فرەنسا داخواز ژ بریتانیا دکەت ھێزێن سەربازی رەوانەی لیبیا بکەن
ئەڤرۆ نیوز:
ل گۆر راپۆرتەکا ئاژانسا رویتەرز یا نووچەیان فرانسوا ھۆلاند سەرۆکێ فرەنسا دو رۆژ بەری نھا د پەیوەندیەکا تەلەفونی دا ل گەل سەرۆک وەزیرێن بریتانیا داخواز ژێ کریە کو ھەر دو وەلات ھێزێن سەربازی ل چەندین دەڤەرێن ستراتیژی ل لیبیا بنەجە بکەن دا کو نەھێلن داعش ل لیبیایێ ب ھێز کەڤیت، چونکو داعش رۆژ ب رۆژ دەڤەرێن نوو ل لیبیایێ دکەتە ژێر کۆنترۆلا خوە و ئەو یەک دشێت مەترسیەکا راستەوخوە بۆ ئورۆپا دروست دکەت.
د بەردەوامیا راپۆرتێ دا ھاتیە دیار کرن کو کامیرۆنی دیار کریە ئەو جارێ ھزرا ھنارتا چو ھێزێن سەربازی بۆ لیبیایێ ناکەن و بریتانیا نھا دڤێت ھندەک ھێزێن خوە بۆ مەرەما پەروەردەکرنا ھێزێن سەربازی رەوانەی وەلاتێ تونس بکەت. لێ جارێ د بەرنامێ بریتانیا دا نینە کو چو ھێزێن سەربازی رەوانەی لیبیایێ بکەت.
د راپۆرتێ دا ئەو یەک ھاتیە دیار کرن کو دەمەکە فرەنسا پێکولان دکەت دا کو بشێت ھندەک وەلاتێن دی یێن ئورۆپا ژی رازی کەت دا ئەو پێکڤە ھێزێن سەربازی رەوانەی لیبیایێ بکەن، چونکو داعش دشێت ل لیبیایێ مەترسیەکا راستەوخوە ل سەر فرەنسا و گەلەک وەلاتێن دی یێن ئورۆپا دروست کەت، لێ پرانیا سەرکردێن ئورۆپا دیار دکەن کو فرەنسا ژ بەر بەرژەوەندیێن خوە و گرێبەستێن پەترۆلێ ل گەل حوکمەتا لیبیا بزاڤەکا وەسا دکەت و ژ بەر ھندێ ژی ھەتا نھا چو وەلاتێن ئورۆپا پشتەڤانیێ ل ڤێ بزاڤا فرەنسا ناکەن و چاڤدێرێن سیاسی ژی دیار دکەن کو بھێزبوونا داعشێ ل لیبیا دشێت مەترسیەکا گەلەک مەزن ل سەر ئورۆپا دروست کەت و ژ بەر ھندێ ژی دڤێت وەلاتێن ئورۆپا ھزرا ھندێ بکەن.
