یێ سڤکاتیێ ب ئاینەکی بکەت، دێ پێنچ سالان ھێتە زێندانکرن
ئەڤرۆ نیوز:
سەرۆکێ لژنا ئەوقافێ ل پەرلەمانێ کوردستانێ بۆ ئەڤرۆ دیارکر کو، ل گۆر پرۆژەکێ قانوونی یێ نوو، ھەر کەسەکێ سڤکاتیێ ب ئاینەکی بکەت، دێ ب توندی ھێتە سزادان و گۆت: پشتی گەنگەشە ل سەر پرۆژەیێ رێزگرتن ل ئاینان دھێتەگرتن، دێ لژنا ئەوقافێ راپورتا خوە بەرھەڤکەت، داکو ل پەرلەمانی بھێتە پەسەندکرن.
د. سیراج خەیلانێ سەرۆکێ لژنا ئەوقافی پەرلەمانێ کوردستانێ دیارکر کو، پرۆژەیێ قانوونا رێزگرتنێ ل ھەموو ئاین ونەتەوەیان یێ د قوناغێن گەنگەشێ دایە، و لژنا ئەوقافێ راپورتا خوە ل سەر پرۆژەی ئامادەکریە و دێ بۆ سەرۆکاتیا پەرلەمانێ ھێتە بلندکرن داکو بکەڤیتە د بەرنامێ پەرلەمانێ دا و بھێتە پەسەندکرن و گۆت: ل گۆرەی ڤێ قانوونێ دێ وەلاتی وەکھەڤ رێزگرتنێ ل ھەموو ئاینان گرن، چونکو ھەرێما کوردستانێ نە وەکو وەلاتێ سعودیێ یە کو ب تنێ ئاینەکێ تێدا ھەیە، بەلکو ھەرێما کوردستانێ یا ھەمەرەنگە و ژ گەلەک ئاین ونەتەوەیان پێکدئێت، مینا ئیزدی و مەسیحی و سائیبی و کاکەیێ و جولەکان و…ھتد، کو پێدڤیە ھەموو پێکڤە بژین و ژیانا وان ل کوردستانێ خورتر لێ بھێت، و ئایین نەبیتە ئەگەری دووبارەکیێ د ناڤ وەلاتیان دا.
د. سیراج خەیلانێ، سەرۆکێ لژنا ئەوقافێ ل پەرلەمانێ کوردستانێ زێدەتر گۆت: د ڤی پرۆژەیێ قانوونی دا ھاتیە کو ھەر کەسێ ئیھانەیا ئاینەکێ ئانکو سڤکاتیێ پێ بکەت، دێ سالەکێ ھەتا پێنچ سالان ھێتە زیندانکرن، ھەردیسا سزادانا غورامەکرنێ ب پارەی ژی تێدا ھەیە، ئەوژی ب پێنچ ملیون دیناران، ناڤھاتی گۆتژی، دێ بزاڤێ کەین ب زووترین دەم ئەڤ پرۆژە بھێتە پەسەندکرن.
