د گەڕا 12ێ دا چو یانەیێن كوردستانی سەركەفتن نە ئینا
ڕاپۆرت: قەیس وەیس:
ب دووماهی هاتنا یاریێن گەڕا 12ێ ژ خولا ستێرێن ئیراقێ یا فوتبۆلێ هیچ یانەیەكا كوردستانی سەركەفتن نە ئینا و پڕانییا وان ڕێزبەندیێن خوە د ناڤ لیستێ دا ژ دەستدان.
زاخۆ دەست ڤالا ڤەگەڕیا
تیما یانەیا زاخۆ دو خالێن گرنگ یێن سانەهی ژ دەستدان پشتی بەرانبەر خودانێن ئەردی یانەیا نەفت میسان بێی گۆل وەكهەڤ بووین، هەرچەندە د ماوەیێ هەردو نیڤان دا یاریزانێن زاخۆ كۆمەكا هێرشێن مەترسی ل سەر گۆلا مێڤاندار برن لێ بێی ئەنجام بوو بتنێ ئێك خال ل سەر ڕێزبەندییا خوە زێدەكر لێ پاشڤەچوو ڕێزا 14ێ ب 13 خالان، ژ سێ سەركەفتنان، چار وەكهەڤی و پێنج خوسارەتیان، ژلایێ خوەڤە نەفت میسان ژ ڕێزا 19ێ و بەری دووماهییێ پێشڤە هاتە ڕێزا 18ێ ب نەهـ خالان.
لدۆر یارییا زاخۆ تەلال ئەلبلۆشی ڕاهێنەرێ تیمێ دوباتی ل سەر هەبوونا ئاریشەیا نەبوونا یاریزانێ گۆلكەرێ تیمێ و گۆت: تیما مە ئاستەكێ باش نیشان دا و پتر گەهشتە گۆلا نەفت میسان لێ شۆتا دووماهییێ یا گۆلكرنێ نەبوو، هەروەسان هندەك یاریزانێن مە دناڤ یاریگەهێ دا ئەو ئاستێ پێدڤی ژێ بهێتە دیتن نیشان نەدا، ئەم گەلەگ باشتر بووین ژ خودانێن ئەردی و ژ هەژی وەكهەڤییێ نەبووین دڤیابا سێ خال یێن مە بان، لێ ئەڤە تەپاپێیی یە یێ مفایی دەلیڤەیەكێ وەربگریت دێ گۆلێ ئینیت، بۆ یاریزانێن مە دەلیڤە چێ دبوون لێ مفا ژێ نە وەردگرتن.
دهۆكێ ڕێزبەندییا خوە پاراست
تیما یانەیا دهۆكێ سەرەرایی خوسارەتییا خوە بەرانبەر یانەیا ئەلگەرمە خودانا سەرێ لیستێ لێ جهێ ل ڕێزا نەهێ پاراست ب كۆمكرنا 15 خال ڕێزا نەهێ ما و دبیت گوهۆڕین ژی پەیدابن كو ژ سەرجەمێ سێ سەركەفتن، شەش وەكهەڤی و دو خوسارەتی كو دبیتە تاقیكرنا دویێ یا ڕاهێنەرێ پارێزگەهێ سلێمان ڕەمەزان ئەوێ د تاقیكرنا ئێكێ دا ب5-2 سەركەفتن ل سەر كەربەلا ئینابوو.
وەكهەڤی د كلاسیكۆیان دا بەردەوامە
ژلایێ خوەڤە هەردو یانەیێن كوردستانی هەولێر و غاز ئەلشیمال ب گۆلەكێ وەكهەڤبوون د یارییا واندا یا كلاسیكۆیا كوردستانی ئەوا ل یاریگەها شەهید فرانسۆ حەریری هاتییە كرن، تیما پایتەختی زێدەتر پاشڤە چوو د ڕێزبەندیێ دا ل ڕێزا پێنجێ پاشڤە چوو ڕێزا حەفتێ و 19 خال كۆمكرینە ژ پێنج سەركەفتن، چار وەكهەڤی و سێ خوسارەتیان، ژلایێ خوەڤە غازئەلشیمال 15 خال كۆمكرین ب سێ سەركەفتن، شەش وەكهەڤی و سێ خوسارەتیان ل ڕێزا 11ێ دهێت.
نەورۆز یا ل پێشییا یانەیێن كوردستانی
تیما یانەیا نەورۆز بەردەوامە ل سەر ئاست و ئەنجامێن خوە یێن باش پشتی شیایی د یارییا ڤێ گەڕێ دا بەرانبەر یانەیا شورتە ل باژێرێ بەغدا ب گۆلەكێ وەكهەڤ بیت، ئەڤی ئەنجامی وەكر كو جهێ خوە ل ڕێزا سێیێ د ڕێزبەندیێ دا ب پارێزیت بكەتە 23 خال ژ شەش سەركەفتن، پێنج وەكهەڤی بتنێ ئێك خوسارەتی هەیە و نوكە ل پێشیێا هەموو یانەیێن كوردستانی بهێت.
لدۆر یارییا زاخۆ و نەفت میسان محەمەد غالب یاریزانێ تیما زاخۆ گۆت: هەستەكێ گەلەك نەخۆشە ئەم دەرباز دكەین هەتا نوكە مە نەشیایە ل ڕیزێن پێشیێ بهێن، سەرەرایی هێشتا دەلیڤەیا مایی، لێ ئەو ئەنجامێن بۆری ب گوڕەیی ئاستی ئەم هەموو یاریزان بەرپرسین ژ ئەنجامێن لاواز و دڤێت سنۆرەكی بۆ ژ دەستدانا خالان ب دانین، هەر یارییەكا دهێتە كرن ب سانەهی نینە، دبیت ژلایێ جەستەیی هندەك یاریزان هەنە د وەستیایی بن، لێ دڤێت باشتر خۆ كار بكەین بۆ یاریێن داهاتی.
