ئهڤین و ژیانهكا ب كهربوكین
خودێ چ رێگری ل عهشقا رهگهزێ بهرامبهر نه گرتینه، ئانكو كور و كچ حهز ژ ههڤدو بكهن و ئهڤ بۆیهره د ههبوونا مرۆڤان دا یا ههیی و دێ ههر ههبیت، ب راستی ههكه ژیان پرتووكهك بیت پێدڤیه ناڤهرۆكا وێ ڤیان بیت، لێ ههكه لدووڤ قانوونێن ئیسلامێ بن، دێ سهركهڤتن پتر یا مسۆگهر بیت، كورد دبێژن: چ دار نینن بای لێ نهدای، لێ مخابن هندهك دار یێن ههین بایێ عهشقێ خوه رهێت وان یێن د ئهردی دا سستكرین، مهرهم پێ هندهك عاشق وهسا یێن ژ عهشق و ژیانێ تێر بووین، وهكی چ ژ تاما ژیانێ نزانن پێخهمهت عهشقا ژ دهست دای! د ڤی وهلاتێ نها ئهم تێدا دژین ” كوردستان” پیرۆزی ب نهێنی ڤه دهێنه كرن و نهباشی ژی ب ئاشكرایی و پهسنهڤهد هێنه كرن، عهشق یا پیرۆزه و روحا ژیانێ یه، لێ ل سهر بنهمایێن راست و مهرهم پێ پێكئینانا خێزانهكێ، بهلێ ب راستی پتریا عهشقا نها ئهم دبینین و دكهین دهمبۆراندنه، ههكه یا راست بیت ژی هزار بهكو كولاڤێ خوه دههلاڤێژن. ل ڤێرێ پهیامهك بۆ عاشق و دایك و باب و حوكمهتێ:
ژ بۆ عاشقان: ئهزێ پشتراستم چوونا ههر كهسهكی د ژیانا مرۆڤی دا، نه رامان ئهوه ژیان مر و ئێدی خۆشی و ئهڤین نابیت! ئهم ملهتهكێ بوسلمانین پێدڤی یه مه باوهری ب خودێ ههبیت، ئهوا بۆ مه دیاركری و ئهوا كریه قسمهت، من گهلهك چیرۆكێن عهشقێ گوهـ لێ بووینه د ڤی ژیوارێ نها ئهم تێدا، برادهكی دنیاسم عاشقێ كچهكێ یه دیسا كچ ژی ئهڤیندارا وی یه و گهلهك بزاڤێن داین ژبۆ گههشتن بۆ ههڤ، لێ ههتا نها خودێ حهز نهكریه، وهكی ڤی برادهری دبینم گهلهك یێ پهریشان و وهكی بهری سالهكێ نینه زهوقهكێ كێم ژبۆ ژیانێ ههیه، ژ بهر عهشقا خوه ههتا رادهكی بێ هیڤی بوویه ژ ژیانێ كو رهنگه كارتێكرنهكا نێگهتیڤ یا ل سهر هاتیه كرن پشتی چهندین بزاڤێن وی ل گهل مالباتا كچێ دبێ ڤهرێژ بووینه و ژبهر كو ئهم د جڤاكهك گرتی دا دژین كچ ژی نهشێت چ ههڤركیێ ل گهل مالا خوه بكهت، لێ ل ڤێرێ پشتراستم كو ههكه ئهڤ گهنجه وهكی بهری سالهكێ خوه ئارام بكهت و ژ بۆ گههشتنا ئارمانجان ببزڤیت ژیان بێ وێ كچێ نه راوهستیایه، دیسا بێی ڤی كوری ژی ژیانا كچێ نه راوهستایه، ئهڤجا پێدڤیه عاشق گهلهك جاران ل گهل خوه بپهیڤن ژمێریاریهكێ د ژیانا خوه دا بكهن و ژیان نه یا پێدڤی ببێ هیڤیانه.
پهیامهك بۆ دایك و بابان: كور دهمێ سنێله پێدڤی یه باب هایداری بیت و وهك ههڤالهكی بیت د گهلدا، بابهتان بۆ شرۆڤهكهت مینا كو بهحسا عهشقێ بكهت چاوا كور دێ عاشقێ كچهكێ بیت كهنگی دێ عاشق بیت دێ چاوا عهشقێ برێڤهبهت، ههكه نهگههشتم یا من دڤێت چاوا دێ سهرهدهریێ ل گهل ڤێ بۆیهرا خوه كهم، كو ب راستی بۆیهرێن عهشقێ ددژوارن ههروهكی پهندهكا كوردی ههی دبژیت “عهشق ب دار و بهرا نه كهڤیت” بێگومان هندهك كهس یێن ههیین ههكه شكهستن د عهشقا خوه دا ئینا ههكه ب باشی سهرهدهریێ ل گهل خوه نهكهت دێ بهر ب خهمۆكیێ و دللاوازیێ ڤه چیت! دیسا بو دایكان ژی دڤێت دایك وهك مامۆستایهك بیت ل گهل كچا خوه، وانێن ژیانێ بۆ رۆهن بكهت و سهرهاتیان بۆ بێژیت، لێ یا ههستیار نابیت دایك ل دووڤ دلۆڤانیا خوه و كچا خوه بیت ژبهر كو گهلهك جاران و د گهلهك كاران دا دلۆڤانی مالوێرانیه ژبهركو بریارێن مه ژی باشترن ژ یێن دلی.!
ژبۆ حوكمهتێ: هندی من ل بیره ئهڤهیه پهیڤا بهربژێرێن مه یێن حوكمهتێ “ئهز دێ هایداری تهخا گهنجان بم و دێ پتر خزمهتێ كهم و دێ وهلاتی ئاڤهدان كهم” باوهرم سهدان گهنج نها ههنه و د ئامادهنه ژیهكێ گونجایدانه ژ بۆ پێكئینانا خێزانێ، بهلێ ژ بهر نهبوونا ئالاڤێن ژیانێ و بێ هیڤیا وان ژ حوكمهتێ هیڤیا وان مایه ههلاویستی، ئهز باوهرم ئهگهر حوكمهتا ههرێمێ ههتا رادهكێ كێم ژی هاریكاریا گهنجان بكهت ژ بۆ پێكئینانا خێزانێ دێ وهلات ژ ئالیهكی ڤه ئاڤهدان بیت ههرچهنده وهكی دهێته گۆتن كو قهیرانه! بهلێ ب راستی و دادپهروهری بیت قهیرانا سیاسیه حهتا زارۆ ژی دزانن نه قهیرانا دارایی یان ئابووری یه، ئهڤجا مه هیڤی ژ وان هێژایێن كو دا وهلاتی ئاڤهدان كهن و هاریكاریا گهنجان كهن بلا فهرموون!
