پشتەڤانی بۆ قووناغا ئاشتیێ هەر ڕۆژ زێدەتر دبیت
کۆمپانیێن راپرسییان ل تورکیا دیار دکەن پشتەڤانیا بۆ قووناغا ئاشتیێ ل تورکیا زێدەتر بوویە، چونکی دو سالن چو شەر نینن و ئەو یەک ژی بوویە جهێ دلخوەشیا وەلاتیان و وەلاتیێن تورکیا وەسا دبینن ئەردۆغان دشێت پرسا کوردی ل تورکیا چارەسەر بکەت.
چەندین کۆمپانیێن راپرسییان ل تورکیا وەکو کۆمپانییا سۆنار، گەنار، ئۆپتیمار، یۆنەیلەم ئەنجامێن راپرسیێن خوە بۆ رایا گشتی ئاشکرا دکەن و تێدا هاتیە، پشتی دەستپێکرنا قووناغا ئاشتیێ ل تورکیا هەتا نها چو شەڕ روو نەداینە و چو کەسەک ژی نەبوویە قوربانی و ئەو یەک بوویە جهێ دلخوشیا هەموو وەلاتیێن تورکیا و نها پشتەڤانیا بۆ قووناغا ئاشتیێ ل تورکیا نێزیکی ٨٥% بوویە و ئەو یەک ژی نیشا ددەت کو جڤاکێ تورکیا ل دژی شەڕی یە و وەلاتیێن تورکیا هەموو داخوازا ئارامی و ئاشتیێ دکەن.
ل گۆر کۆمپانیێن راپرسییان پڕانییا کەسێن پشکداری د راپرسییان دا کرینە ئاماژە ب ڤێ یەکێ کرینە کو سەردەمێ شەڕی و ئالۆزیان نەمایە و دڤێت سەردەمەک نوو ل تورکیا دستپێ بکەت و ئەردۆغان و باخچەلی دشێن پرسا کوردی چارەسەر بکەن و نها زەمینەیەکا گەلەک گونجای بۆ چارەسەرکرنا پرسا کوردی و پرسین دی یێن تورکیا هەیە، چونکی دەمێ پرسا کوردی ل تورکیا بهێتە چارەسەرکرن گەلەک پرسێن دی ژی دێ ل تورکیا هێنە چارەسەرکرن، ئانکۆ پرسا کوردی دێ دەرگەهێ چارەکرنا پرسێن دی ژی ڤەکەت و ب تایبەتی ژی قەیرانا ئابووری، ئانکۆ هەتا پرسا کوردی ل تورکیا نەهێتە چارەسەرکرن قەیرانا ئابووری ژی چارەسەر نابیت.
ل گۆر ئەنجامێن راپرسیان نها پتر ژ ٨٥% ژ وەلاتیێن تورکیا پشتەڤانیێ ل قووناغا ئاشتیێ دکەن و ئەو یەک د دەمەکێ دایە کو بەری دو مەهان رێژەیا پشتەڤانیا وەلاتیان ٨٠% بوو و رەوشا نها نیشا ددەت رێژەیا پشتەڤانیا وەلاتیان بۆ قووناغا ئاشتیێ ل تورکیا رۆژ ب رۆژێ زێدەتر دبیت و ئەو یەک ژی بوویە جهێ دلخوەشیا هەموو پێکهاتەیێن جڤاکی ل تورکیا.
ل ئالیێ دی دوهی نومان کورتولمیش سەرۆکێ پەرلەمانێ تورکیا ژی دیار کر، پەکەکێ چەندین کەمپێن خوە ل نێزیکی سنورێ تورکیا چۆل کرینە، ئەو یەک پێشهاتەیەک گەلەک گرنگ و دلخوەشکەرە، دڤێت د زووترین دەم دا قووناغا ژناڤبرنا چەکان ب دووماهی بهێت دا پاشی قووناغەکا دی دەستپێ بکەت، نها تشتێن گرنگ روو ددەن و ئالیێن پەیوەندیدار ژی یا پێدڤی دکەن، قووناغا ئاشتیێ نە تنێ ژ بۆ تورکیا بەلکو ژ بۆ هەموو رۆژهەلاتا ناڤین یا گرنگە و دڤێت بگەهیتە ئارمانجا خوە.
