ئەڤین بارزانی

بێگومان نها دانوستاندنێن د ناڤبەرا پارتی و ئێکەتیێ بۆ پێکئینانا کابینا نوو یا حوکمەتا هەرێما کوردستانێ د رۆژەڤا هەموو هێزێن سیاسی و هەتا وەلاتیێن هەرێما کوردستانێ دانە، ل ڤێرێ من دڤێت بێژم کا بۆچی وەکو وەلاتیەکا هەرێما کوردستانێ بۆ من گرنگە کابینا نوو زوو بهێتە ئاڤا کرن. خالا ئێکێ و گەلەک گرنگ هەکە ئەم بەرێ خۆ بدەینە چەند سالێن بۆری بۆ مە دیار دبیت ئێک ژ ئاریشەیێن هەری مەزن یێن ل هەرێما کوردستانێ نەبوونا دستووری یە، سەرۆک بارزانی ژی بەری هەلبژارتنان گەلەک جاران دیار کر دڤێت ئێک ژ کارێن سەرەکی یێ خۆلا نوو یا پەرلەمانی نڤیسینا دستووری بیت، ئانکۆ پێدڤیا هەرێما کوردستانێ ب دستووری هەیە دا گەلەک ئاریشەیێن کو بۆ مە وەکو هەرێما کوردستانێ دروست دبن ب رێیا دستووری بهێنە چارەسەرکرن. مە هەموویان دیت کا ژ بەر نەبوونا دستووری دەمێ دادگەها فیدرالی بریارا هلوەشاندنا خۆلا بۆری یا پەرلەمانێ کوردستانێ دایی چەند ئاریشە بۆ مە ل هەرێما کوردستانێ دروست بوون. خالەکا دی یا گرنگ ب پێکئینانا کابینا نوو دێ گوهۆڕینێن بەرچاڤ ژی د هەیکەلێ حوکمەتێ دا دروست بن، وەلاتیێن هەرێما کوردستانێ چاڤەرێی خزمەتگوزاریێن باشترن، بێگومان دڤێت ئەم ڤێ راستیێ ژی ژبیر نەکەین کو زێدەباری گەلەک ئاستەنگیان کابینا نەهێ ب سەرۆکاتیا بەرێز مەسرور بارزانی شیا گەلەک کارێن باش و مەزن بکەت، لێ خەلکێ کوردستانێ چاڤەرێی خزمەتگوزاریێن باشترە و ئەو یەک ژی ئەرکێ حوکمەتێ یە، ژ بەر هندێ ژی پێکئینانا کابینەیا نوو دێ ژ بۆ خزمەتێن باشتر بیتە دەستپێکەکا نوو. پارتی دیموکراتی کوردستان و ئێکەتیێ د هەوا بانگەشەیا هەلبژارتنێن پەرلەمانێ کوردستانێ دا گەلەک سۆز دانە خەلکی و نها خەلک چاڤەرێ نە هەر دو هێزێن مەزن یێن کوردستانێ ب تایبەتی ژی پارتی دیموکراتی کوردستان دەست ب قۆناغەکا نوو یا ئاڤەدانیێ و خۆشکرنا ژیانا خەلکی بکەت. ل ئالیێ دی هەکە ئەم د ئاستێ نێڤدەولەتی و رۆژهەلاتا ناڤین دا ژی بەرێ خۆ بدەینێ، نها دەڤەرا مە بەر گوهۆڕینێن گەلەک مەزن ڤە دچیت، ئالۆزیێن ل سووریێ، ئیرانێ و گوهۆڕینێن ل تورکیا دێ کاریگەریا خۆ یا مەزن ل ئیراقێ و ب تایبەتی ژی دێ ل هەرێما کوردستانێ کەن، ڤێجا گەلەک یا گرنگە هەرێما مە خودانا کابینەیا خۆ یا نوو بیت و ل هەمبەر بەغدا و هەر ئالیەکێ ژی ئێکگرتی بن و پێکڤە کار بکەن، براستی ژی مە هەموویان دڤێت ئەو ئاخڤتنا جەنابێ سەرۆک بارزانی ببیتە بناغە