کەمپینەک بۆ پارێزگەھبوونا زاخۆ دھێتە پێکئینان
ئه‌ڤرۆ:
کەمپینەک ل زاخۆ دھێتە دانان، ژبەر ئەدائا دامودەزگەھێن حوکمەتێ ل دەڤەرێ و پارێزگەهـ و جڤاتێ ب لاواز دزانن، ئەندام پەرلەمانە ژی بەربلاڤبوونا ھەلمەتا ل تۆرێن جڤاکی دا بەلاڤبووی ل سەر پارێزگەھبوونا زاخۆ ل گەل دانە، دبێژن ھەکە سەرنەگریت دێ کارتێن فشارێ ھێنە دروستکرن.
چیا حەمید شەریف رێکخەرێ کەمپینێ بۆ رۆژناما ئەڤرۆ دیارکر کەمپینەک ھاتیە پێکئینان بۆ داخوازا پارێزگەھبوونا زاخۆ گۆت: ژبەر گرنگی ب دەڤەرێ ناھێتە دان، پارێزگاری و ئەندامێن جڤاتا پارێزگەھێ ب چو گرنگی ب زاخۆ نەداینە، ئەدائا نوونەرێن دامودەزگەھێن حوکمەتێ لاوازن.
عەلی ھالۆ ئەندامێ پەرلەمانێ کوردستانێ بۆ ئەڤرۆ دیارکر ئەڤە ھەلمەتا نھو ل تۆرێن جڤاکی بەلاڤبووی دگەل داینە، مە پێ باشە، داخوازا مە ئەوە ھەکە پارێزگەھبوون سەر نەگریت، رێکێن قانوونی و مەدەنی بگەرینە بەڕ گۆت: بەری چەند رۆژەکان ل گەل سەرۆکێ پەرلەمانی روونشتین چ گریک نەدیتن، ھەلویستێ وی ژی ل گەل ھندێ دابوو زاخۆ بیتە پارێزگەهـ، لێ ھندەک رێکارێن قانوونی ھەنە، ل دووڤدا ژی حوکمەت پێگیرە پشتی بریار ژ پەرلەمانی دەردچیت پارێزگەھبوونا زاخۆ بجھبینت.
زاخۆ باژێرەکێ ھەڤسنوورە ل گەل وەلاتێن تورکیا و سووریا عێراقێ دا دو دەستکەفتێن گرنگێن بازرگانی و ئابووری ل زاخۆ ھەنە، ئەو ژی پارزینگەھا نەفتا تاوکێ، خالا سنووریا ئیبراھیم خەلیل تێدایە، ژمارا خەلکێ باژیری نێزیکی ٣٠٠ ھزار کەسایە، ل دووڤ ئامارێن دەزگەھێ شەھیدان نێزیکی سێ ھزار کەسان ل زاخۆ شەھید ھەنە، د شەڕێ دژی تیرۆرستێن داعش دا دەڤەرێ ٧٤ شەھید داینە.
شرین عەبدۆلرەحمان دینۆ ئەنداما لژنەیا ھەرێم و پارێزگەھا ل جڤاتا نوونەرێن عێراقێ بۆ ئەڤرۆ دیارکر ھەتا نھا حوکمەتا ھەرێمێ ب فەرمی ھەلویستێ خوە د جڤاتا نوونەرێن عێراقێ دا ل سەر پارێزگەھبوونا زاخۆ نیشا نەدایە، لەورا ھێشتا د ناڤ بەرنامەیێ پەرلەمانی دا نینە کار بۆ بکەن گۆت: ھەکە سەرۆکێ حەکمەتێ پشتەڤان بیت مینا یا حەلەبچە کار ل سەر بھێتە کرن، دێ مینن فشارێ دروست بکەین.
خەلیل مەحموود قائیمەقامێ قەزا زاخۆ دیارکر پێنگاڤێن دھێنە ھاڤێتن، دووماھی جڤینا مە ل گەل سەرۆکێ حوکمەتێ و ئەنجوومەنی دۆپاتی ھاتبوو کرن دامودەزگەھێن زاخۆ ببنە رێڤەبەری و د ھەمان دەم دا لژنەیەک بھێتە دروستکرن بۆ چاوانیا برێڤەبرنا وان گۆت: دیارە ھەتا نھا چ قانوون پێ دەرنەکەفتینە، لەورا نھا ژی وەکو قەزا ماینە.
عەلی ھالۆ ئاشکرا ژی کر پشتی سەرەدانا سەرۆکێ حوکمەتێ بۆ سەرۆکاتیا پەرلەمانی، لژنەیەک بۆ دووڤچوونا وان پرۆژە و بریار و پێشنیازان ھاتیە دانان، بو ھندێ چ ئیلتزاماتێن مەزن ل سەر حوکمەتێ دروست نەکەین ھالۆ گۆت: ب گۆتنا سەرۆکێ پەرلەمانی و حوکمەتێ چ رێگری نینن زاخۆ بیتە پارێزگەە و چاڤەرێ نە خواندنا دووێ بۆ بھێتە کرن، لێ ژڤانێ خواندنا دووێ ئاشکرا نەبوویە.
سەرۆکێ ھەرێمێ مەسعود بارزانی ل سالا ٢٠١١ ب نڤیسار داخواز ژ پەرلەمانی کوردستانێ کریە کو کار بو زاخۆ بکەن بیتە ئیدارەیا سەربخوە، گەھشتە وی ئاستی سەرۆکێ ئیتالیا پیرۆزبایی سەرخوەبوونێ ل زاخۆ کرن، لێ پشتی ھینگێ وەسا دەرنەچوو، نھۆ ئاخفتن ل سەر پارێزگەھبوونێ یە، خواندنا ئێکێ ژی بۆ ھاتیە کرن چیا حەمید شەریف گۆت: دێ چاڤەرێ سەرکردایەتیا کوردی کەین وێ مزگینیێ بدەنەمە، پاشی ژی حوکمەت ژی ریکارێن جێبەجێکرنێ رابیت.
ھەروەسا ھالۆ تەکەز ژی کر پشتی حەلەبچە زاخۆ باژێرێ ئێکێ یە ببیتە پارێزگەهـ، هه‌تا نھۆ چ باژێر وەکی زاخۆ ل بار نینن، ب ئەرد و ستراتیژی و رووبەرێ وێ ئیدارەکرنا وێ دێ بیتە پالپشت بۆ وەلاتێن دیتر، ژبەر ل سەر سنوورێ سێ وەلاتانە گۆت: چ رێگرێن قانوونی و جۆگرافی نینن، ھەموو مەرج ل خواندنا ئێکێ تێپەراندی یە، سەردەمێ ھۆشیاریێ یە لەورا دێ ب رێکێن قانوونی و مەدەنی کارتێن فشارێ ھێنە بکارئینان.