بۆ جه‌ژنێ دێ لێبۆرين بۆ زيندانيان هه‌بيت؟
ئه‌ڤرۆ نيوز:
ئەندامەکێ لژنا مافێن مرۆڤی ل پەرلەمانێ کوردستانێ دیارکر کو لژنەکا ھەڤپشک بۆ لێبۆرینا گشتی بۆ زیندانیان ھاتیە پێک ئینان، بەلێ ھێشتا چو بڕیار نەداینە کو د ئەڤ سالە دا لێبۆرینا گشتی ھەبیت، لەوڕا بۆ ڤێ جەژنێ لێبۆرین ناھێتە دەرکرن.
ئومێد حەمە عەلی ئەندامێ لژنا مافێن مرۆڤی ل پەرلەمانێ کوردستانێ بۆ ئەڤرۆ دیارکر کو ل پەرلەمانێ کوردستانێ پڕۆژە بۆ لێبۆرینا گشتی ھاتینە پێشکێش کرن، بەردەوام لژنێن پەرلەمانی بەحسێ پرسا لێبۆرینا گشتی کریە، بەری نوکە ژی لژنا مافێن مرۆڤی ل گەل لژنێن ناڤخۆ و قانوونی، حوکمەت و لایەنێن پەیوەندیدار گازی کرینە پەرلەمانی، داکو رێکەفتن بۆ لیبۆرینا گشتی ل ھەرێما کوردستانێ بھێتە کرن.
ئومێد حەمە عەلی ھەروەسا دیارکر کو گەھشتینە وێ چەندێ لژنەکا ھەڤپشک ژ سێ لژنێن پەرلەمانی بھێتە پێک ئینان، بەلێ ھێشتا ڤێ لژنێ کارێن خوە تمام نەکرینە، گۆت ژی لژنا مافێن مرۆڤی یا رژدە کو ئەڤ لژنا ھەڤپشک ل دەمەکێ زوو کارێن خوە تمام بکەت و زانیاریێن دروست ل دۆر پرسا لێبۆرینا گشتی بدەتە خویا کرن.
وی پەرلەمانتاری گۆت ژی ھەتا نوکە چو بڕیار نەھاتینە دان بۆ جەژنا بھێت ژی بۆ دەرکرنا لێبۆرینا گشتی و ئازاد کرنا ھندەک زیندانیان، ئەم ل لژنا مافێن مرۆڤی ل گەل ھەبوونا لێبۆرینا گشتی بووین، بەلێ ب مەرجەکی دووڤچوونا زێدەتر بھێتە کرن، زانیاریێن پتر بھێنە کۆمکرن دگەل ھەبوونا ڤان مەرجێن پێدڤیە د لێبۆرینا گشتی دا ھەبن، کو ب چو شێوەیەکی قانوون نەھێتە بنپێکرن و مافێن مرۆڤی ژی بھێنە پاراستن ل سەر ئەڤی ئەساسی ئەم د گەل داینە لێبۆرینا گشتی بھێتە دەرکرن.