بۆ کابینا نوو یا حوکمەتێ، جەنابێ وی بەری نها گۆتبوو دڤێت ل هەرێما کوردستانێ مە ئێک حوکمەت و ئێک هێزا پێشمەرگەی هەبیت. د دووماهیێ دا من دڤێت بێژم وەکو وەلاتیەکا هەرێما کوردستانێ من دڤێت کابینا نوو زوو بهێتە پێکئینان، چونکی ئەو یەک دێ کاریگەریا خۆ یا باش د هەموو بیاڤێن ژیانێ دا هەبیت، ب تایبەتی ژی دێ کاریگەریا خۆ ل سەر بارێ ئابۆری هەبیت، هەروەسا ب کابینەیەکا نوو و ئێکگرتی هەرێما کوردستانێ دێ یا بهێز بیت و دێ پتر کار بۆ باشکرنا رەوشا ژیانا وەلاتیان کەت، چونکی دڤێت ژبیر نەکەین ئەڤسالە دێ هەلبژارتنێن پەرلەمانێ ئیراقێ ژی هێنە کرن.

ئــەڤین بـارزانـی

دیمەنێن كۆنفرانسێ نەتەوەیی یێ ل باژێرێ قامشلۆ یێ رۆژئاڤایێ كوردستانێ كو ب دەستپێشخەری و پشتەڤانیا جەنابێ سەرۆك بارزانی هاتە ساز كرن بۆ ئەگەرێ ڤێ یەكێ هەموو كورد ل جیهانێ دلخۆش ببن، ئێكەتیا هێزێن سیاسی یێن رۆژئاڤایێ كوردستانێ دێ بیتە ئەگەرێ ڤێ یەكێ كورد ل سووریێ بگەهنە مافێن خوە و هەروەسا د ئاستێ هەرێمی و جیهانی دا ژی بێگومان دێ حسابەكا جودا بۆ كوردان هێتە كرن، ژ بەر ڤێ یەكێ ژی سازكرنا كۆنفرانسێ نەتەوەیی یێ ل قامشلۆ بەرهەمێ كەد و ماندیبوونا جەنابێ سەرۆك بارزانی بوو و كورد هەموو دلخۆش بوون.
ئاشكرایە كو رۆژهەلاتا ناڤین كەفتیە د قۆناغەكا گەلەك گرنگ و دیرۆكی دا، حسابێن گەلەك جودا جودا د ئاستێن هەرێمی و جیهانی دا هەنە، د سەد سالا بۆری دا دەمێ نەخشێ دەڤەرێ هاتە دانان كورد ئامادە نەبوون و ژ بەر ڤێ یەكێ ژی كورد نەگەهشتنە مافێن خوە، لێ ئەڤرۆكە كورد بهێزن و ئێكگرتی نە و ژ بەر ڤێ یەكێ ژی جهێ دلخۆشیێ یە كو دێ كورد گەهنە مافێن خوە.
ل سووریێ و رۆژئاڤایێ كوردستانێ پێشڤەچوونێن بلەز روو ددەن، بێگومان وەلاتێن جیهانێ و دەڤەرێ ژی ژ بۆ بەرژەوەندیێن خوە كار دكەن دا كاریگەریا وان ل سەر سووریێ هەبیت، ژ بەر ناكۆكیێن چەند سالێن بۆری یێن د ناڤبەرا هێز و ئالیێن سیاسی یێن رۆژئاڤایێ كوردستانێ دا زیانێن گەلەك مەزن گەهشتنە كوردان، لێ پشتی نەمانا رژێما بەشاری و گوهۆڕینێن نها ل سووریێ و دەڤەرێ دەلیڤەكا دیرۆكی هاتیە پێش و سەرۆك بارزانی ئەو یەك باش دیت و دەستێوەردان كر، كۆمبوونا سەرۆك بارزانی ل گەل بەرێز مەزلوم عەبدی فەرماندارێ هەسەدێ زەمینە بۆ كۆنفرانسێ نەتەوەیی ل قامشلۆ دروست كر، ئەڤرۆكە كورد ل رۆژئاڤایێ كوردستانێ و هەموو وەلاتێن دی یێن جیهانێ دلخۆشن و سۆپاسیا جەنابێ سەرۆك بارزانی دكەن.