شرۆڤەكارێ وەرزشی تێبینی هەنە
پشتی ب دووماهی هاتنا یاریێن گەڕا 12ێ بەسام ڕەئووف شرۆڤەكارێ وەرزشی د خولا ستێرێن ئیراقێ دا گۆت: ب شێوەیەكێ گشتی ئاستێ هەموو یانەیان نە ل دووڤ ئەوێ هیڤی خوازییا جەماوەرێ هەر یانەیەكێ یە، ڕاستە یانەیا ئەلگەرمە سەرێ لیستێ دهێت لێ نە تیمەكە كو دێ بەردەوامیێ دەتە سەركێشیێ، ژلایەكێ دووڤە یانەیێن دی تایبەت یێن جەماوەری وەكو، شورتە، زەورا، جەویە و تەلەبە ئەنجامێن وان و ئاست د باش نینن لدووڤ ئەوێ دیرۆكا هەی و ژ ڕێزبەنییا پێشیێ دووركەڤتینە، ئەڤە ژی چەند خالەكێن كێماسی دناڤا تیمێن وان دا دیاركرییە و هێشتا نەشیاینە چارەسەربكەن، لێ ژبەركو خال دناڤیەرا پرانییا یانەیان دا كێمن هەر سەركەفتنەك گوهۆڕینان دڕێزبەندییێ دا پەیدا دكەت.
لدۆر یانەیێن كوردستانی ژی گۆت: ب گشتی ئاستێ وان ناڤنجی یە، لێ یا سەرنجراكێش ئەو پێكهاتیێ تیما زاخۆ هەیی ب ناڤێن مەزن هێشتا ئەوا پێدڤی نیشان نەدایە، دبینم هەكە یاریزانەكێ گۆلكەر هەبیت دبیت گوهۆڕینێ بێخیتە ل سەر كاروانێ وان، چنكو گەلەك یارییان نێزیكی گۆلێ بووینە لێ هێرشبەرێ وان یێ ئۆزپاكی شیرۆزد نەشیایە گۆلێ بكەت، ژلایێ خوەڤە تیما دهۆكێ ب پێكهاتییەكێ باش هەیە تایبەت هێلا هێرشبرنێ و ئامارێن گۆلكرنێ ژی بەلگەیە، لێ دڤێت باشتر كار ل سەر تیمێ بهێتە كرن تایبەت ڕاهێنەری، ب گشتی شاشییێن هندەك ڕاهێنەر و یاریزانان بەردەوامن هەكە نە هێتە چارەسەركرن قەرەبوویا خالان دێ بزەحمەت كەڤیت، هەكە چارەسەر نەكەن ئێدی دێ كەڤنە ل بن ئاریشەیێن جەستەیی و دەرۆنی.
ژ ئەنجامێن یاریێن دی
مووسل 2-4 ئەلجولان
نەفت 1-چنە كارەبا
جەوییە چنە-چنە مینا
كەربەلا 2-2 تەلەبە
زەورا 2-چنە دیالا
كەرخ 1-2 ئەلغراف
هەلوەستێ گشتی پشتی یاریێن گەڕا 12ێ بڤی شێوەیی یە
1- ئەلگەرمە 27 خال.
2- نەفت 25 خال.
3- نەورۆز 23 خال.
4- زەورا 21 خال.
5- شورتە 21 خال.
6- ئەلجولان 20 خال.
7- هەولێر 19 خال.
8- مینا 16 خال.
9- دهۆك 15 خال.
10- غازئەلشیمال 15 خال.
11- تەلەبە 15 خال.
12- جەوییە 13 خال.
13- دیالا 13 خال.
14- زاخۆ 13 خال.
15- ئەلغراف 13 خال.
16- مووسل 12 خال.
17- كەرخ 12 خال.
18- نەفت میسان نەهـ خال.
19- كارەبا هەشت خال.
20- كەربەلا حەفت خال.
یاریێن گەڕا 13ێ دێ بۆ ماوەیێ چار رۆژان ڤەكێشیت
رۆژا پێنجشەمبی 5-11-2026
كارەبا -زاخۆ ، یاریگەها زەورا، ل دەمژمێر چارێ ئێڤاری
دیالا- مینا، یاریگەها دیالا، ل دەمژمێر 4:45 ئێڤاری.
مووسل- دهۆك، یاریگەها زاخۆ، ل دەمژمێر 6:30 مەغرەب.
یاریێن رۆژا ئەینی 6-11-2026
نەورۆز- كەربەلا، یاریگەها نەورۆز، ل دەمژمێر چارێ ئێڤاری.
تەلەبە- غازئەلشیمال، یاریگەها ئەلمەدینە، ل دەمژمێر 4:45 ئێڤاری.
ئەلگەرمە- نەفت میسان، یاریگەها ئەلجولان، دەمژمێر 6:30 مەغەرب.
یاریێن رۆژا شەمبیێ 7-11-2-2026
جەوییە- كەرخ، یاریگەها ئەلمەدینە، ل دەمژمێر چارێ ئێڤاری.
زەورا- ئەلجولان، یاریگەها زەورا، ل دەمژمێر 6:30 مەغەرەب.
یاریێن رۆژا ئێكشەمبیێ 8-11-2026
هەولێر- ئەلغراف، یاریگەها شەهید فرانسۆ حەریری، دەمژمێر 4:30 مەغەرب.
شورتە- نەفت، یاریگەها شورتە، ل دەمژمێر حەفتی شەڤ.
