هەرێما کوردستانێ پشتی ڤەکێشانا هێزێن هەڤپەیمانان
ئەحمەد عوبێد
هێزێن هەڤپەیمان یێن نێڤدەولەتی، ل سالا 2014 ل سەر داخوازا فەرمی یا ئیراقێ ژ بۆ مەترسیا تیرۆرێ هاتبوونە ئیراقێ و هەرێما کوردستانێ، دیارە ب ئەرکەکی هاتینە و ل گەل داویهاتنا وی ئەرکی، دێ ڤەگەرن ژی. ل 30 ئیلۆا مەها بووری کو دوماهی ژڤانێ دەرکەڤتنا هێزین هەڤپەیمانان بوویە، ل دەڤەرێ هەست ب مەترسیا دوبارەبوونا داعشێ دهێتە کرن.
لێ ب دیتنا من جوداترە و کێمترین مەترسی هەبیت یا تیرۆرستێن داعشە، هندەک مەترسیێن دیتر هەنە ژ یا داعشێ، چونکی ل سالا 2014 و نها ل دوماهیا 2026 گەلەک باردۆخ د جیاوازن. ل سالا 2014 شەڕێ ناڤخۆیێ سووریا و هەبوونا دەهان گرۆپێن چەکداریێن توندرەو و پڕبوونا زیندانێن وان ژ وان چەکداران و هەبوونا ڤالاهیەکا مەزن یا ئەمنی د ناڤبەرا ئیراق و سووریێ دا، کاریگەریەکا سەرەکی ل سەر هاتنا داعش بۆ ئاخا ئیراقێ هەبوو، وی دەمی بەلکی خەتەکێ سوننی ژی پێ خۆش بووی و پلان دانەر بوو، کو داعش دەڤەرێ ڤەگریت، لێ نها سەرکردایەتیا سوننی ژی دبینن زەرەرمەندێن سەرەکی ژ داعش دەڤەرێن سوننەنشین بوون، ڤی دەمێ ڤالاهیا ئەمنی هەبیت ژی، سوننی وێ دەرڤەتێ نادەنە نموونێن داعشێ دەڤەرێن وان بکاربینین.
هەرێما کوردستانێ ژی کو خۆدان هێزا پێشمەرگەیە و ژ سەربۆرا شۆرشا ئێلۆنێ هەتا شکاندنا داعشێ و خۆنەچەماندا ل سحێلا و پردێ، نوکە هێزا پیادە یا پێشمەرگەی باشترین راهێنانێن جەنگی ل سەر دەستێ هەڤپەیمانان وەرگرتینە و ل باشترین ئاستێ شەڕکرنێ دانە.
کورتی دبێژم دبیت پشتی ڤەکێشانا هەڤپەیمانان جار ب جار شانێن نڤستی کریارێن تیرۆرستی بکەن، لێ نابینم وەک جاران ئەو شیان هەبن دەڤەران بگرن، ل بەرامبەر ڤێ مەترسی و تەحەدایا ل سەر هەرێما کوردستانێ هاتیەکرن ل رابردووی و ب شکەستن ب دوماهیک هاتی، هندەک بابەتێن دی هەنە و پێدڤییە کورد ب شێوەکێ هوشیارتە مامەلەیێ ل گەل بکەت، ئەو ژی شەڕێ ئابوورییە، چونکی ب گەلەک رێکان هاتن کو بشێن هەرێما کوردستانێ لاواز بکەن نەشیان، تاکە چەک ل بەرانبەر هەرێمێ مابیت شەڕێ ئابووری یە.
و د ڤی ماوەیی دا گرنگ ئەوە هەمی لایەنێن کوردی بۆ بودجەیا 2027 داکۆکیەکا مەزن بکەن ل سەر مافێن دەستووری یێن هەرێما کوردستانێ و ئەڤە تاکەرێکا دروستە کو ب یاسایی ئەڤ مافە بهێنە ستاندن.