بهێزبوونا كوردان ل رۆژئاڤایێ كوردستانێ د ڤێ قۆناغا هەستیار ل سووریێ دا دێ بیتە ئەگەرێ ڤێ یەكێ دەستهەلاتا شامێ نەچار بیت راستیا كوردان قەبوول بكەت، هەروەسا دێ مافێن رەوا یێن گەلێ كورد ژی د دستوورێ نوو یێ سووریێ دا هێتە گەرەنتی كرن، ب سالانە گەلێ مە ل سووریێ د رەوشەكا گەلەك خراب دا دژین، رژێما بەشاری هەتا ناسنامە ژی نەدا كوردان، لێ ئەڤرۆكە دەلیڤەیەكا گەلەك مەزن بۆ كوردان هاتیە پێش و كورد دشێن مفایەكا گەلەك مەزن ژ رەوشا نها وەربگرن، دڤێت ژبیر نەكەین نها شام گەلەك لاوازە و هەكە كورد بهێز بن دێ شام نەچار بیت گەلەك داخوازیێن كوردان ل سووریێ قەبوول بكەت.
سیاسەتا حەكیمانە یا جەنابێ سەرۆكی و بزاڤێن وی ئەڤرۆكە یێ ئەنجامێ خوە ددەن، گرنگە كۆنفرانسێ نەتەوەیی یێ ل رۆژئاڤایێ كوردستانێ ببیتە دەستپێكەكا نوو، مە وەكو كورد دڤێت هەموو هێزێن سیاسی یێن رۆژئاڤایێ كوردستانێ دەست ب قۆناغەكا نوو بكەن، پێكڤە كار بكەن و هەروەسا گرنگە شاندەكێ ئێكگرتی یێ كوردی بهێتە دروست كرن دا بشێن ل گەل شامێ دەست ب دانوستاندنان بكەن، نها دەلیڤەكا دیرۆكی هاتیە پێش و ئەم هیڤیدارین كورد ل سووریێ ژی بگەهنە هەموو مافێن خوە.

ئەڤین بارزانی

د سەد سالا بۆری دا هەم د ئاستێ نێڤدەولەتی و هەم ژی د ئاستێ رۆژهەلاتا ناڤین دا گەلەك گوهۆڕین دروست بوون كو ژ بەر گەلەك ئەگەران كوردان نەشیان مفایێ ژێ وەربگرن و زیانێن گەلەك مەزن گەهشتنە كوردان، ژ بلی سەرهلدانا سالا ١٩٩١ ئانكۆ دووماهیا سەدسالا بیست وەكو دی هەموو گوهۆڕینێن دروست بوون د زیانا گەلێ كورد دا بوون.
لێ نها رەوشەكا گەلەك نوو هاتیە پێش، رۆژهەلاتا ناڤین د ناڤ گوهۆڕینێن گەلەك مەزن دایە، هەموو وەلاتێن رۆژهەلاتا ناڤین ب تایبەتی ژی داگیركەرێن كوردستانێ دەست ب بزاڤەكا گەلەك مەزن كرینە و هەست ب مەترسیا گوهۆڕینان كرینە، ئەو باش دزانن د نەخشێ نوو یێ جیهانێ و دەڤەرێ دا كوردان دێ پێگەهەكێ خوە یێ باش هەبیت، ژ بەر ڤێ یەكێ ژی ئەڤرۆكە ب هەموو رەنگەكێ خوە نێزیكی كوردان دكەن و وەسا نیشا ددەن ئەو هەڤالێ كوردانە، لێ ب سالانە گەلێ كورد ژ ئالیێ وان دەولەتێن داگیركەر ڤە تووشی سەدان كارەساتان بووینە.
