جڤاتا پارێزگه‌ها دهۆكێ ئه‌ڤ جۆرێ قومارێ قه‌ده‌غه‌كر
ئه‌ڤرۆ نيوز، نيوار محه‌مه‌د سه‌ليم:
جڤاتا پارێزگه‌ها دهۆكێ ئه‌ڤرۆ 28/12/2015 د كۆمبوونا خوه یا 59ێ دا ب پرانیا ده‌نگان بریار دا كو هۆلێن یاریا كینویێ ل دهۆكێ بهێنه گرتن و دێ ب نڤیسار ئاراسته‌ی كارگێریا پارێزگه‌ها دهۆكێ كه‌ن، زێده‌باری كو د كۆمبوونێ دا گه‌نگه‌شه ل سه‌ر سكرتێرێ جڤاتێ هاته كرن و لیژنا ئه‌وقافێ و كاروبارێن ئایینی راپۆرتا خوه ل سه‌ر چه‌وانیا چوونا حه‌ج و عومرێ پێشكێش كر.
ل ده‌ستپێكا كۆمبوونێ سه‌رۆكێ لیژنا ئه‌وقافێ و كاروبارێن ئایینی راپۆرتا خوه ل سه‌ر حه‌ج و عومرێ خواند و گه‌نگه‌شه ژ ئالیێ ئه‌ندامان ڤه ل سه‌ر هاته‌كرن و فه‌هیم عه‌بدولا حه‌مۆ سه‌رۆكێ جڤاتا پارێزگه‌ها دهۆكێ پێشنیار كر كو راپۆرته‌ك بهێته به‌رهه‌ڤكرن و پاشی پرۆژه‌یاسایه‌ك بۆ په‌رله‌مانێ كوردستانێ بهێته ئاراسته‌كرن. پشتی هینگێ گه‌نگه‌شه ل سه‌ر پرسا یاریا كینویێ و قومارێن دی هاته كرن و ژ به‌ر كو ئه‌ڤ جۆرێن قومارێ گرێداینه ب هنده‌ك كۆمپانی و نڤسینگه‌هێن بیانی ڤه و دبیته ئه‌گه‌رێ ده‌رێخستنا كۆژمه‌كێ مه‌زن یێ پارێ هه‌رێمێ بۆ ژده‌رڤه و ئه‌ڤه زه‌ره‌رێ دگه‌هینته ئابوورێ نه‌ته‌وه‌یی و ژلایێ جڤاكی ڤه خه‌لكێ تووشی ڤان جۆره یاریا بووی زه‌ره‌رێن مه‌زن گه‌هشتینێ و دبیته ئه‌گه‌رێ په‌یدابوونا چه‌ندین ئالۆزی و ئاریشێن جڤاكی، هه‌روه‌سا ژلایێ یاسا یا سزایێن عیراقی ڤه و تایبه‌ت مادێ (389) كو به‌حسێ قومارێ كریه و سزا دیار كرینه، پرانیا ئه‌ندامان د گه‌نگه‌شێ دا ل گه‌ل بوون كو بهێته گرتن، له‌ورا جڤاتا پارێزگه‌ها دهۆكێ ب پرانیا ده‌نگان بریار دا كو هۆلێن یاریا كینویێ ل دهۆكێ بهێنه گرتن و رێكخستنه‌ك بۆ یاریێن دی مینا لوتویێ بهێته كرن، كو بریاره د كۆمبوونا بهێت دا گه‌نگه‌شه ل سه‌ر بهێته كرن و بهێته ئێكلاكرن.
هه‌روه‌سا د كۆمبوونێ دا گه‌نگه‌شه ل سه‌ر پۆستێ سكرتێرێ جڤاتێ هاته كرن كو بریاره ل گۆر رێكه‌فتنا پارتی دیمۆكراتی كوردستان و یه‌كگرتووی ئیسلامی كوردستان پۆستێ بریارده‌رێ جڤاتێ ب ناڤێ سكرتێرێ جڤاتێ بده‌نه یه‌كگرتووی ئیسلامی.