عەفرین ل دژی تیرۆرستێن ئەلنوسرە کەڤتە د ئامادە باشیێ دا
ئەڤرۆ نیوز:
کانتۆنا عەفرینێ پشتی ئەنجامدانا ھەلبژارتنێن باژێرڤانیان ل ھەمبەر ھەر ھێرشەکا ئەلنوسرە و ھەڤالبەندێن وێ کەڤتە د ناڤ ئامادە باشیێ دا و سەرۆک وەزیرا کانتۆنێ راگەھاند کو ھەکە ئەلنوسرە و چەتەیێن ل گەل وێ دا دەستان ژ دۆرپێچکرنا عەفرینێ بەرنەدەن ئەو دێ ب رەنگەکی دژوار سەرەدەریێ ل گەل وان بکەن و ناھێلن تیرۆرستێن ئەلنوسرە زیانێ بگەھیننە خەلکێ عەفرینێ.
ل ئالیێ دی شەرڤان کورداخ فەرماندارێ یەکینەیێن پاراستنا گەل ل عەفرینێ د داخویانیەکی دا بۆ رۆژناما ئەڤرۆ راگەھاند کو تیرۆرستێن ئەلنوسرە و گرۆپێ شام و ھژمارەک کۆمێن چەتە یێن ل گەل وان ئەڤ حەفتیەکە ل دەڤەرێن نێزیکی سنۆرێ عەفرینێ بزاڤێن خوە بەرفرەە کرینە و دخوازن دۆرپێچا ئابووری بێخنە سەر خەلکێ ھەرێمێ و گۆت: (رێکخستنێن تیرۆرست ھەر سال د دەمێ نێزیکبوونا کۆمکرنا بەرھەمێن چاندنێیە دا ھەموو رێیێن کو دھێنە عەفرینێ دۆرپێچ دکەن و دخوازن د وارێ ئابووری دا زیانێ بگەھیننە خەلکێ مە، لێ ڤێجارێ ئەم ب چو رەنگەکی دۆرپێچا ڤان چەتەیان قەبوول ناکەین و بۆ شکاندنا دۆرپێچا وان ئەم دێ رێیێن پاراستنێ و ڤالا دەرخستنا دۆرپێچێ بدەینە پێشیا خوە و ب رەنگەکی دژوار بەرسڤا دۆرپێچا تیرۆرستان دەین).
شەرڤان کورداخ فەرماندارێن YPG ھەروەسا دیار ژی کر کو ئەو بەردەوام ل گەل کانتۆنا جزیرێ و کۆبانێ د ناڤ پەیوەندیان دانە و ژ ئەڤرۆ پێڤە ھەم بۆ ئازادکرنا جەرابلوس و عەزازێ ھەم ژی بۆ شکاندنا دۆرپێچێن سەر ھەر سێ کانتۆنان دێ پێکڤە کار کەن و گۆت: (ئەم ب ئاشکرا دبێژین ھەتا جەرابلوس و عەزاز ب تەمامی نەھێنە ئازادکرن ئێمناھیا رۆژئاڤایێ کوردستانێ جێگر نابیت و مەترسیێن ل سەر کانتۆنان ژ ھۆلێ رانابن، بۆ ڤێ چەندێ ژی د دەمەکی نێزیک دا ئەم دێ ھەوا شکاندنا دۆرپێچا ئابووری و ئازادکرنا ھەردو باژێرکێن عەزاز و جەرابلوسێ دەین و ھێزا مە بۆ ئازادکرنا ڤان ھەردو باژێرکان د ئامادە باشیێ دانە).
ل ئالیێ دی چاڤدێرەکێ سیاسی ژ عەفرینێ راگەھاند کو دەولەتا تورکیا دۆرپێچەکا توند یا ئابووری دانیە سەر رۆژئاڤایێ کوردستانێ و کۆمێن تیرۆرستێن یێن وەک داعش، ئەلنوسرە و ھەڤالبەنێن وان ژی ل گەل تورکیا جھێن خوە د دۆرپێچا ئابووری یا عەفرینێ و ھەموو رۆژئاڤا دا دگرن و گۆت: (ل عەفرینێ ھندەک پێرابوونێن مەزن یێن ئابووری، ئێمناھیێ و پاراستنێ ھاتینە وەرگرتن و ئەم دێ ب رەنگەکی دژوار بەرسڤا دۆرپێچا ئابووری دەین و ھەکە پێدڤی کر بۆ دەرخستنا وان کۆمێن تیرۆریست ئەم دێ د وارێ سەربازی دا ژی دەست ب کارێن پێدڤی کەین).
ھەر د ڤێ مژارێ دا ئەنوەر موسلم سەرۆک وەزیرێ کانتۆنا کۆبانێ ژی راگەھاند کو نھا دەست ب ژ نوو ڤە ئاڤاکرنا کانتۆنێ کرینە و گۆت: (خەباتێن مە د سێ وارێ سەرەکی دا ب بەرفرەھی برێڤە دچن و یا یەکێ ژ نوو ڤە ئاڤاکرنا کانتۆنێیە و د قۆناغا نھا دا پرانیا پرۆژێ ژ نوو ڤە ئاڤاکرنێ تەمام بوویە، و یا دویێ باشکرنا رەوشا ئابووری و ژیانا خەلکێ ھەرێمێیە و بۆ ڤێ چەندێ ژی ب پشتەڤانیا باژێرڤانیێن باکور و دەولەمەندێن کورد یێن ل دەرڤەیێ وەلات و ھژمارەکا وەلاتێن ئورۆپا پرۆژێن پێشخستنا ئابووری ھاتینە دەستپێکرن، و خەباتا مە یا سێیێ ژی ب ھێزکرنا ھێزا لەشکەرییە کو د ڤی واری دا YPG ب تەمامی سنۆرێن کانتۆنێ ئازادکرینە و ھێلا پاراستنێ دروست کریە و ناڤەندێن پەروەردەکرنا ھێزێن سەربازی دروست کرینە و ھێلا پاراستنێ بھێز کرینە کو ئارمانجا مە د دەمەکی نێزیک دا ئازادکرنا جەرابلوس و عەزازێیە و دەمێ ئەڤ ھەردو باژێرک ھاتنە ئازادکرن دێ مەترسیا ل سەر کانتۆنا مە و ھەموو رۆژئاڤا ژی کێمتر بیت).