بەری نها چو وەلاتەكێ زلهێز پشتەڤانی ل مافێن گەلێ كورد نەدكر و گەلەك ژ وان ژ بۆ بەرژەوەندیێن خوە پشتەڤانیا دوژمنێن گەلێ كوردستانێ ژی كرن، لێ نها بەرژەوەندیێن وان ژی وەسا دڤێت كوردان ل رۆژهەلاتا ناڤین كیانەكێ خوە هەبیت، گرنگیدان ب هەرێما كوردستانێ و پشتەڤانیا نها بۆ رۆژئاڤایێ كوردستانێ نیشانێن گەلەك باشن و هەروەسا بزاڤێن سەرۆك بارزانی بۆ ئێكەتیا ناڤمالیا كوردی ل رۆژئاڤایێ كوردستانێ و بزاڤێن جەنابێ وی بۆ ئاڤاكرنا كابینا نوو یا حوكمەتا هەرێما كوردستانێ و پشتەڤانیا سەرۆكی یا بۆ قۆناغا ئاشتیێ ل توركیا و باكورێ كوردستانێ كورد گەلەك نێزیكی هەڤدو كرینە و ئەو یەك ژی بێگومان كارەك گەلەك مەزن و گرنگە و كورد یێ بەر ب هندێ ڤە دچن دا ببنە خوەدان سەنگ و هێزەك مەزن ل دەڤەرێ. سەرەدانا سەرۆكێ هەرێما كوردستانێ یا بۆ فرەنسا د دەمەكێ دا كو هەر كەس بەحسێ گوهۆڕینێن ل دەڤەرێ و رۆلێ كوردان دكەت گەلەك یا گرنگە، فرەنسا ئێكە ژ وان وەلاتێن زلهێز یێ جیهانێ كو چەندین سالن ب رەنگەكێ ئاشكرا پشتەڤانیێ ل مافێن رەوا یێن گەلێ كوردستانێ دكەت و بێگومان سەرەدانا جەنابێ سەرۆكێ هەرێما كوردستانێ بۆ فرەنسا د ڤان كاودانێن هەستیار دا گرنگیەكا خوە یا مەزن هەیە، هەلوەستێ بەغدا ژی ل هەمبەر هەرێما كوردستانێ دهێتە گوهۆڕین و سەرەدانا سۆدانی یا بۆ هەولێرێ و دیدارا وی ل گەل سەرۆك بارزانی ژی نیشا ددەت هێزێن ئیراقێ جارەكا دی پێدڤیا وان ب هەرێما كوردستانێ هەیە ب تایبەتی ژی پشتەڤانیا سەرۆك بارزانی.
د دووماهیێ دا من دڤێت بێژم مەرجێن دەرڤە و ناڤخوەیی هەمی د بەرژەوەندیا گەلێ مە دانە، باشترین دەلیڤە یە كورد ئێدی وانەیان ژ دیرۆكا خوە وەربگرن، ڤێجارێ رێ نەدەن دەلیڤە ژ دەستێ وان بچیت، ئەم هەمی كورد چاڤەرێی گوهۆڕینێن ل دەڤەرێ نە، بێگومان دڤێت هێزێن سیاسی ژی بەرهەڤیێن تەمام بۆ هەر گوهۆڕینەكێ بكەن، گرنگیدانا نەیارێن مە ب گەلێ كوردستانێ نیشا ددەت ئەو لاواز و كورد بهێز دبن.

