د خرڤه‌بوونه‌كێ دا ل كواشێ دو كه‌س بريندار بوون

ئەڤرۆ: 

بەرپرسێ پەیوەندی و راگەھاندنا پۆلیسێن پارێزگەھا دھۆکێ رائیدێ مافپەروەر ھێمن سلێمان بۆ ئەڤرۆ دیارکر کو پشتی دوھی 9ى گۆلانا 2015ێ چەند کەسێن خودانێن کارگەھان رێ یا کواشێ گرتین ترۆمبێلەکا بارھەلگرا گازێ ھاتە د ناڤ کۆمەلگەھا کواشێ دا دا بچیتە وێستگەھێ کارەبێ وان نەھێلایە بچیت، ئەوێن ل ناڤ ترۆمبێلا گازێ ھاتنە خوارێ و شەر پەیدا بوو و سێ کەس بریندار بوون.
ژ لایەکێ دیڤە حەمزە رەزیکی بەرپرسێ راگەھاندنا رێڤەبەریا گشتی یا ساخلەمیا دھۆکێ بۆ ئەڤرۆ دیارکر کو برینداربوونا ڤان دو کەسان یا سڤکە و رەوشا وان یا ساخلەمیێ یا باشە.
ل رۆژا پێنج شەمبی جێگرێ پارێزگەرێ دھۆکێ بەھزاد عەلی ئادەم دیارکربوو کو بریار ھاتیە دان ب ئێکجاری بارزنینگەھێن کواشێ بھێنە داخستن و گازا رەش ب ئێکجاری ژێ بھێتە برین و نابیت ئێدی گازا رەش بگەھیتە کواشێ، گۆت ژی ئەو کارگەھێن بەری نوکە دەستووری بۆ ھاتیە دان کو کارێ وەکو بلۆک و ئیسفەنج و ھەر کارەکێ دیێَ دەستووری پێ وەرگرتی پێدڤیە کارێ خوە یێ دورست بکەن ئەوێ دەستووری پێ وەرگرتی و دماوێ حەفتیەکێ دا وان پارزنینگەھێن گازێ راکەن ئەگەر نە دێ ھێنە سزادان و دەستوورێن وان ھێنە ڤەکێشان.
بەھزاد عەلی ئادەم د کۆنگرەکێ رۆژنامەڤانی دا ھەروەسا دیارکر کو ل رۆژا 7ى گۆلانا 2015ێ کۆمبوونەک ب سەرپەرشتیا پارێزگەرێ دھۆکێ ل گەل لایەنێن ساخلەمی، ژینگەە، باژێرڤانی و قایمقامێ سێمێلێ ھاتە بەستن و پشتی گەنگەشەکا بەرفرەە ھاتیە کرن، دیار بوو کو پارزنینگەھێن گازێ ل کواشێ مەترسیەکا مەزنن ل سەر ساخلەمیا خەلکی و بووینە ئەگەرێ تێک دانا ژینگەھێ چ یا ئەسمانی وەکو ھەوا یان یا ئەردێ چاندنێ کو جۆکێن بەرمایکێن وان گەھەشتینە گوندێ گرێ گەورێ ئەڤە ژی کارتێکرنەکا خراب دکەتە سەر ئەردێ چاندنێ و ساخلەمیا خەلکێ و دبنە ئەگەرێ پەیدابوونا ئێشێن بھێن تەنگیێ و ئێشێن پەنجەشێرێ ژێ پەیدا دبن و گازێن میسان یا کوژەک و H2S ژێ پەیدا دبن.
ھەروەسا دیارکر کو نێزیکی ٣٥ کارگەە ھاتینە ڤەگوھاستن بۆ پارزنینگەھان و ئەڤە ھەموو دێ ھێنە گرتن و گازا رەش ب ئێکجاری ژێ ھێتە برین.

کۆمێنتا تە