د. ئەشواق جاف: ھژمارەکا بەرچاڤا وەلاتیێن ھەرێمێ د ناڤا حەشدا شەعبی دا ھاتینە تۆمارکرن
ئه‌ڤرۆ نيوز:
نونەرەکا کورد لپەرلەمانێ عیراقێ ئاماژە بوێ چەندێ دکەت، دوڤچوون بۆ تۆمارکرنا ناڤێن وەلاتیێن ھەرێما کوردستانێ بۆ رێزێن حەشدا شەعبی ھاتیەکرن و دەرکەفتیە ل سنورێن پارێزگەھێن ھەلەبجە و سلێمانیێ و کەرکووک و خانەقین ھژمارەکا بەرچاڤا وەلاتیان بۆ ناف رێزێن حەشدا شەعبی ھاتینە تۆمارکرن و دیارکر، مەرەم ژ راکێشانا وەلاتیێن کورد بۆ ناف حەشدا شەعبی تنێ مەرەم تێکدانا رەوشا ھەرێما کوردستانێ یە ژلایێ بەغدا ڤە.
د.ئەشواق جاف، پەرلەمانتارا پارتی ل پەرلەمانێ عیراقێ بۆ رۆژناما ئەڤرۆ گۆت” تۆمارکرنا خەلکێ ھەرێما کوردستانێ بۆ ناڤا رێزێن حەشدا شەعبی ژلایێ دستووری و قانوونی ڤە قەدەغەیە و بۆ چو کەس و لایەنەکێ نافخوە و دەرەکی نینە، دەست بۆ ئەڤێ پرسێ ببەت، ھەرکەس و لایەنەک ژی پشکداربیت د پڕۆسا راکێشانا وەلاتیێن ھەرێمێ بۆ ناڤا حەشدا شەعبی ئەڤە دێ لێپرسین ل گەل ھێتەکرن، پێدڤیە رێو جھێن قانوونی ھەمبەر بھێنە وەرگرتن، ژبەرکو دستوور و قانوونێ تنێ رێکدایە ھێزێن پێشمەرگە و ئاسایشێ ل ھەرێما کوردستانێ ھەبن و ھێزێن فەرمینە، ئەم وەکی فڕاکسیۆنا پارتی ژی ب ھەموو شێوەیەکی تۆمارکرنا وەلاتیێن کورد بۆ حەشدا شەعبی رەت دکەین و دێ دوڤچوونێن تمام ژی بۆھێتە کرن، نەبتنێ لنافخوەیا ھەرێما کوردستانێ بەلکۆ ل دەڤەرێن کوردستانیێن دەرڤەی ئیدارەیا ھەرێما کوردستانێ ژی.
د.ئەشواقێ ھەروەسا گۆت: مە زانیاری ھەنە و دوڤچوون بۆھاتیەکرن ل سنورێن سلێمانی و ھەلەبجە و کەرکووک و خانەقین بسەدان گەنجێن کورد بۆ حەشدا شەعبی ھاتینە تۆمارکرن، بەلێ ھژمارا دروست ناھێتە زانینن چەندە، مخابن ئەڤەژی جھێ داخێ یە خەلکەک ھەبیت ل ھەرێما کوردستانێ رێکێ بدەتە خوە دژی ھەرێما کوردستانێ پەیوەندیێ ب بەغداڤە بکەت و ببیتە چەکدارێ عیراقێ، چونکو ژبلی ھێزا پێشمەرگەی ئەم چو ھێزێن دی بفەرمی نوزانین، ھندەک کەس و لایەنێن عیراقی تنێ مەرەما وانا ئەڤە نافمالا کوردا بھێتە تێکدان و تۆمارکرنا وەلاتیێن کوردژی بۆ رێزێن حەشدا شەعبی تنێ مەرەم ژێ ئەڤە، ئەگەر بەغدا ھندە د خەما وەلاتیێن ھەرێما کوردستانێ دایە بکەتە خوەدی موچە ئایا بۆچی موچێ ھێزێن پێشمەرگەی نادەت ئەڤە سێ سالە شەڕێ داعش دکەن، بەلێ یا خویایە مەرەما ھندەک سەرکردێن عیراقێ چیە ھەمبەر ھەرێما کوردستانێ.
