پارتی دەست ب بەرھەڤیێن سەرخستنا ھەلبژارتنێن سەرۆکاتیا ھەرێمێ دکەت
ئەڤرۆ نیوز:
بەرپرسێ دەزگەھێ ھەلبژارتنێن پارتی دیموکراتی کوردستان ئاشکراکر، کۆمسیۆنا ھەلبژارتنێن ھەرێما کوردستانی شیانێن ب رێڤەبرنا ھەلبژارتنێن ٢٠ی تەباخێ نینە و دیارکر، دەنگێن پارتی ھەکە زێدە نەکربن کێم نەکرینە و جەماوەرێ پارتی وەکی خوە مایە، ھەروەسا گۆت، ل دووڤ ھەر راپرسیەکێ، ھەکە ھەلبژارتن بھێنەکرن، سەرۆک بارزانی چو ھەڤڕک نینن بۆ بدەستڤەئینانا دەنگان.
خەسرۆ گۆران، بەرپرسێ دەزگەھێ ھەلبژاتنێن پارتی دیموکراتی کوردستان بۆ رۆژناما ئەڤرۆ گۆت” دوھی دەزگەھێ ھەلبژاتنێن پارتی دیموکراتی کوردستان کۆمبوونا خوە یا ئاسایی گرێدا و تێدا رەوشا نوکە یا ھەرێما کوردستانێ و ھەلبژارتنێن تورکیا ھاتنە بەحسکرن، ھەروەسا د کۆمبوونێ دا ب رژدی ل سەر فەرمانا سەرۆک بارزانی راوەستیاین بۆ ھەلبژاتنێن سەرۆکایەتیا ھەرێما کوردستانێ ھەکە بھێنەکرن، چونکی ئەم وەک دەزگەھێ ھەلبژارتن ھەر ژنوکە یێ خوە بەرھەڤ دکەین بۆ ھەر ھەلبژارتنەکێ ھەکە بھێتەکرن، ژ بەر کو ئەڤە دو سال ب سەر ھەلبژارتنێن ھەرێمێ ڤە دەربازبوون و دڤێت خوە بەرھەڤ بکەین، یان ھەکە راپرسی ل سەر دستووری بھێتەکرن، یان ژی ھەر ھەلبژارتنەکا ژنشکەکێڤە بھێتەکرن ئەم د بەرھەڤین”.
خسرۆی زێدەتر گوت” ئەم باوەرناکەین ل رۆژا ٢٠ تەباخێ ھەلبژارتنێن سەرۆکایەتیا ھەرێمێ بھێنەکرن، ژ بەر کو کۆمسیۆنا ھەلبژارتنان ل ھەرێمێ یا بەرھەڤ نینە ژلایێ پراکتیکی و دارایی و لۆجستی ڤە و شیانێن ب رێڤەبرنا ڤان ھەلبژارتنان نینن، ب کێمی ڤە ١٢٠ رۆژ پێدڤینە بۆ خوە بەرھەڤکرنێ، جارێ کۆمسیۆنا ھەلبژارتنان ل کوردستانێ ھەر نەشێت بکەت، چونکی یا ژ نوو یا ھاتیە دامەزراندن و تنێ ب ھەڤکاریا بەغدا دێ شێت ب رێڤەبەت”.
ل دۆر پێشبینیا رێژەیا دەنگێن پارتی، خەسرۆی گۆت” ھەلبژارتنێن پەرلەمانێ عیراقێ ھاتنەکرن و چو جۆداھیەکا وەسا ل گەل ھەلبژارتنێن پەرلەمانێ کوردستانێ نەبوون، ئەڤە دەربارەی دەنگێن پارتی، رێژەیا دەنگێن پارتی بۆ ھەردو پەرلەمانان نێزیکی ئێکبوو، چو گۆھۆڕین ب سەر دەنگێن پارتی دا نەھاتن، نوکە ژی ئەز پێشبینیێ دکەم پارتی ھەر جەماوەرێ خوە یێ مای و ھەکە دەنگێن پارتی زێدە نەکەن، ئەز د وێ باوەرێ دا نینم کو دەنگێن پارتی کێم بکەن ھەمبەرکرن ل گەل ھەلبژارتنێن بۆری”.
بەرپرسێ دەزگەھێ ھەلبژارتنێن پارتی دیارکر” دەربارەی سەرۆک مەسعود بارزانی، گورەی ھەموو راپرسیەکێ بارزانی کەسێ ھژمار ئێکە ل ھەرێما کوردستانێ و ھەر ھەلبژارتنەک بھێتەکرن، چو کەس پتری سەرۆک بارزانی دەنگان بدەستڤەنائینیت، ھەتا ھەکە سەرۆک بارزانی ٤٠%ێ یا دەنگان بینیت، یان ژی ٥٠%ێ بینیت، ھەر دێ سەرکەڤیت، چونکی چو کەسێن دی ناگەھنە ڤێ رێژا سەرۆکی ھەی، د ھەلبژارتنێن بۆری دا یێن سەرۆکاتیا ھەرێمێ، سەرۆک بارزانی ٧٠%ێ دەنگان ژ بدەستڤەئینان، بەلێ ھەردو حزب پارتی و ئێکەتی پێکڤەبوون، ھەکە ڤێ جارێ جودا پشکداربن، بێگومان ڤێ رێژێ بدەستڤە نائینیت، بەلێ ل گەل ڤێ چەندێ ژی ئەز باوەرناکەم چو کەسەکی ھندی سەرۆک بارزانی دەنگ ھەبن”.
سەرۆکێ ھەرێما کوردستانێ مەسعود بارزانی، ل دووڤ قانوونا سەرۆکاتیا ھەرێما کوردستانێ یا ھژمار (١) ل سالا ٢٠٠٥ ێ یا راستڤەکری، بریار دابوو ل رۆژا ٢٠ تەباخا ٢٠١٥ ێ ھەلبژارتنێن گشتی بۆ پۆستێ سەرۆکێ ھەرێما کوردستانێ بھێنە ئەنجامدان.