مزگینیەک بۆ ئەوێن قەرزێن بچووک وەرگرتین و نەشێن بدەن
ئەڤرۆ:
رێڤەبەرێ گشتیێ قەرزێن بچووک ئاشکرا کر کو گەلەک وەلاتیان قەرزێن بچووک وەرگرتینە و ژبەر تێکچوونا کاودانێن دارایی ێن ھەرێما کوردستانێ، نوکە ئەو وەلاتی نەشێن ب دروستی قەرزێن خوە بدەن، لەوما حەفتیا بھێت دێ کۆمبوونەکێ ئەنجام دەن ب مەرەما دیتنا چارەکێ کو د بەرژوەندیا وەلاتیان دابیت و ببیتە بارسڤکرنەک ھەتا ئەڤ کاودانە دەرباز دبن.
ئارام ئەنوەر رێڤەبەرێ گشتیێ قەرزێن بچووک ل ھەرێما کوردستانێ بۆ رۆژناما ئەڤرۆ گۆت “ھندەک گەنجان پارە وەک قەرزێن بچووک وەرگرتینە و چووینە شەڕی و دو حالەت نوکە ھەنە کو خوبەخش بووینە و پارە وەرگرتینە و شەھید بووینە، ب نڤیسارا ئەنجوومەنێ وەزیران ھاتینە ئاگەھدارکرن کو ئەڤ کەس بھێتە ئازاکرن ژ ڤی پارەی”.
رێڤەبەرێ گشتیێ قەرزێن بچووک دیار کر ژی کو پێشمەرگەی قەرزێن بچووک وەرنەگرنینە، چونکی ئێک ژ مەرجێن دانا قەرزێن بچووک بۆ گەنجان دڤێت مووچەخۆر نەبیت و چ مووچە نەبن، ئەگەر پێشمەرگە بیت دڤێت پێرابوون ل گەل بھێتەکرن و ئەڤە زێدەگاڤیە ھاتیەکرن، چونکی بەری وەربگریت سۆزنامەک نڤسیە کو چ مووچە نینن و وەرناگریت و گۆت “ھەکە ببیتە پێشمەرگە دڤێت سەرەدانا فەرمانگەھا قەرزێن بچووک بکەت و ب رێکێن قانوونی سەردەری دێ ل گەل ھێتەکرن، ھەکە ھندەک ھەبن داخواز کربیت و بووینە پێشمەرگە و ھێشتا پارە نەوەرگرتیە دڤێت مە ئاگەھدار بکەت”.