ئەندامەکێ کۆمسیۆنا ھەلبژارتنێن عێراقێ نهێنيا نه‌دانا پۆستێ سه‌رۆكێ كۆمسيۆنێ ب كورده‌كى ئاشكه‌را دكه‌ت
ئەڤرۆ نیوز:
ئەندامەکێ دەستەیا کۆمسیۆنا سەربخوەیا ھەلبژارتنێن عێراقێ ئاماژە بوێ چەندێ دکەت، کو بڕیارە ھەیڤا نیسانا داھاتی کۆمسیۆنا ھەلبژارتنان بھێتە گازیکرن بۆ پەرلەمانێ عێراقێ و لێپرسین ل گەلدا بھێتەکرن، ھەروەسا دیارکر، ھەیڤا ئیلوونا داھاتی دێ کۆمسیۆن ھێتە ھەلوەشاندن و ستافەکێ نوو دێ ھێتە دانان ژلایێ پەرلەمانی ڤە، بەلێ ڤێجارێ سەرۆکێ کۆمسیۆنێ نادەنە کوردان و دێ کەسەکێ عەرەب ھێتە دانان، چونکە ل بەغدا وەکی مێھڤان بەرێ خوە دەنە مە کوردان.
سیروان ئەحمەد، ئەندامێ جڤاتا کۆمسیۆنا ھەلبژارتنێن عێراقێ بۆ رۆژناما ئەڤرۆ گۆت ” ئەم وەک کۆمسیۆنا بلندا سەربخۆیا ھەلبژارتنێن عێراقێ بەرھەڤین بچینە ھەمبەر پەرلەمانی بۆ لێپرسینێ، چونکە ئەگەر لێپرسین بھێتەکرن پتر ژلایێ ھونەریە نەک تشتەکێ دی، مە چو پەیوەندی ب گەندەلیێ ڤە نینە، بەلێ تنێ ھندەک رێکارێن ھەلبژارتنان یێن ھەی لەوانەیە خەلکەک تێنەگەھیت دێ رۆھنکرنێ لسەردەین و بڕیارە ھەیڤا نیسانا داھاتی کۆمسیۆن بھێتە گازیکرن بۆ پەرلەمانێ عێراقێ، ھەیڤا ئیلوونا داھاتی دێ دەمێ قانوونیێ کۆمسیۆنا عێراقێ تەمامبیت وی دەمی پەرلەمان یێ ئازادە چاوا کۆمسیۆنێ پێک بینە، چونکە ئەم وەک ستافێ کۆمسیۆنێ 9 کەسین دوو کەس کوردن دو عەرەبێن سونە و چوارژی شیعەنە ژبلی سەرۆکێ کۆمسیۆنێ، ئەڤێن شیعە نێزیکی بالێ سەدرو ھەڤپەیمانیا شیعەنە، ئەڤ گۆت گۆتکێن تێنە بەلافکرن لسەر کۆمسیۆنێ دەمێ دبێژن کەفتینە بن کاریگەریا نووری مالیکی چو راستی بۆنینە، ئەم ھەموو ئالیەکی پشتڕاست دکەین چو راستی بۆ نینە، ئەگەر بێژن ئەم سەر ب حزبێن کوردینە ھێشتا باشترە.
چەند ھەلبژارتنەک مە ئەنجامداینە و ب سەرکەفتی پڕۆسە رێڤەچوویە چو لایەنەکی گازندە ل کارێ کۆمیسۆنێ نەبوویە، خێرە پشتی ھەلبژارتنان نوکە خەلکەک دبێژن کۆمسیۆن یا بێلایەن نینە د ھەلبژارتناندا، ھەتا ئێک لایەنێ سیاسی گازندە ل ئەنجامێن ھەلبژارتنێن بۆری نەبوویە و ب چو شێوەیەکی دەستکاری دەنگا نەھاتیەکرن، نوکە ئەم یێ نێزیکی ھەلبژارتنان دبین رەخنا ل کۆمسیۆنێ دگرن، ئەڤەژی خویایە مەرەمێن خوە ھەنە، بەلێ دێ قانوونا ھەلبژارتنێن عێراقێ ھێنە راستڤەکرن، تنێ پەرلەمان دزانیت دێ چاوا ھێتە راستڤەکرن، دڤێت نونەرێن کورد ل بەغدا ھەلویست ھەبیت لدۆر راستڤەکرنێ، ھەر بڕیارە مە دەرکربیت ژلایێ کۆمسیۆنێ ڤە بێلایەنی ھاتیە دەرکرن و د بەرژەوەندیا ھەموو لایەکی دا بوویە، ددەمێ دۆبارە ھەلبژارتنا کۆمسیۆنا سەربخۆیا ھەلبژارتنان باوەرناکەم جارەکادی سەرۆکێ کۆمسیۆنێ بەر کوردا بکەڤیت، ژبەرکو ھەردەم ل بەغدا وەکی مێڤان بەرێ خوە دەنەمە کوردا، لەوڕا ئەز یێ رەشبینم ڤێجارێ عەرەب سەرۆکێ کۆمسیۆنا نادەنە کوردا و دێ کەسەکێ دی ھێتە دانان.
