بارزانى دێ ل گه‌ل نوونه‌رێن كورد يێن ل به‌غدا كۆم بيت
ئه‌ڤرۆ نيوز:
ئه‌ندامه‌كا جڤاتا نوونه‌رێن عيراقێ راگه‌هاند كو بڕياره د ماوێ داهاتى دا، سه‌رۆكێ هه‌رێما كوردستانێ ل گه‌ل فراكسيۆنێن كوردى يێن ل به‌غدا كۆم ببيت، به‌لێ هه‌تا نوكه ژڤان كۆمبوونێ نه‌هاتيه دياركرن.
د. ئه‌شواق جاف، ئه‌نداما جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان بۆ مالپه‌رێ فه‌رميێ پارتى ديموكراتى كوردستان راگه‌هاند: بڕيار بوو ل هه‌يڤا گۆلانێ مه‌سعود بارزانى سه‌رۆكێ هه‌رێما كوردستانێ ل گه‌ل فراكسيۆنێن كودى ل به‌غدا كۆم ببيت، به‌لێ ژ به‌ر كۆمبوونا جڤاتا نوونه‌ران و سه‌ره‌دانا سه‌رۆكێ هه‌رێمێ بۆ ژ ده‌رڤه‌يى وه‌لاتى، كۆمبوون نه‌هاته ئه‌نجام دان، پاشان بڕيار هاته دان سه‌رۆكێ هه‌رێمێ ل هه‌يڤا خزيرانێ ل گه‌ل فراكسيۆنێن كوردى كۆم بيت، به‌لێ ژ به‌ر گه‌شتا ژماره‌كا ئه‌ندامێن جڤاتا نوونه‌ران بۆ ژ ده‌رڤه‌يى وه‌لاتى كۆمبوون نه‌هاته ئه‌نجام دان.
زێده‌تر گۆت: “دهێته چاڤه‌رێكرن د ماوێ داهاتى دا، سه‌رۆكێ هه‌رێما كوردستانێ ل گه‌ل فراكسيۆنێن كوردى يێن جڤاتا نوونه‌رێن عيراقێ كۆم بيت، به‌لێ هه‌تا نوكه ژڤانێ كۆمبوونێ نه‌هاتيه دياركرن”.