پەرتۆکەکا ھتلەری دێ چیتە د پرۆگرامێن خواندنێ دا
ئەڤرۆ نیوز، ئەیاد بەرواری:
پشتی 70 سالێن قەدەغەکرنێ، ئەلمانیا بریاردا دوبارە پەرتۆکا ھتلەری (خەباتا من) چاب ببیت و بچیتە د پرۆگرامێ خواندنێ یێ قوتابیان دا کو تێدا کومێنت ل سەر ھزرێن وی ھەبن، یێن بووینە ئەگەرێ ھەلبوونا شەڕێ جیھانیێ دویێ و کوشتنا ملیۆنا مرۆڤان.
وەزیرا فێرکرنێ ل ئەلمانیا (یوھانا فانکا) د داخۆیانیەکێ دا بۆ رۆژناما (باساور نویە بریسە) یا ئەلمانی ل 24 ڤێ مەھێ کو ژلایێ ئاژانسا ئەنادۆل ڤە ھاتیە ڤەگوھاستن، دبێژیت” کارەکێ فەرە چاپا ھەڤپێچ کری ب کومێنتان ژ پەرتۆکا (خەباتا من) یا سەرکردێ نازی ل قوتابخانان بھێتە خواندن ژبۆ ھوشیاریا قوتابیان ل ئەلمانیا ل سەر ئاخڤتنێن ھتلەری”.
گوت ژی” ئەو چاپا رەخنێ ل پەرتۆکا (خەباتا من) دگریت، کو دێ ژ ئەنستیتیۆتا میونیخ بۆ ڤەکۆلینێن دیرۆکا ھەڤچەرخ ھێتە چاپکرن، بزاڤەکە بۆ کوورکرنا رەوشەنبیریا سیاسی و یا دارێشتی یە کو بۆ ھەموویان یا رۆھن بیت”.
فانکایێ گوت ژی” پێدڤیە ئاخڤتنێن ھتلەری بێ نەرازیبوون نەمینن” ئاماژە دا ” ئەڤ بابەتە دێ رووبەرەکێ مەزن د دەزگەھێن راگەھاندنێ دا د حەفتیێن داھاتی دا گریت و دێ قوتابیان پرسیار ل سەر ھەبن د وانێن قوتابخانێ دا”.
مافێن پاراستنا مولکیەتا پەرتۆکا (خەباتا من) یا ھتلەری، دێ ل دەستپێکا سالا 2016 ب دووماھی ھێت، وی مافی ژی ڕێ ب دوبارە چاپکرنا وێ پەرتۆکێ ل ئەلمانیا دگرت.
ئەڤ پەرتۆکە ژلایێ ھتلەری ڤە ل دەمێ یێ زیندانکری ل کەلھا (لاندسبێرگ) پشتی بزاڤەکا کودەتایێ یا سەرنەکەفتی ل 1923، د ناڤبەرا سالێن 1924 – 1926 ێ ھاتبوو نڤیسین و تێدا بۆچوونێن خوە دیار دکەت کو ددوڤدا بوونە ھێڤێنی سیاسەتا وی و ھەتا سالا 1940 نێزیکی 12 ملیۆن دانە ژێ ھاتبوونە چاپکرن.
بریار ئەوە ل قۆناغا ئێکێ چار ھزار دانە ژ وێ پەرتۆکێ بھێنە چاپکرن و بھایێ ئێک دانا پەرتۆکێ دێ 95 یورۆ بن.
دیرۆکنڤیسێ ئەلمانی ( کیلیر ھۆڤ) یێ بەرنیاس ب ڤەکۆلینێن خوە ل دۆر قۆناغا حوکمڕانیا نازی ل ئەلمانیا، دبێژیت” چاپکرنا شرۆڤەکرنا زانستێ بۆ وێ پەرتۆکێ، پێنگاڤەکا ئەرێنی یە، بەلێ د ھەمان دەم دا یا درەنگە”.
گوت ژی” بەلاڤکرنا ڤێ پەرتۆکێ دێ راستیان ل وێ قۆناغێ بەرچاڤکەت و درەوێن ھتلەری ژی ئاشکراکەت”.
خویاکر ژی” چو پێزانینێن دروست د وێ پەرتۆکێ دا نینن و رێزکێن وێ ھەموو دۆژمنکاری یە”.
ویلایەتێن ئەلمانی ژی یا خوە بەرھەڤکری بۆ قەدەغەکرنا چاپکرن و بەلاڤکرنا ڤێ پەرتۆکێ و بلندکرنا سکالایان ل سەر دەزگەھێن بەلاڤکرنێ ئەوێن دێ کارێ بەلاڤکرنا وێ پەرتۆکێ کەن ل دووڤ مادێ 130 ژ قانوونا جەزائی یا ئەلمانی کو بەحسێ سزادانا ھەر کەسەکێ ھاندانا پرسێن نەژادی و تایفی و ئایینی دکەت.