندەییێن دەڤەرا ئێك و دوو یێن سەر ب وەزارەتا پێشمەرگە ڤە، ب ئامادەبوونا هێزێن هەڤپەیمانان ل هەولێرێ هاتە ئەنجامدان.
فەریق (نەجات عەلی)، فەرماندەیێ فەرماندەییا دەڤەرا ئێك، د پەیڤەكێ دا گرنگییا ڤی هەولی دیاركر و گوت: ئێكگرتنا هێزێن پێشمەرگەی د چارچۆڤەیا دەزگەهییبوون و نیشتمانیكرنێ دا، پرۆسەیەكا گەلەك هەستیار و چارەنڤێسازە.
هەروەسا دووپاتكر كو ب پشتەڤانییا هێزێن هەڤپەیمانان و حوكمەتا هەرێما كوردستانێ، دێ شیێن ڤی پرۆسەیێ ب سەركەفتییانە بەنە پێش.
فەریق نەجات عەلی ئاماژە ب وێ چەندێ كر كو كارمەندێن هەردوو فەرماندەییان كۆمبووینە دا كو ل بن سەرپەرشتییا هەڤپەیمانان دەست ب مەشق و راهێنانان بكەن. ناڤبری دووپاتكر كو شیرەت و مەشقێن هەڤپەیمانان مفایەكێ مەزن گەهاندییە هێزا پێشمەرگەی. زەلال ژی كر كو رەوشا دەڤەرێ دخوازیت ئالیێ سەربازی و تەكنەلۆژیایا هێزێن خۆ پێش بێخن و گیانێ وەفاداریێ بۆ نیشتمانی د ناڤ رێزێن خو دا بهێزتر بكەن.
ل دۆر رۆلێ دیرۆكی یێ پێشمەرگەی، فەریق نەجات گوت: پێشمەرگە بەردەوام فاكتەرێ پێكڤەژیانێ و پاراستنا ئاشتیێ بوویە و چو دەمان نەبوویە گەف ل سەر چو كەس و ئالییان.
ناڤبری باسێ گوهۆڕینا جورێ مەترسییان ل سەر هەرێما كوردستانێ كر و دیاركر: هێرشێن درۆن و مووشەكی ئاماژەیەكا رۆهنن بۆ وێ چەندێ كو ژبلی داعشێ، گەفێن دی ژی ل سەر هەرێما كوردستانێ هەنە.
فەریق نەجات داخواز ژ هەڤپەیمانان و ئەمریكا كر كو پشتەڤان بن د دابینكرنا چەكێن پێشكەفتی دا بۆ بەرگریكرنێ ل قەوارەیێ هەرێما كوردستانێ، ژبەركو ب گۆتنا وی، ژێهاتییا پێشمەرگەی د دیاركرنا گەفان دا گەلەك گرنگە.
ل دووماهییا پەیڤا خۆ، فەریق نەجات عەلی دووپاتكر كو ئامادەبوونا كارمەندێن هەردوو فەرماندەییان نیشانەیا وێ چەندێ یە كو پێشمەرگە بەر ب ئێكرێزییەكا تەمام دچیت.
هەروەسا راگەهاند، هێزێن وان وەك دوو دەزگەهێن نیشتمانی ل بن چەترێ وەزارەتا پێشمەرگە و حوكمەتا هەرێما كوردستانێ كار دكەن. دووپات ژی كر كو ئارمانجا هەموویان پاراستنا هەرێما كوردستانێ یە، ئەو هەرێما ب خوونا هزاران رۆلێن ڤی نیشتمانی هاتییە ب دەستئێخستن، لەورا پێدڤییە گیانێ برایەتیێ و تەباییێ د ناڤ هێزان دا بهێتە پێشئێخستن.
