شڤێدى به‌رزه‌بوو وئه‌ڤرۆ ب كوشتى هاته دیتن
ئه‌ڤرۆ نيۆز، نه‌وزاد هلۆرى:
شه‌ڤا بۆرى ل نێزیك كارگه‌ها په‌ترۆلێ ل ده‌ڤه‌را كواشێ يا سه‌ر ب قه‌زا سێمێلێ ڤه، وه‌لاتیه‌كێ گوندێ كواشێ به‌رزه دبیت و ئه‌ڤرۆ سپێدێ ته‌رمێ وى ل گه‌ل ترومبێلا وى ل به‌دریكێ هاته دیتن، رێڤه‌به‌ریا پۆلیسێن دهۆكێ ژى دیاركر كو ل گۆره‌ى پێزانينێن ده‌ستپێكى بكۆژى دڤیا ب كوشتنا وى كه‌سى قه‌رێن خوه نه‌ده‌ت.
مه‌لا حسێن كواشى خه‌لكێ گوندێ كواشێ دیاركر كو ل شه‌ڤا بۆرى، وه‌لاتیه‌كێ گوندێ وان به‌رزه‌بوویه و ئه‌ڤرۆ ب كوشتى هاتیه دیتن وبۆ ئه‌ڤرۆ نيۆز گۆت، پشتى كو شه‌ڤا بۆرى ل نێزیك كارگه‌هه‌كا كواشێ وه‌لاتیه‌كێ گوندێ مه به‌رزه دبیت ، ته‌رمێ وى ل به‌دریكێ هاته دیتن .
زێده‌تر گۆت، ئه‌و وه‌لاتيێ هاتیه ره‌ڤاندن خێزانداره و ژیێ وى 32 سالن، ترومبێلا وى ژى ل پا‌نزینخانه‌كا فه‌یدیێ هاتیه دیتن وچو كێشێن ده‌روونى نینن و دوژمنكاری ژى ل گه‌ل كه‌سێ نینه ، ئه‌م دخوازین پۆلیس زێده‌تر دووڤچوونێ ل سه‌ر ڤێ روودانێ بكه‌ن، ژبه‌ركو ئه‌وێن ئه‌ڤ كاره ئه‌نجامداى، كه‌سه‌ك بتنێ نینه، به‌لكو تۆره‌كه و بۆ پاره‌ى و دزیان خه‌لكى دگرن و دكۆژن.
ل گۆره‌ى ئاخڤتنێن مه‌لا حسێنى ، كه‌سه‌كێ گومان لێكرى ژلایێ خه‌لكێ گوندێ كواشێ هاتیه ده‌سته‌سه‌ركرن كو زێره‌ڤانێ ئێك ژ وان كارگه‌هێن په‌ترۆلێ بوو وراده‌ستى پۆلیسان كریه.
هێمن سلێمان به‌رپرسێ راگه‌هاندنا پۆلیسێن دهۆكێ بۆ ئه‌ڤرۆ نیۆز گۆت، شه‌ڤا بۆرى وه‌لاتیه‌كێ گوندێ كواشێ دهێته ره‌فاندن و پاشى ئه‌ڤرۆ ب كوشتى ل به‌دریكێ هاته دیتن ، ل گۆره‌ى پێزانينێن ده‌ستپێكى يێن ب ده‌ست مه كه‌فتین، بكوژى دڤیا ب كوشتنا وى وه‌لاتى خوه ژدانا قه‌ران قورتال بكه‌ت.
ل دۆر ناسناڤا كوشتى و بكوژى، هێمنى گۆت، ناڤێ ئه‌و كه‌سێ هاتیه كوشتن نزار عیسا عومه‌ره و ژیێ وى 32 سالن و یێ بكوژى ژى” ل.ع.ر ” و ژیى وى 37 سالن و خه‌لكێ به‌دریكێ یه ، نها هاتیه گرتن و په‌رێن ڤه‌كۆلینێ ژى هاتینه ڤه‌كرن بۆ دووڤچوونێ ل سه‌ر وێ روودانێ.