دێیڤید هارسێنت هەلبەستڤانێ ئەڤین و جەنگێ

ئامادەکرن و و. ژ ئینگلیزی شەمال ئاکرەیی

دێیڤید هارسێنت David Harsentل 9ی دیسێمبەرا سالا 1942ێ، ل دەڤەرا دیڤۆن Devon یا ئینگلتەرا هاتییە سەر دونیایێ. هارسێنت دهێتە هەژمارتن ئێک ژ ناڤدارترین هەلبەستڤانێن ئینگلیز. تا نوکە 21 کۆمێن هەلبەستان چاپکرینە. ناڤدارترین پەرتووکێن وی (خەونێن مرییان – Dreams of the Dead – 1977ێ)، (نووچە ژ ئەنیا شەڕی – News from the Front- 1991ێ)، (بیرۆکەیا چویچکەکێ ل سەر فڕینێ – A Bird‌s Idea of Flight – 1998ێ)، (هەڤژینی – Marriage – 2002ێ)، (Fire Songs – 2014ێ) و دیوانا دویماهێ بناڤێ (لەشکەر – Legion) کو ل سالا 2025ێ چاپبوویە.
زێدەباری هەلبەستێ، تێکستێن درامایا تەلەڤزیۆنی و رادیۆیی دنڤیسیت و چیڕۆکێن پۆلیسی ژی بنازناڤەکی بەلاڤ دکەت.
ژ دیوانا وی (لەشکەر – Legion) مە ئەڤ هەلبەستە کو بناڤێ (سێیینەیێن هەلبەستکی) نە وەرگێڕاینە.

سێیینە یێن هەلبەستکی
(دیاری ژبۆ یانیس ریتسۆس – Yannis Ritsos) *
(١)
لەیمونێن داڤزیایی د مژێ دا مینا چرایا نە
دو هەسپ، ئێک یێ خۆلیکی و یێ دی ژ رەنگێ قاوایێ
تو یێ خۆلیکی ژ خۆ ڕا دبەی، ئەز ل سەر پشتا یێ قاوایی گیانێ خۆ ژ دەست ددەم.

(٢)
ب ڤێ هەلبەستێ دێ گەهمە داویێ:
چ ب موییەکا مژویلانکێ ئەوا کەفتییە سەر رویێ تە
یان ب پەلاتینکەکا ب پۆڕا تە ڤە ڤەنویسیایی.

(٣)
سەقا یێ گەرمە. کنج د بالەکۆنێ دا یێن زوها دبن
بەلێ، ل ڤێرێ، ئەڤێ پیرەژنێ یا خۆ رەشپووشکری.
رۆژ ژی بەرچاڤکێن وێ یا ڤەدمالیت.

(٤)
فریشتەیێن ژ بەران د ناڤ ستوینێن هەرفتی دا
ل سەر گۆڕێن د مرنێ دا نقۆبوویی دا
ماچان ل گەل هەڤ ڤەدگوهۆڕن.

(٥)
پەرداخەکا ئاڤێ ددەیە دەستێ من
ب نهێنی تە تلییا خۆ
تێهلاندبوو.

(٦)
شەمەندەفڕەك ژ گوندی دەرباز دبیت
ل دەمەكێ درەنگێ رۆژا شەمبی، دویكێل بلند دبیت
رێڤینگەكێ ب تنێ.

(٧)
بنێڕە – هەیڤا گەش
هەر نها چەقۆیەک
ژ هچکێ کراسێ خۆ بەرداڤە.

(٨)
سە دڕەون، دارێن تۆزگرتی
بالكونەیەكا هەرفتی، دەرگەهەك بەر ب شەڤێڤە دچیت
پێ خۆ ل سەر ئێكەم پەییسك دادنێم.

(٩)
ل داویێ رۆژ دگەهیتە پەنجەرکا ژوورا پشتێ
ئێک ل سەر جادێ یێ هەوار دکەت
ئەڤ تشتە د جودا نە ژ بۆ وان یێن ئەڤینیێ ناسناکەن.

(١٠)
ل ڤی ئالی یێ رەشە، و ژ ئالیێ دی یێ سپی یە.
ئەرکێ تە ئەوە، ڤی ئالی سپی بکەی
ئالیێ دی ژی رەش.

(١١)
خانییەکێ گرتی، پێسترک.
ماسییەکا زێڕین مەلەڤانییا دکەت
دنیڤ خۆدیکا شیلی دا.

(١٢)
هێشتا کراسێ تە لسەر رستێ یێ رائێخستی یە
ژ بایەکێ هین تژی دبیت
ژ نشکاڤە، شەڤ داددەت.

(١٣)
هەموو باژێڕ
د گوستێلا وێ یا مراری ڕا رەنگ ددەتەڤە:
هەتا مالا من یا بچویک ل کێلەکا باژیری.

(١٤)
دەما سێبەرا سیڤاندۆكی ..
دكەڤیتە سەر دیوارێ سپی، یێ بەرامبەر،
دێ بۆ تە وێ نامەیێ نڤیسم.

(١٥)
فنجانێ قەهوێ سەر نخوین دكەی،
«ئەز دەرگەهەكی دبینم بەرەڤ سوبەهی».
دەرگەهـ یێ ڤەكری یە یان گرتی؟ ئەو بەرسڤێ نادەت.

(١٦)
ل وان شەڤێن نەخشاندی ب ستێران.. مە
گوهـ ل سێڤان دبوو دكەفتنە سەر گیایێ خۆناڤگرتی
مە سێڤ ل وارا دهێلان و مە دەنگێ کەفتنێ كۆم دكر.

* : یانیس ریتسۆس – Yannis Ritsos (1990 – 1909)، هەلبەستڤان و نڤیسەرەکێ یونانی یێ ناڤدارە کو خۆدانێ پتر ژ 100 دیوانێن هەلبەستایە و دهێتە هەژمارتن ناڤدارترین هەلبەستڤان کو هەلبەستێن وی هاتینە وەرگیڕان بۆ سەر زمانێن دی یێن زیندی.

ژێدەر:

– https://en.wikipedia.org/wiki/David_Harsent
– Faber and Faber, London, United Kingdom. 2005

کۆمێنتا تە