بریتانیا: داعش بەرھەڤیان بۆ ھێرشێن مەزن ل ئورۆپا دکەت
ئەڤرۆ نيوز:
ل گۆر راپۆرتەکا رۆژناما تایمز یا بریتانی بەرپرسێن ھەوالگیریا وی وەلاتی ھۆشداری داینە ھەموو وەلاتێن ئورۆپا کو رێکخراوا تیرۆرستی یا داعشێ بەرھەڤیێن مەزن کرینە کو چالاکیێن وەک یێن بەری نھا ل پاریسێ کری ل چەندین باژێرێن مەزنێن ئورۆپا بکەن و ژ بەر ھندێ ژی داخواز ژ حوکمەت و ئالیێن پەیوەندیدار ل ئورۆپا کرینە کو دەست ب پێرابوونێن پێدڤی بکەن دا تیرۆرست نەشێن چالاکیێن وەسا بکەن.
د بەردەوامیا راپۆرتێ دا ھاتیە دیار کرن کو داعش ژ شێوەیێ ژیان و کەلتورێ ئورۆپا توورەیە و نەڤێت ئەو یەک کارتێکرنا خوە ل وەلاتێن موسولمانان بکەت و ژ بەر ھندێ ژی بەرھەڤیان بۆ چالاکیێن تیرۆرستی یێن مەزن ل ئورۆپا دکەن و ھندەک کەسێن کو ل گەل پەنابەران بەرێ خو داینە ئورۆپا ژی پەیوەندی ل گەل داعشێ ھەنە و رەنگە ئەو ژی د ھاریکار بن بۆ ئەنجامدانا چالاکیێن تیرۆرستی.
د دووماھیا راپۆرتێ دا ھاتیە دیار کرن کو چەندین کەسێن ھشکباوەر د ماوەیێ بۆری ل ھندەک وەلاتێن ئورۆپا ھاتینە گرتن و وان کەسان دانپێدان ب بەرنامە و چالاکیێن تیرۆرستی یێن داعشێ ل ئورۆپا کرینە و دەزگەھێن ھەوالگیریا بریتانی ژی ل دۆر وێ یەکی شیاینە زانیاریێن راست و دروست بدەستڤە بینن.
