ناڤەندا قوتابیان ل زانکۆیا دھۆک ئەڤرۆ دێ ھێتە ڤەکرن
ئەڤرۆ، رەمەزان رێکانی:
زانکۆیا دھۆک ئەڤرۆ 18\11\2014 دێ ناڤەندا قوتابیان ل کەمپێ زانکۆیێ د رێ و رەسمەکی ب ئامادەبوونا مامۆستا و قوتابیێن زانکۆیێ ھێتە ڤەکرن.
رێڤەبەرێ ناڤەندا قوتابیان ل زانکۆیا دھۆک د. خەلیل مستەفا بۆ رۆژناما ئەڤرۆ دیارکر کو مەرەم ژ ڤەکرنا ڤێ ناڤەندێ پێشخستنا شیانێن ھزری و لەشی یێن قوتابیان نە و دێ ناڤەندەک بیت پتر قوتابی خوە تێدا ببینیت، گۆت ژی دێ چەندین خزمەتێن ھەمە جۆر د ڤێ ناڤەندێ دا بۆ قوتابیان ھێنە پێشکێش کرن.
د. خەلیل مستەفا ئاشکرا ژی کر کو دێ ھۆلێن خزمەتێن شێوەکاری، خزمەتێن وەرزشی، خزمەتێن سینەمایی، خزمەتێن مووزیکێ، ھۆلا شانۆیێ، ھۆلا خواندنێ، خارنگەە و کافیتریا و مارکێت و سەرتراشخانە و وێنەشوو و پێشانگەھا میکیاژی و چەند پێشانگەھێن دی تێدا ھێنە ڤەکرن، گۆت ژی ھندەک ژ ڤان خزمەتان بۆ جارا ئێکێ یە ل زانکۆیا دھێتە دکەڤنە دخزمەتا قوتابیان دا و ئەڤە مەرەما سەرەکی یا ئاڤاکرنا ڤێ ناڤەندێ یە.
ل ھەموو زانکۆیێن پێشکەفتی یێن جیھانی ناڤەندەک بۆ قوتابیان دھێتە چێکرن و دابین کرن بۆ ھندێ ژ بلی قوتابی وانێن خوە یێن خواندنێ ل زانکۆیێ بخوینیت ھەروەسا دەمێن خوە ب بابەتێن ب مفا ڤە ببۆرینیت و فێری ھندەک پیشەیێن دیتر ببیت.