ل ڤێرە ئەز فێری زمانێ كوردی بووم
سندس سالح سلێڤانەیی
محەمەد مستەفا، كو خەلكێ وەلاتێ مسرێ یە، وەك بریكارێ كۆمپانیەكا هندی پشكداری د فێستیڤالا چارێ یا بازاڕگەڕیا وەلاتێ مسرێ دا كربوو ل دهۆكێ، د دیدارەكێ دا بۆ رۆژنامەیا ئەڤرۆ گۆت: ئەڤە جارا پێنجێ یە ئەز دهێمە دهۆكێ و پشكداریێ دڤان جۆرە فێستیڤالان دا دكەم، پشكداریا مە یا ئەڤ جارێ ب هندەك كارێن دەستی یە وەك (ئێكسسوارات) هەروەسا هندەك جۆرێن شامپۆ و كەرەستەیێن پاقژكرنێ، كو ژ كارێن دەستی یێن وەلاتێ هندێ نە، هەلبەت ڤان فێستیڤالان گەلەك گرنگیا خۆ هەیە، لەورا سالانە دێ پشكداربم.
هەروەسا گۆت: وەكو من دیتی سال بۆ سالێ ئاستێ فێستیڤالێ یێ باشتر لێ دهێت و ئەڤ سالە جهێ مە بەرفرەهترە، هەروەسا رێكخستنەكا باشتر د قێستیڤالێ دا هەیە، لەورا دەستخۆشیێ ل وان كەسان دكەم یێن كو ئەڤ فێستیڤالە رێكخستین و تشتێ گەلەك كەیفا من من پێ هاتی ل ڤێرە ئەز فێری زمانێ كوردی بووم.
