ھەکە ئەڤ پانزینا پیس ژی نەھێت دێ قەیران پەیدابیت
ئەڤرۆ:
ئەڤە ماوەیەکە ھەموو شۆفێرێن پارێزگەھا دھۆکێ گازندا ژ پانزینێ دکەن کو گەلەک یا پیسە و مالا دیلکۆیێن ترۆمبێلان دا رەخەکی و ھەر کەسێ ترومبێلێ ب ھاژووت ژ بەر ترترا دیلکۆی بێزار دبیت. بەرپرسێ کۆنترۆلا جۆری ل رێڤەبەریا بەلاڤکرنا بەرھەمێن سۆتەمەنیان ل پارێزگەھا دھۆکێ ژی راگەھاند کو ھەتا نھا پانزینا بۆ دھۆکێ دھات یا تورکی بوو، بەلێ بۆ دەمەکی ھاتیە راگرتن و ئەڤ پانزینا نھا ژی یا بازرگانیە و گۆت: ئەم دزانین کوالیتیا پانزینا نھا ل بازاری یا پاقژ نینە، بەلێ ھەکە ئەڤ پانزینە ژی ل بازاری نەمینیت دێ قەیرانا پانزینێ پەیدابیت.
کارۆژ دوسکی، شۆفێرەکێ ترۆمبێلێ یە دیار کر کو ئەڤە ماوەیەکە ھندی ئەو پانزینێ دکەتە ترۆمبێلا خوە یا پیسە و نەشێت پێ خوە ل سەر پانزینێ بدەت ژ بەر دەنگێ دیلکۆی و ئەڤە ژی ئاریشەکا مەزنە گشت شۆفێرێن پارێزگەھا دھۆکێ تووشبووینێ و گۆت: من پانزینا گەلەک پانزینخانا ژی تێست کر، بەلێ ھەموو وەکو ئێک دپیسن و مالا ترۆمبێلان دا رەخەکی و پێدڤیە حوکەت چاڤدێریێ ل سەر بکەت.
کارۆژی کو بۆ ماوێ چار دەمژمێران دەمێ خوە ل پیشەسازیا دھۆکێ بۆراند ژ بەر خراببوونا ترۆمبێلی دیار کر کو د سەر ھندێ ترۆمبێلا وی یا مۆدێل ٢٠١٤ یە، بەلێ خوە ل بەر پانزینا پیس نەگرت و ژ نیشکەکێ ڤە ترۆمبێلا وی ژ کارکەفت و پشتی گەھاندیە پیشەسازیێ، ئاشکرا بوو کو فیتپەمپێ وێ ژ کارکەفتیە و گۆت: مخابنە ترۆمبێلەکا مۆدێل نوو تووشی ڤی دەردی بیت.
فیتەر زانا ھەرکی ل پێشەسازیا دھۆکێ بۆ ئەڤرۆ دا زانین، پانزینا پیس گەلەک کارتێکرن ل سەر ترومبێلان ھەیە و رۆژانە نێزیک ٥ ترومبێلان دچنە دوکانا وی کو ژ ئەگەرێ پانزینا پیسن و گۆت: (٩٠% ژ خراب بوونا ترۆمبێلان ئەوێن دھێنە دەڤ مە بۆ چاککرنێ، ژ ئەگەرێ پانزینا پیسە).
دیار کر، پانزینا نوکە گەلەک یا پیسە و خرابتر بوویە ژ جاران و گۆت: د ڤێ ھەیڤێ دا من ٢٥ ماکینێن ژ کارکەفتی یێن ترومبێلێن مودێل نوو چێکرینە، ئەڤ پانزینا نوکە کاریگەریێ دکەت، ژبەر ڤێ پانزینا پیس من ماکینێن ھندەک ترومبێلان د حەفتیەکی دا دو جاران نووژەنکریە.
یوسف عەبدی شوفێرەک بوو کو ترومبێلا وی ژبەر پانزینا پیس ژ کارکەفتی بوو ل پیشەسازیێ گللەیی ژ حوکمەتێ و جھێن شولەژێ ھەبوون و گۆت: ئەڤ پانزینا ل پانزیخانان ھەی ل گەل ترومبێلێن مودێل نوو ناگونجیت، چونکو ئەڤ پانزینە ب فێل و تەشقەلا ئاڤ و گاز و پەترۆلا خام د ناڤ دایە.
سەلیم سەبری، بەرپرسێ کۆنترۆلا جۆری ل رێڤەبەریا بەلاڤکرنا بەرھەمێن سۆتەمەنیان ل پارێزگەھا دھۆکێ تایبەت بۆ ئەڤرۆ دیار کر، بەری نھا ئەو پانزینا بۆ دھۆکێ دھات ژ وەلاتێ تورکیا بوو و گەلەک یا پاقژ بوو، بەلێ ئەڤە ماوێ ١٥ رۆژانە ئەو جۆرێ پانزینێ ھاتیە راگرتن و نھا ئەڤ پانزینا ل بازاری ھەی ژ بلی یا تەکسی و کوستەران یا بازرگانیە و گۆت: ئەم دزانین ئەڤ پانزینە یا پیسە و کوالێتیا وێ وەکو یا تورکی یا باش نینە.
ناڤبری زێدەتر گۆت: ھەکە ئەڤ پانزینا بازرگانی ژی نەھێتە د ناڤ بازاری دا، دھۆک دێ تووشی قەیرانا پانزینێ بیت، چونکو ئەو پانزینا نھا ل بازاری ھەی دھێتە دەڤ مە بۆ پشکنینێ و پاشی دچیتە پانزیناخان بۆ بەلاڤکرن و بکارئینانێ و ئەم دزانین ژی کوالێتیا وێ یا باش نینە، بەلێ ناچاریە و پێدڤیە شۆفێر ژی ھاریکاربن و ترۆمبێلا خوە گەلەک بکارنەئینن ھەتا ئەڤ رەوشە ب دووماھی دھێت.
سەلیم سەبری ئاماژە دا وێ چەندێ کو پانزینا دھۆکێ نھا بازرگانیە و بازرگان ژ دەرڤەی دئینن، بەلێ یا ھەولێرێ پانزینا پارزینگەھا کەلەکێ یە، پانزینا تەکسی و کۆستەران ژی ئەوە یا حوکمەت ژ مەخمورێ دابین دکەت.
ل دور ئەگەرێ نەھاتنا پانزینا تورکی، بەرپرسێ کۆنترۆلا جۆری خویا کر کو پاپۆرا پانزینا تورکی زوو نەگەھشتیە و ل بەرە ل نێزیکترین دەم بگەھیت و ئەڤ ئاریشە چارەسەربیت و گۆت: رەنگە ھەتا دووماھیا ڤێ ھەیڤێ ئاریشا پانزینا پیس یا بەردەوام بیت.
دلشاد شەعبان غەفار، ئەندامێ لیژنا سامانێن سرۆشتی ل پەرلەمانێ کوردستانێ دیار کر کو وان ل بەرە سوباھی رۆژا دوشەمبی کۆمبوونەکێ ل دور خرابیا کوالێتیا پانزینێ ل پەرلەمانی سازبکەن و دێ دووڤچوونێ کەن ھەتا بزانن ژێدەرێ ڤێ پانزینا پیس ژ کیڤەیە و گۆت: ھەکە ئەڤ ئاریشە زوو نەھێتە چارەکرن، ل گەل گەرما ھاڤینێ دێ ھەموو ترۆمبێل ژکارکەڤن.
ئەمیر ئەترووشی بۆ رۆژناما ئه‌ڤرۆ به‌رهه‌ڤكريه