ئـەڤین بـارزانی

رۆژهەلاتا ناڤین بەر ب گوهۆڕینێن گەلەك مەزن ڤە دچیت، وەلاتێن رۆژهەلاتا ناڤین ب تایبەتی ژی یێن داگیركەرێن كوردستانێ یێ بزاڤا دكەن دا بشێن پێگەهێ خوە بپارێزن و جارەكا دی نەهێلن كورد بگەهنە مافێن خوە، چونكی وەسا دیارە د بەرنامە و سیاسەتا ڤێجارێ یا هێزێن نێڤدەولەتی دا كوردان دێ رۆلەكێ خوە یێ كاریگەر هەبیت، دیارە ئێك ژ سەدەمێن سەرەكی یێن ئالۆزیێن نها ل رۆژهەلاتا ناڤین ژی ژ بەر ڤێ یەكێ یە، كو د سەد سالا بۆری دا نەخشەیەك ل دەڤەرێ هاتە دان، كو تێدا مافێن گەلێ كورد نەهاتنە چەسپاندن، ڤێجارێ كورد ئێدی هێزەكا مەزن و كاریگەرن و چو بەرنامە و حسابەك ژی بێی پشكداریا كوردان یا سەركەفتی نابیت.
هەكە ئەم بەرێ خوە بدەینە رەوشا دەڤەرێ ب تایبەتی ژی ل سووریێ دەستهەلاتا نها یا شامێ دڤێت ب دانا مافەكێ گەلەك كێم كوردان رازی بكەت، لێ خالا جهێ دلخوەشیێ ئەوە كو ئەمریكا، ئێكەتیا ئۆرۆپا و گەلەك وەلاتێن دی ژ بەر بەرژەوەندیێن خوە رازی نینن كو سیستەمەك ناڤەندی ل سووریێ بهێتە ئاڤا كرن، وان دڤێت كوردان رۆلەك سەرەكی و كاریگەر د ئاڤاكرنا سیستەمێ نوو یێ سووریێ دا هەبیت، ژ بەر ڤێ یەكێ ژی گرنگە كورد ل رۆژئاڤایێ كوردستانێ نها د زووترین دەم دا پرسێن هەی د ناڤبەرا خوە دا چارەسەر بكەن، دڤێت كورد ئێكگرتی بن و داخوازیێن وان ژی د زەلال بن و دەست ب بزاڤەكا مەزن د ئاستێ جیهانێ دا بكەن، دڤێت كورد رێ نەدەن د دستوورێ نوو یێ سووریێ دا مافێ وان بهێتە خوارن.
ل ئالیێ دی نها فشارێن گەلەك مەزن ل سەر بەغدا ژی هەنە، بەرپرسێن شیعە یێن بەغدا ژی باش دزانن ئیدارا ترامپی گەلەك تشتان ژ وان قەبوول ناكەت، رەنگە جارەكا دی بەرپرسێن شیعە یێن بەغدا ژ بۆ بەرژەوەندیێن خوە جارەكا دی بزاڤا ڤێ یەكێ بكەن خوە نێزیكی هەرێما كوردستانێ بكەن، لێ دڤێت ڤێجارێ هەلوەستێ هەرێما كوردستانێ گەلەك جودا بیت و دڤێت كوردان هندەك مەرجێن جودا هەبن، چونكی هەتا نها ژی شیعە یێ رازی نینن ل گۆر دستوورێ ئیراقێ سەرەدەریێ ل گەل هەرێما كوردستانێ بكەن و دڤێت هەرێما كوردستانێ ژی ڤێجارێ بێی گەرەنتیا ئەمریكا و وەلاتێن دی یێن كاریگەر رازی نەبیت ل گەل بەغدا بەردەوام بیت.
