ترس هەیە پشتی ڤەكێشانا ئەمریكا داعش پتر خوە ڕێكبێخیت
بەرپرسێ لقا سێ یا پارتی دیموكراتی كوردستان ل كەركووكێ باس ل ڤەكێشانا هێزێن ئەمریكا دكەت و كاریگەرییا وێ ل سەر ڕەوشا ئەمنی یا باژێڕی و دەڤەرێ ب گشتی بەرچاڤكر.
سیروان عاسی، بەرپرسێ لقا سێ یا پارتی دیموكراتی كوردستان ل كەركووكێ، گۆت «مەترسییا زیندووبوونا شانێن نڤستی یێن داعشێ هەیە، هندەك جاران لڤینان ژی دكەن و كریارێن تیرۆرستی ئەنجام ددەن، ژ بەر وێ چەندێ ب باشی دزانین پێشمەرگە وێ ڤالاهییا ئەمنی یا ل كەركووكێ هەی، داگریت. بۆ ڤێ پرسێ بەردەوام پەیوەندی د ناڤبەرا هەولێرێ و بەغدایێ دا هەیە، هیڤیدارین ب زووترین دەم ئەڤە بهێتە ب جهئینان».
ل دۆر كاریگەرییا ڤەكێشانا هێزێن ئەمریكی ل سەر كەركووكێ، ئەو بەرپرسێ پارتی وەسا دبینیت»دبیت ڤەكێشانا ئەمریكا دەرفەتەكا پتر بدەتە داعشێ و شانێن نڤستی یێن وێ ڕێكخراوا تیرۆرستی كو لڤێنێن وێ پتر ببن. پێدڤییە حوكمەتا ئیراقێ ل گەل هەرێما كوردستانێ هەماهەنگیێ بكەت تاكو ئەڤ ڤالاهییە بهێتە داگرتن».
گوت ژی» چەندین سالە مە داخواز كرییە پۆلیسێن ناڤخوە كاروبارێن ئاسایشا باژێڕی وەربگرن، لێ هەتا نوكە نەهاتییە ب جهئینان، ژ بەر وێ چەندێ پێدڤییە ب زووترین ئەڤە بهێتە ب جهئینان و هێزێن سەربازی بچنە ژ دەرڤەی باژێڕان».
