جادەیێن تاخێ ماسیكێ یێن دهێنە بەرفرەهكرن
سندس سالح سلێڤانەیی:
ل دووڤ پلانا سەرۆكاتیا باژێرڤانیا دهۆكێ، دەست ب بەرفرەهكرنا جادەیێن تاخێ ماسیكێ هاتیە كرن و بەرپرسێ ڕاگەهاندنا سەرۆكاتیا باژێرڤانیا دهۆكێ ژی دبێژیت: ل هەر جادەیەكا دەلیڤەیا بەرفرەهكرنێ هەبیت و (شوستە) یێ هاریكار بیت دێ هێتە ڤەكرن.
شێروان حەسەن، بەرپرسێ ڕاگەهاندنا سەرۆكاتیا باژێرڤانیا دهۆكێ بۆ رۆژنامەیا ئەڤرۆ گۆت: بەری نوكە تیمێن باژێرڤانیێ سەرەدانا تاخێ ماسیكێ كربوو، پشتی زڤڕین هندەك ڤەدیتن بۆ بەرفرەهكرنا جادەیێن وی تاخی هاتنە كرن، كو ئەو ژی دێ ل هەردو سایتان بیت و رۆبەرێ بەرفرەهكرنێ ل دووڤ جادێ دمینیت، ب تایبەت ژی (رەسیفی) یان ژی هندەك دبێژنێ (شوستە) ل هندەك جادەیان مەترەك و ل هندەكان ژی دو مەتر هەتا دو مەتر و نیڤان دێ هێنە ڤەكرن و وەكو مەگۆتی ئەڤ ل دووف جادێ دمینیت و ژ نوو دەست ب بەرفرەهكرنێ هاتیە كرن و پشتی ب دووماهی دهێن دێ ڕەوشا هاتنوچوونێ بۆ شۆفێران، هەروەسا بۆ خەلكی ژی ب ساناهیتر لێ هێت و هەلبەت بۆ بەرفرەهكرنا هەر جادەیەكێ مە هەماهەنگیەكا باش ل گەل رێڤەبەریا هاتنوچوونێ ل پارێزگەها دهۆكێ هەیە و دێ د بەردەوام بین.
شێروان حەسەن، بەرپرسێ ڕاگەهاندنا سەرۆكاتیا باژێرڤانیا دهۆكێ، هێشتا گۆت: نەبەس بۆ جادەیێن تاخێ ماسیكێ بەلكو بۆ جادەیێن هەموو تاخان د پلانا باژێرڤانیێ دا هەكە دەلیڤە هەبیت، ب تایبەت ژلایێ رەسیفان ڤە ل دەمێ بهێت دێ هێنە ڤەكرن و ئەڤە هەموو دێ كەڤنە د خزمەتا شۆفێران و خەلكێ دەڤەرێ دا.
ل دووماهیێ گۆت: بەری هاتنا وەرزێ زڤستانێ باژێرڤانیێ پلانەك دانایە، ژوانا ڤەكرنا هندەك مەنهۆلان وپاقژكرن و بەرفرەهكرنا هندەك جهان داكو باران كارتێكرنێ لێ نەكەن و نەبنە جهێ مەترسیێ و وەكو هەر سال پلان بۆ وێ چەندێ هاتیە دانان و ل دەمێ باران بارینێ تیمێن باژێرڤانیێ ل گەل تیمێن هندەك رێڤەبەریێن دی دێ د ئامادەباشیێ دا بن و مە بەرهەڤیا خۆ بۆ هەر تشتەكی كریە.