بێگومان ل ئیرانێ و توركیا ژی رەوش وەكو بەرێ نینە، فشارێن ل سەر ئیرانێ گەلەك توند بووینە و توركیا ژی هەست ب مەترسیەكا گەلەك مەزن ل سەر پێگەهێ خوە ل دەڤەرێ كریە و جارەكا دی بەرێ خوە دایە كوردان، ئەو یەك ژ بۆ كوردان گەلەك گرنگە، هەكە ئەم بەرێ خوە بدەینە رەوشا نها یا ل رۆژهەلاتا ناڤین دیار دبیت جارەكا دی دەلیڤەیەكا دیرۆكی بۆ كوردان هاتیە پێش، بەری سەد سالان نەخشێ دەڤەرێ بێی كوردان هاتە دان، سەد سالن رۆژهەلاتا ناڤین د قەیرانەكا گەلەك مەزن دایە، ڤێجارێ بێی كوردان چو پرۆژەیەك یا سەركەفتی نابیت، لێ ل هەمبەر دا گرنگە هەموو هێز و ئالیێن سیاسی یێن هەر چار پارچەیێن كوردستانێ ژی د ئامادە بن دا بشێن مفایەكا باش ژ گوهۆڕینێن نها ل دەڤەرێ وەربگرن.

ئـەڤین بـارزانـی

هەرێما كوردستانێ ب سالانە بزاڤان دكەت دا كو ل گۆر دستووری پرسێن هەی ل گەل بەغدا چارەسەر بكەت، هەتا نها چەندین رێككەفتن ژی هاتنە كرن، لێ مخابن یێن ل بەغدا هەردەم بزاڤا ڤێ یەكێ دكەن دا ئاریشەیان بۆ هەرێما كوردستانێ دروست بكەن، ب سالانە كارتا مووچەی بۆ برسیكرنا خەلكێ كوردستانێ بكار دئینن، بەری مەهەكێ ل گەل بەغدا رێككەفتن هاتە كرن و وەزیرێ دارایی یێ هەرێما كوردستانێ ب فەرمی راگەهاند كو ئێدی مووچە نابیتە نووچە و دێ هەموو پرسێن گرێدای مووچەی هێنە چارەسەر كرن، لێ مخابن هێشتا ژی ل بەغدا نێرینەكا گەلەك خراب یا هەی و وان دڤێت هەردەم خەلكێ كوردستانێ چاڤێ وان ل دەستێ بەغدا بیت.
هندەك هێزێن سیاسی ل هەرێما كوردستانێ ژی هەردەم پارتی وەكو ئاستەنگ ل هەمبەر چارەسەركرنا پرسا مووچەی ددیتن، بەری نها گەلەك جاران ئەو یەك هاتە سەلماندن كو پارتی ل سەر رێیا راستە و دڤێت هەر تشتەك ل گۆر قانوونی بیت، لێ ئەز باوەر دكەم ڤێ جارێ هەموو تشت ئاشكرا بوون، خەلكێ هەرێما كوردستانێ هەموو راستی دیتن و بۆ هەر كەسەكێ ئاشكرا بوو كا نیەتا بەغدا ل هەمبەر هەرێما كوردستانێ چەند یا خرابە، چونكی وەسا رێككەفتن هاتبوو كرن كو ئێدی ئەڤسالە بابەتی مووچەی نەبیتە ئاریشە، لێ دیارە یێن ل بەغدا دخوازن هەردەم مووچەی بكەنە ئاریشە دا خەلكێ هەرێما كوردستانێ هەردەم د ناڤ ئالۆزیان دا بیت، مخابن ئەم یێ ل سالا ٢٠٢٥ و بەرپرسێن شیعە یێن ل بەغدا هەردەم بەحسێ مافێ كوردان دكەن، لێ ل ئالیێ دی بچووكترین مافێ وەلاتیێن هەرێما كوردستانێ دكەنە ئاریشە.
بەری نها ژی گەلەك جاران من گۆتیە و دیسان دێ بێژم، دیرۆكێ سەلماندیە كو دەستهەلاتدارێن بەغدا رێزێ ل رێككەفتنان ناگرن، گرنگیێ نادەتە مافێن گەلێ كوردستانێ، ژ بەر ڤێ یەكێ ژی هەر رێككەفتنەك بهێتە كرن ئەو دێ هەر وەكو خوە كەن، ئەو چو رێزەكێ ل خەلكێ كوردستانێ ناگرن، بەهانەیێن وەزیرا ئابووری یا ئیراقێ چو دەمەكێ تەمام نابن، هەكە هەرێما كوردستانێ هەموو داخوازیێن وان بجه بینیت ژی دیسان دێ هەر بەهانەكێ بینن دا ئاریشەیان بۆ هەرێما كوردستانێ دروست بكەن.
