جێگرێ سەرۆکێ پەرلەمانێ ھنگاریا: دێ پشتەڤانیا بڕیارا چارەنڤیسیا کوردان کەین
ئه‌ڤرۆ:
جێگرێ سەرۆکێ پەرلەمانێ ھنگاریا کۆمبوونەک بۆ رۆژنامەڤانێن وەلاتێ خوە سازکر و راگەھاند کو وەلاتێ وان دەستێوەردانێ د کاروبارێن چو وەلاتەکی دا نەکریە و گۆت: (ئەم رێزێ ل سەروەریا ھەر وەلاتەکی دگرن و ھەتا نھا مە ل سەر کاروبارێن ناڤخوە یێ چو وەلاتەکی ئاخڤتن نەکریە لێ دەمێ ئەم بەحسێ چارەنڤیسێ کوردان ژی دکەین ئەم ژ چو کەسەکی دەستوریێ وەرناگرین چونکو دێ کورد بخوە بریارێ ل سەر پاشەرۆا خوە بدەن و کورد بۆ پاشەرۆژا خوە چو بریارەکێ بدەن ئەم دێ پشتەڤانیێ لێ کەین).
تاماس شنایدەر جێگرێ سەرۆکێ پەرلەمانێ ھنگاریا پشتی کو ھندەک بەرپرسێن وەلاتێن عیراق، ئیران و بالیۆزێ تورکیا ل باژێرێ بوداپێست یێ پایتەختا ھنگاریا نەرازیبوونا ل سەر پشتەڤانیکرنا حوکمەتا وان بۆ ئاڤاکرنا دەولەتا سەربخۆ یا کوردستانێ ل عیراقێ نیشادان پرێس کۆنفرانسەک ل ئاڤاھیا پەرلەمانی سازکر و راگەھاند کو حوکمەت و گەلێ ھنگاریا ھەردەم پشتەڤانیێ ل مافێن گەلێن بندەست کرینە و گۆت: (ئەز جارەکا دی دوپات دکەم ھەر دەمێ کو گەلێ کورد بریارێ ل سەر پاشەرۆژا خوە بدەت و بریارا وان چ دبیت بلا ببیت ئەم دێ پشتەڤانیا وان بکەین و بۆ ڤێ چەندێ ژی بۆ مە نە گرنگە کی ژ ھەلویستێ مە نەرازی دبیت ژ بەر کو داخۆیانی و ھەلویستێ مە نە ل دژی چو وەلاتەکییە و نە ژی دەستێوەردانە د ناڤ کاروبارێن وەلاتەکی دی و پشتەڤانیا مە بۆ چارەنڤیسێ کوردان پەیوەندیا خوە ب کوردان ڤە ھەیە).
جێگرێ سەرۆکێ پەرلەمانێ ھنگاریا د پشکەکا دی یا ئاخڤتنا خوە دا ژی ل سەر پەیوەندیێن ل گەل ھەرێما کوردستانێ راگەھاند کو پەیوەندیێن وان ل گەل حوکمەتا کوردان د ئاستەکی بلند دایە و گۆت: (ئەڤ جارا دویێیە بەرێز بارزانی سەرەدانا وەلاتێ مە دکەت و ئەم ژ سەرەدانا وی کەیفخوش بووین و ب ئاشکرا ژی دبێژم ئەم دێ د وارێن سەربازی، ئابووری و وەبەرھینانێ دا ھەڤکاریا کوردان بکەین و ھەر داخوازیەکا کو ژ ئالیێ کوردان ڤە بھێت دێ ژ ئالیێ مە ڤە ب گرنگی بھێتە پێشوازی کرن، ژ بەر کو ئەو ملەتێ وێرەک و پێشمەرگەیێن وان یێن قارەمان د جھێ ھەموو جیھانێ دا شەرێ تیرۆرێ دکەن و د رەوشەکی وەسا دا نابیت ئەم کوردان ب تنێ بھێلین).
جێگرێ سەرۆکێ پەرلەمانێ ھنگاریا ھەروەسا دیار ژی کر کو گەلێ کورد نەتەوەکا ئاشتیخواز و دلسۆزێن دیمۆکراسیێ و پێکڤەژیانێ نە و گۆت: (ھەکە نەتەوا کورد بریارا دەولەتبوونێ وەربگریت بۆ مە و ھەر وەلاتەکی دی رێزگرتن و پشتەڤانی دمینیت و نابیت ئەم ڤی ملەتی د شەرێ ل دژی تیرۆرێ دا ب تنێ بھێلین و ئەم دێ وەک حوکمەتا ھنگاریا بەردەوامیێ بدەینە ھەڤکاریا بۆ کوردان و دڤێت ئەو وەلات و ئالیێن کو ژ ھەلویستێ مە نەرازینە دەستپێکێ بەرێ خوە بدەنە رۆژھەلاتا ناڤین و ھەم دیرۆکا نێزیک و ھەم ژی دیرۆکا دوور باش بینن و پاشی ھەلویستێ خوە رابگەھینن).
تاماس شنایدەر د بەردەوامیا ئاخڤتنا خوە دا راگەھاند ژی د رەوشا نھا دا ب دەھان کۆمپانیێن وان ل ھەرێما کوردستانێ کار دکەن و گۆت: (ژ کۆمپانیێن پەترۆلێ بگرن ھەتا کۆمپانیێن بازرگانی ب دەھان کۆمپانیێن مە ل ھەرێما کوردستانێ کار دکەن و رۆژ ب رۆژێ ژی پەیوەندیێن مە یێن سیاسی، ئابووری و سەربازی دێ ب ھێزتر ببن و ئەو یەک د بەرژەوەندا ھەردو ئالیان دایە و ئەز باوەر دکەم پشتی نەمانا تیرۆرستێن داغشێ ل دەڤەرێن نێزیکی ھەرێما کوردستانێ دێ ب دەھان کۆمپانیێن دی ژی بەرێ خوە بدەنە وێرێ و کار و چالاکیێن ئابووری و بازرگانی ئەنجام بدەن).
د دووماھیا ئاخڤتنا خوە دا ژی جێگرێ سەرۆکێ پەرلەمانێ ھنگاریا بێی کو ناڤێ چو وەلاتەکی ئانکۆ بەرپرسەکی بدەت دیار کر کو وان نە ل گەل کوردان و نە ژی ل گەل چو وەلاتەکی دی پەیمانەکی ڤەشارتی ئیمزا نەکرینە و گۆت: (ھەموو کریارێن حوکمەتا مە ئاشکرانە و ھەتا نھا مە ل گەل چو وەلاتەکی پەیمانەک ل دژی چ وەلاتەکی دی ئیمزا نەکریە، لێَ ئەم ئازادین د دروستکرنا ھەر پەیوەندیەکی دا و ل گەل ھەموو وەلاتێن جیھانێ ئەو پەیوەندی و پەیمان و ھەڤکاریێن مە یێن ل گەل کوردان ژی د ڤێ چارچۆڤێ داینە و دڤێت ھەرکەس و ئالیەک رێزێ ل بریار و ھەلویستێ مە بگریت و ئەم رژدین د پشتەڤانیا بریارا گەلێ کورد دا یا کۆ ل سەر چارەنڤیسێ خوە بدەن، ھەکە ئەو بریار بریارا دەولەتبوونێ یان ژی ھەر بریارەکا دی بیت).