رۆژانە کەلوپەل بۆ رۆژئاڤایێ کوردستانێ دھێنە ھنارتن
ئەڤرۆ نیوز:
بەرپرسێ بادەکا رۆژئاڤایێ کوردستانێ ل سەرۆکاتیا ھەرێمێ ئاشکرا کر، پەکەکە رێکێ نادەت چو ھێزەکا دی یا کوردی بچیتە رۆژئاڤایێ کوردستانێ و بەڕەڤانیێ ژ خاکا خوە بکەت و دبێژیت: دەریێ سێمالکا ھاتیە ڤەکرن و رۆژانە کەلوپەلێن پێدڤی دگەھنە رۆژئاڤایێ کوردستانێ.
دکتۆر حەمید دەربەندی، بەرپرسێ بادەکا رۆژئاڤایێ کوردستانێ ل سەرۆکایەتیا ھەرێما کوردستانێ بۆ رۆژناما ئەڤرۆ گۆت: “چەندین جاران سەرۆکاتیا ھەرێما کوردستانێ بزاڤ کرینە ھێزا رۆژ یا کوردێن رۆژئاڤایێ کوردستانێ کو ژ لایێ ھەرێما کوردستانێ ڤە مەشق و راھێنان پێ ھاتینەکرن و ھاتینە بەرھەڤکرن بۆ شەڕی ڤەگەرنە رۆژئاڤایێ کوردستانێ، بەلێ ژ لایێ پارتا کرێکارێن کوردستانێ ڤە (پەکەکە) رێگری ل ئەڤێ ھێزێ دھێتەکرن، ھەرچەندە ل رێکەفتنێن ھەولێر و دھۆکێ بزاڤێن زۆر ھاتینە کرن ھەموو ھێز پشکدار بن د پاراستنا رۆژئاڤایێ کوردستانێ دا، لێ مخابن ھەتا نوکە پەکەکە و ھێزێن نێزیکی وێ ل دۆر ڤێ چەندێ رازی نەبووینە”.
ل دۆر ھاتنوچوونا د ناڤبەرا ھەرێم و رۆژئاڤایێکوردستانێ دا دکتۆر حەمید دەربەندی گۆت: “ژ لایێ پیادە و ھاتنوچوونا گشتی ڤە نوکە و بەری نوکە ژی ئاریشە ھەبووینە، نوکە دەریێ سێمالکا یێ ڤەکریە بۆ گەھاندنا پێدڤیێن وەلاتیان، رۆژانە دەرمان و خوارن و کەلوپەلێن پێدڤی بێ وەرگرتنا باجێ دچنە رۆژئاڤایێ کوردستانێ”.
ناڤھاتی گۆتژی: “ژ لایێ ھاتنوچوونێ ڤە ھەتا نوکە ئاستەنگ ھەنە و ژ لایێ رۆژئاڤا ڤە رێگری ل خەلکی دھێتەکرن، بۆ ھەر ھاریکاریەکێ ژی ئەم وەکو ھەرێما کوردستانێ د بەرھەڤین بۆ رۆژئاڤایێ کوردستانێ پێشکێش بکەین”.