نەمـانا شـەڕی بۆ کـوردان دەستپێکـا قـووناغەکـا نوو یە
بسپۆرەکێ پەیوەندیێن نێڤدەولەتی دیار دکەت، دژبەرێن یاسایێ دبێژن دێ بیتە ئەگەرێ پارچەبوونا تورکیا و هندەک ژ هێزێن کوردی ژی دبێژن چ بۆ کوردان نەهاتیە کرن، لێ یا راست نەمانا شەڕی گەلەک باشە و بۆ کوردان دهێتە رامانا دەستپێکرنا قووناغەکا نوو.
د. ئیقبال دووڕە بسپۆرێ زانستێن سیاسی دیار دکەت، پەسەندکرنا یاسایا ئاشتیێ ل پەرلەمانێ تورکیا دەستپێکەکا نوو یە بۆ هەموو تورکیا و بێگومان گەلەک هێز ل تورکیا ل دژی وێ یاسایێ نە و هەروەسا د ناڤ کوردان دا ژی گەلەک هێز و کەسایەتیێن سیاسی وەسا دبینن کو د یاسایێ دا چو تشتەک بۆ کوردان نینە و گۆت: (توندرەوێن تورک دبێژن هەکە کورد ژی وەکو مە ببنە خوەدان هەمان ماف وی دەمی دێ مەترسیێن گەلەک مەزن د پاشەرۆژێ دا بۆ نەتەوا تورک دروست بن، ژ بەر ڤێ یەکێ ژی توندرەوێن تورک ل دژی یاسایێ نە و د ناڤ کوردان دا ژی گەلەک کەس و هێز دژبەریا یاسایێ دکەن و دبێژن ئەو یاسایە چو تشتەک بۆ کوردان تێدا نینە و د پاشەرۆژێ دا دێ بیتە ئەگەرێ مەترسیێن گەلەک مەزن بۆ کوردان، چونکی هەتا نها ژی هەبوونا کوردان ب فەرمی ل تورکیا نەهاتیە قەبوول کرن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، بێگومان ئەردۆغانی حسابێن جودا ژی هەنە، بەری هەر تشتەکێ نەخشەیێ سیاسی ل تورکیا هاتیە گوهۆڕین و ئەردۆغان حسابا هەلبژارتنێن بهێت یێن تورکیا دکەت و دخوازیت ڤێجارێ دەنگێن کوردان بدەستڤە بینیت، هەر کەس ژی دزانیت کو رێژەیەکا ئێکجار زۆر دەنگدەرێن کورد ل باژێرێن مەزن یێن تورکیا ژی هەنە و هەروەسا ژ بۆ هەلبژارتنێن سەرۆک کۆماریێ ژی ئەردۆغان پێدڤی ب پشتەڤانیا کوردانە و گۆت: (حسابێن جودا جودا ژ ئالیێ دەستهەلاتێ ڤە هەنە، راستە یاسا هاتە پەسەند کرن، لێ یا گرنگ کا دێ چاوا هێتە بجهئینان و ئایا دێ ئاستەنگی دروست بن یان نە، ژ بەر ڤێ یەکێ ژی ئەڤ شەش مەهێن کو هاتینە دیار کرن دێ گەلەک چارەنڤیسساز بن بۆ ئاشتیێ ل تورکیا).
بسپۆرێ زانستێن سیاسی ئەو یەک ژی نەڤەشارت کو د ئاستێ هەرێمی دا ژی دبیت هندەک وەلات و هێز ئاستەنگان دروست بکەن، چونکی ئاشتی و ئارامیا ل تورکیا د بەرژەوەندیا گەلەک وەلاتێن دەڤەرێ دا نینە، دڤێت ژبیر نەکەین کا بۆچی تورکیا نها یا رژد بوو یاسایەک وەسا دەرخینیت، چونکی د ئاستێ رۆژهەلاتا ناڤین دا گوهۆڕینێن گەلەک مەزن د رێ دانە و ئەو یەک دێ کاریگەریا خوە یا مەزن ل سەر تورکیا ژی هەبیت، بەرپرسێن تورکیا هزرا ڤێ یەکێ دکەن کا دێ چاوا شێن پێگەهێ خوە بپارێزن و ژ بەر ڤێ یەکێ ژی دەستهەلاتا تورکیا یا رژد بوو بابەتێ پەکەکێ ب رەنگەکێ وەسا چارەسەر بکەت کو د پاشەرۆژێ دا نەبیتە مەترسی بۆ تورکیا.
ناڤهاتی بەحسێ ڤێ یەکێ ژی کر کو ئەردۆغانی دڤێت ب رێیا ڤێ یاسایێ خوە پتر نێزیکی ئەمریکا و وەلاتێن رۆژئاڤایی بکەت، چونکی بەری نها گەلەک ژ وەلاتێن رۆژئاڤایی ژ بەر پرسا کوردی رەخنەیێن توند ل تورکیا دگرتن، تورکیا دڤێت ب دەستپێکرنا قووناغەکا نوو پەیوەندیێن خوە ژی ل گەل وەلاتێن رۆژئاڤایی باشتر لێ بکەت و هەروەسا پێگەهێ خوە ژی بهێز بکەت و بۆ هەموو جیهانێ بێژیت کو ئێدی ل تورکیا پرسا کوردی نەمایە و هاتیە چارەسەرکرن.
د. ئیقبال دووڕە ئاماژە ب ڤێ یەکێ ژی کر کو، نەمانا شەڕی جارێ گەلەک گرنگە، چونکی ژ بەر شەڕی گەلەک زیان گەهشتنە کوردان، رێیا سیاسەتێ بۆ کوردان یا ئاسان نەبوو، ب هزاران سیاسەتمەدار و کەسایەتیێن کورد ژ بەر خەباتا سیاسی ل زیندانێن تورکیا دانە، هەروەسا ب دەهان سەرۆک باژێرڤانیێن کورد ژ کاری هاتینە دوورخستن و گەلەک ئاستەنگیێن دی ل هەمبەر خەباتا سیاسی هەبوو و گۆت: (ب نەمانا شەڕی دێ قووناغەکا نوو بۆ کوردان ل تورکیا دەستپێکەت و کورد دشێن ئێدی ب رەنگەکێ بهێز د سیاسەتا تورکیا دا خوەدان رۆل بن، ژ بەر ڤێ یەکێ ژی پێدڤیە هێزێن سیاسی یێن کوردی ئێدی خوە بۆ قووناغەکا نوو یا خەباتا سیاسی ل تورکیا بەرهەڤ بکەن).
سەبارەت ب مەترسیێن ل سەر قووناغا نها ژی ناڤهاتی دیار کر، چونکی د ئاستێ دەستهەلاتێ و ئۆپۆزسیۆنێ دا چو ئاستەنگی نینن و هەروەسا یاسا پشتەڤانیەکا باش ژی ژ پەرلەمانی وەرگرت، ٨٠٪ ئەندامێن پەرلەمانی دەنگێ ئەردێ دانە یاسایێ و ئەو یەک ژی بێگومان گەلەک گرنگە و هەروەسا دژبەرێن یاسایێ گەلەک کێمن و ئەو یەک ژی نیشا ددەت کو شانسێ سەرکەفتنا قووناغا ئاشتیێ گەلەک زێدە یە، لێ وەکو من گۆتی دێ د ڤان شەش مەهان دا گەلەک تشت ئاشکرا بن.
