ئەڤرۆ دێ هەولێر ئێكەم پێنگاڤا خوە یا كۆپا كەنداڤی هاڤێژیت
چاڤەڕێ دهێتە كرن ئەڤرۆ تیما یانەیا هەولێر نوونەرا كوردستانێ ئێكەم پێنگاڤا خوە یا كۆپا كەنداڤی ل سەر ئاستێ یانەیان ژ دەرڤەیی یاریگەها خوە پاڤێژیت، دەمێ دبیتە مێڤانا یانەیا عەجمان یا ئیماراتی ژ چارچووڤەیێ یارییا ئێكێ و كۆما سێیێ ژ قارەمانییا كەنداڤی.
سیستەم هاتیە گوهۆڕین
بۆ وەرزێ نوو فدراسیۆنا فوتبۆلا كەنداڤی سیستەمێ خولێ و پشكدارییا گوهارتییە ژ هەشت یانەیان زێدەكرینە بووینە 12 یانە و هاتینە بەلاڤكرن ل سەر سێ كۆمان، ب شێوازێ خول هاتن و چوون، خودانێن ڕێزا ئێكێ و دویێ یێن هەر كۆمەكێ دێ دەربازبن ل گەل دو باشترین یانەیێن ڕێزێن سێیێ ژ هەرسێ كۆما دەربازنە قووناغا هەشتێ، هەرسێ كۆم بڤی شێوەیی نە.
كۆما ئێكێ: دەخیل-قەتەری، نیۆم-سعۆدی، شەباب-عومانی، شەعب حەزرموت-یەمەنی.
كۆما دویێ: زەورا-ئیراقی، قەتەر- قەتەری، نەسر-ئیماراتی، ریفاع-بەحرێنی.
كۆما سێیێ: هەولێر- كوردستانی، عجمان-ئیماراتی، ئیتفاق-سعۆدی، كازمە- كۆێتی.
ڕاهێنەر گەشبینە
د داخویانیەكا رۆژنامەڤانی دا لوئەی سەلاح ڕاهێنەرێ تیما یانەیا هەولێرێ گۆت: هەموو دەمان یارییا ئێكێ بۆ هەر یانەیەكێ یا بزەحمەتە و پێشبینی ژی نا هێنە گۆتن، ئەڤە دێ بیتە ئێكەم یارییا مە د كۆپا كەنداڤی دا، هەموو یاریزان بەرهەڤن و ئەم یێن هاتینە ئیماراتی و ئارمانجا مە سێ خالن، بزەحمەتە ژبەركو شێواز و ئاستێ هەردو یانەیان یێن دو وەلاتێن ژێكجوودا دووراتیەكا هەی، ئەم دێ بزاڤێ كەین ب ئەنجامەكێ باش ڤەگەرین، یارییا ئێكێ یە و شێوازێ خولێ هاتن و چوونە ئانكو دەم یێ ل بەرسینگێ مە هەیی بۆ دەربازبوونێ، لێ هەر یارییەكا دكەین بۆ سێ خالانە پێخەمەت نە كەڤینە د چو ئاریشەیان دا.
