هەوا هشیارییا ئافرەتان ژ نەخۆشیا پەنجەشێرا مەمكی دەست پێ كـر
دهۆك، لەزگین جۆقی:
هەوا هشیاریا ئافرەتان ژ نەخۆشیا پەنجەشێرا مەمكی دەست پێكریە، ب مەرەما هاندانا ئافرەتان بۆ ئەنجامدانا پشكنینێن پێشوەخت بۆ پەنجەشێرا مەمكی.
شلێر عەبدولرەحمان، بەرپرسا هۆبا كۆنترۆلا پەنجەشێرێ ل ساخلەمیا پارێزگەها دهۆكێ بۆ رۆژنامەیا ئەڤرۆ دیاركر كو وان ل گەل رێكخراو و خێرخواز و ئافرەتێن دهۆكێ كەمپینەك بۆ پتر هشیاریا ئافرەتان دانایە و گۆت: «ئەم د كەمپینێ دا شیرەتان ل ئافرەتا دكەین بچن پشكنینا پێشوەخت بۆ پەنجەشێرا مەمكی ئەنجام بدەن، ژ پەنجەشێرا مەمكی نەترسن، ئارمانجا مە ئەوە، خەلكێ مە پتر بهێتە پاراستن و چارەسەرییا پێشوەخت بۆ هەلگرێن نەخوشیێ بكەین، داكو زوو بهێتە كۆنترۆلكرن».
د. چەكدار ئەحمەد، رێڤەبەرێ نەخۆشخانەیا ئومید یا پەنجەشێری ل دهۆكێ بۆ ئەڤرۆ گۆت: «زێدەبوونا تۆماركرنا نەخۆشێن پەنجەشێری رامان ئەو نینە، نەخۆشی یا زێدە دبیت، بەلكو ئارمانج ئەوە باشتر خزمەتا وان بكەین، ل سالا 2010 حالەت دكێم بوون، ژ بەركو پشكنین و چارەسەری د كێم بوون، خەلكی ژی قەستا نوشدار و كلینیكان نەدكرن بۆ ئەنجامدانا پشكنینێن پێشوەخت، لێ نوكە رەوشەنبیریا خەلكێ مە گەلەك باشترە و خزمەتێن ساخلەمیێ ژی هەموو ل نەخۆشخانەیا ئومێد بۆ نەخۆشان بەردەستن».
