جڤاتا پارێزگه‌ها نه‌ينه‌وا دێ ڤان داخوازيان ژ عه‌بادى كه‌ت
ئه‌ڤرۆ نيوز:
كۆمبوونا جڤاتا پارێزگه‌ها مووسل ب ئاماده‌بوونا پاريزگه‌هارێ نه‌ينه‌وا و سه‌رۆك و ئه‌ندامێن جڤاتێ ئه‌ڤرۆ سپێدێ برێڤه‌چوو و بڕيار هاته دان كو چه‌ند راسپارده‌يه‌كا وه‌كو داخوازى سوبه‌هى بده‌نه ده‌ست سه‌رۆك وه‌زيرێن عيراقێ.
هنارتيێ ئه‌ڤرۆ نيوز ل ئه‌لقۆش ره‌وان نهێلى بۆ گۆت: “سپێده‌هيا ئه‌ڤرۆ رۆژا ئێكشه‌مبى كۆمبوونا جڤاتا پارێزگه‌ها نه‌ينه‌وا ب ئاماده‌بوونا پارێزگارێ وێ نوفه‌ل حه‌مادى و سه‌رۆك و ئه‌ندامێن جڤاتێ هاته كرن”.
زێده‌تر گۆت: “د وێ كۆمبوونێ دا بڕيار هاته دان چه‌ند راسپارده بهێنه به‌رهه‌ڤكرن و سوبه‌هى د روونشتنا خوه دا ل گه‌ل سه‌رۆك وه‌زيرێن عيراقێ حه‌يده‌ر عه‌بادى بگه‌هيننه ده‌ستى”.
دا زانين ژى كو گرنگترين ئه‌و راسپارده ژى ئه‌ون كو هه‌ردو باژێركێن شرگات و حه‌وێجه زوو بهێنه رزگاركرن دا كو ده‌ما وه‌لاتيێن ناڤا مووسل ئاواره دبن ل كه‌مپان ل وێرێ بهێنه ئاكنجيكرن، ديسا كانێ پشتى رزگاركرنا وى باژێرى ژ لايێ ئه‌منى ڤه دێ كى و چاوان ب رێڤه به‌ن.
ديسا ژى بزاڤ بهێته كرن ئاڤاهيێن حكومى ل شنگال ژ ده‌ستێن حزبان بهێنه ده‌ر دا كو رێڤه‌به‌ريێن حكومى بشێن كارێن خوه تێڤه ئه‌نجام بده‌ن، پشتى كه‌فتنا باژێرێ مووسل ژى بڕيار هاتبوو دان هه‌موو ئه‌و كه‌سێن سه‌ر ب وه‌زاره‌تا ناڤخۆ يا عيراقێ ڤه پێدڤيه ل په‌يوه‌نديێ ب سه‌ربازگه‌ها دوبه‌ردان بكه‌ن هه‌كه دێ ژ كارێ وان هێنه لادان، جڤاتێ خواستيه كو لێبۆرينا گشتى بۆ وان كه‌سان بهێته دان يێن په‌يوه‌ندى ب وێ سه‌ربازگه‌هێ نه‌كرى ب گۆره‌ى گۆتنێن ره‌وان نهێلى.