سەرۆکێ پەرلەمانێ تورکیا د بەردەوامیا ئاخڤتنا خوە دا ئاماژە ب ڤێ یەکێ ژی کر، تورکیا یا رژدە بەردەوامیێ بدەتە قووناغا ئاشتیێ و چو هێزەک ژی نەشێت ئاستەنگان دروست بکەت، چونکی ئەو یەک ژ بۆ بهێزبوونا تورکیا یا گرنگە و تورکیا دێ هەموو پرسێن خوە چارەسەر کەت و رێ نادەت چو هێزێن دەرەکی ژی دەستێوەردانێ بکەن و گۆت: (مە بەری نها ژی گەلەک جاران گۆتیە کو دی تورکیایەک نوو ب پشکداریا کوردان، تورکان، عەرەبان و هەموو پێکهاتەیێن دی ل تورکیا دروست کەین و وی دەمی دێ تورکیا بیتە وەلاتێ هەری بهێز ل دەڤەرێ).
ئەو یەک د دەمەکێ دایە کو بەری چەند رۆژان موراد قەرەیلان فەرماندارێن هێزێن سەربازی یێ پەکەکێ ژی دیار کر، وان هێزێن خوە ژ سنورێن تورکیا ڤەکێشاینە و هەروەسا هێزێن وان یێن تایبەت ل ناڤ تورکیا هەبوون نها ئەو هێزە ژی دێ ڤەگەرنە ڤە جهەکێ دی، ئانکۆ نابنە مەترسی بۆ تورکیا و نها دڤێت تورکیا هەموو ئاستەنگێن ل هەمبەر ئۆجەلانی راکەت دا کو ئۆجەلان بشێت ب ئازادانە کار بکەت، چونکی ئۆجەلان رۆلەک سەرەکی بۆ پێشڤەبرنا قووناغا ئاشتیێ دگێریت و دڤێت دەولەتا تورکیا ژی چو ئاستەنگان بۆ ئۆجەلانی دروست نەکەت.
چاڤدێرین سیاسی ل تورکیا ژی وەسا دبینن کو قووناغا نها ل تورکیا بوویە جهێ دلخوەشیا هەموو خەلکی، لێ هەتا نها ژ ئالیێ دەولەتا تورکیا ڤە ب کریاری چو نەهاتیە کرن، پێدڤی بوو تورکیا هەموو گرتیێن سیاسی ئازاد بکەت و دووماهیێ ب سیاسەتا قەیوومان بینیت، چونکی هێشتا ژی کورد دو دلن و وەسا دبینن نیەتا دەولەتا تورکیا یا باش نینە.
ل گۆر باوەریا چاڤدێرێن سیاسی ئەردۆغان تنێ کەسە کو دشێت د رەوشا نها دا پرسا کوردی چارەسەر بکەت، هەروەسا پشتەڤانیا دەولەت باخچەلی ژی گەلەک گرنگە، ژ بەر ڤێ یەکێ ژی دڤێت بلەز هندەک کارێن گرنگ بهێنە کرن، پێدڤیە د زووترین دەم دا سەلاحەدین دەمیرتاش بهێتە ئازاد کرن و هەروەسا هەڤسەرۆکێن باژێرڤانییان ئەوێن کو بەری نها ژ بەر هندەک ئەگەرێن سیاسی ژ کارێن وان هاتینە دوورخستن دڤێت ڤەگەرنە ڤە سەر کارێن خوە، هەروەسا گرنگە کار بۆ ئامادەکرنا دستوورەکێ نوو ل تورکیا ژی بهێتە کرن و تێدا هەبوونا گەلێ کورد ب فەرمی بهێتە قەبوول کرن.
