ڤی وەلاتی بەرھەڤیا خوە بۆ دابینکرنا مووچێ پێشمەرگەی نیشان دا
ئەڤرۆ نیوز:
ژێدەرەکێ باوەرپێکری یێ ویلایەتێن ئێکگرتیا ئەمریکی راگەھاند، ھژمارەکا ئەندامێن کونگریسێ ئەمریکی ب ھەڤکاری د گەل وەزارەتا پێشمەرگەی، کاری ژبۆ دابینکرنا مووچێ پتر ژ 35 ھەزار ئەندمێن ھێزێن پێشمەرگەی دکەن.
ل گۆڕ پێزانینێن ھاتینە بەلاڤکرن د ژمارا دووماھیا رۆژناما (باس) یا حەفتیانە دا، ویلایەتێن ئێکگرتیا ئەمریکی بەرھەڤیا خوە بۆ دابینکرنا مووچێ پێشمەرگەی و بۆدجا 35 ھەزار ئەندامێن ھێزێن پێشمەرگەی دیارکریە، ب مەرجەکێ ئەو ھەموو کەسێن مفادار ب ھاریکاریا ئەمریکی ل سەر ب وەزارەتا پێشمەرگەێ ھەرێما کوردستانێ ڤە بن.
ژێدەرێ ھایدار ھەروەسا دیارکر، حوکمەتا ھەرێما کوردستانێ داخوازا پشتەڤانیەکا مەزنتر ژ ئەمریکا کریە و کومبوونێن ل سەر ڤی بابەتی ھێشتا دناڤبەرا ھەردو ئالیان دا دبەردەوامن.
جەبار یاوەر ل دۆر ڤی باەتی گۆت: ھەتا نوکە ئالیێ ئەمریکی یێن پشکدار د کومبوونان دا ھەموو داخوازیێن ھەرێما کوردستانێ کومکرینە و دێ بۆ کونگرێسێ ئەمریکی ھێنە ڤەگوھاستن و ھەردەمێ بڕیار ل سەر ھاتە وەرگرتن ئێکسەر ئەو داخوازی دێ ھێنە بجھئینان.
ژئالیەکێ دیڤە ئەندامێ لژنا پێشمەرگەی ل پەرلەمانێ ھەرێما کوردستانێ دلێر موستەفای گۆت: ھەموو بزاڤ ژ ئالیێ ئەمریکی و ھەرێما کوردستانێ بۆ دابینکرنا مووچێ پێشمەرگەی دھێنە کرن، بەلێ ھێشتا ئەو کێشە ب شێوەکێ فەرمی نە ھاتیە بنەجھکرن و کا چەوا ئەو پشتەڤانی دێ بۆ ھێزێن پێشمەرگەی د حەفتیا بھێت دا ھێنە کرن.
