سه‌رۆكێ فراكسيۆنا يه‌كگرتوو دێ هێته لادان
ئه‌ڤرۆ نيوز، نيوار محه‌مه‌د سه‌ليم:
ژێده‌ره‌كى ژ ناڤا يه‌كگرتوو ئيسلامى كوردستان تايبه‌ت بۆ ئه‌ڤرۆ نيوز راگه‌هاند كو ژ به‌ر ئه‌و ره‌فتارا سه‌رۆكێ فراكسيۆنا يه‌كگرتوو كرى دێ ژ پۆستێ وى هێته لادان.
ئه‌ڤى ژێده‌رى ئه‌ڤرۆ نيوز پاراستن ل سه‌ر ناڤێ وى كرى گۆت: “ژ به‌ر ئه‌و پێگرينه‌كرنا سه‌رۆكێ فراكسيۆنا يه‌كگرتوو ئيسلامى كوردستان ل په‌رله‌مانێ كوردستانێ، دێ ژ كارێ وى هێته لادان و كه‌سه‌كێ دى ل جهێ وى هێته دانان”.
زێده‌تر گۆت: “ل رۆژا 23ى خزيرانێ هه‌لويستێ يه‌كگرتوو يێ ئاشكه‌را بوو كو ل گه‌ل سازانا لايه‌نێن سياسى بوو، به‌لێ ئه‌وى دژى ڤێ بڕيارێ كار كريه و په‌رله‌مانتارێن يه‌كگرتوو هان داينه كو ده‌نگى ژ بوو خواندنا ئێكێ يا پرۆژێ قانوونا سه‌رۆكاتيا هه‌رێما كوردستانێ بده‌ن”.
ل رۆژا 23ى خزيرانا ب ئاماده‌بوونا قونسلێ ئيرانێ ل په‌رله‌مانێ كوردستانێ هه‌ر چار لايه‌نێن سياسى “گۆڕان، ئێكه‌تى، كۆمه‌ل و يه‌كگرتوو” ب كۆمكرنا 57 ده‌نگان خواندنا ئێكێ بۆ پرۆژێ قانوونا راستڤه‌كرنا قانوونا سه‌رۆكاتيا هه‌رێمێ كر، هه‌كه د ڤێ كۆمبوونێ دا ئه‌ندامێن فراكسيۆنا يه‌كگرتوو ئاماده نه‌ببان روونشتنا په‌رله‌مانى برێڤه نه‌دچوو.