ئارمانجا بەغدا ئەڤە دا رێگریێ ل پێشكەفتنا هەرێما كوردستانێ بگریت، ئاڤەدانی و پێشكەفتنا ل هەرێما كوردستانێ بێگومان چو دەمەكێ ب دلێ وان نەبوویە و نابیت ژی، هەتا ژ دەستێ وان بهێت ئەو دێ ل سەر سیاسەتا برسیكرنا خەلكێ كوردستانێ بەردەوام بن، ژ بەر ڤێ یەكێ ژی دڤێت ئێدی هێزێن سیاسی یێن هەرێما كوردستانێ ل هەمبەر بەغدا ب كریاری هندەك تستان بكەن، مخابن بەری دەمەكێ پارتی داخواز ژ هەموو هێزێن سیاسی كر كو پێكڤە خودان هەلوەست بن، لێ مخابن هێزێن بناڤ ئۆپۆزسیۆن دیسان ب دەهان بەهانە ئینان و پشكداری د كۆمبوونا پارتێن سیاسی دا نەكرن، بێگومان ئەو یەك لاوازبوونەكا بەرچاڤە و هەتا ئێك هەلوەستی د ئاستێ هێزێن سیاسی یێن هەرێما كوردستانێ دا ل دژی بەغدا نەبیت ئەز باوەر دكەم دێ بەغدا ل سەر سیاسەتا خوە یا نها ل دژی هەرێما كوردستانێ بەردەوام بیت، ئەز باوەر ناكەم ئاریشە ب رێككەفتان چارەسەر بیت.
هەتا ل هەرێما كوردستانێ ب ئێكدەنگی هەلوەستەك توند ل دژی بەغدا نەبیت سیاسەتا نها یا بۆ برسیكرنا خەلكێ كوردستانێ دێ بەردەوام بیت.

ئـەڤین بارزانی

ژ بەر كۆچبەری و شۆرەشێن كوردی و نەچاربوونا كوردان ژ بۆ پەنابەریێ و چوونا وان بۆ ئەمریكا و ئۆرۆپا وەسا كریە كو كورد ل دیاسپۆرا ببنە ئێك ژ مللەتێن هەری بهێز و رێكخستنی كری، هەكە ئەم بەرێ خوە بدەینێ ئەڤرۆكە ب سەدان زانایێن كورد، مامۆستایێن زانكۆیێ، كەسێن ئەكادیمی ل دەرڤەیی كوردستانێ دژین و شیاینە كارێن گەلەك مەزن بكەن، ئافرەتێن كورد ژی وەسا شیاینە بگەهنە ئاستێن گەلەك باش، ئەڤرۆكە ل گەلەژ وەلاتێن جیهانێ ئافرەتێن كورد ئەندامێن پەرلەمانی نە، د سازیێن جڤاكێ سڤیل دا و د سازیێن ئەكادیمی دا خوەدان رۆلەك مەزنن، لێ مخابن ژ بەر نەبوونا دەولەتا كوردی گەلەك وان وان هەتا نها ژی وەكو كورد نەهاتینە نیاسین.
ژ بەر گوهۆڕینێن ل جیهانێ، ئەڤرۆكە دەلیڤەكا دیرۆكی بۆ ئافرەتا كورد ژی هاتیە پێش دا بشێت شیانێن خوە د هەموو بیاڤەكێ دا نیشا بدەت، لێ گرنگە ل هەرێما كوردستانێ چ د ئاستێ حكومەتا هەرێما كوردستانێ چ ژی د ئاستێ سازیێن ئافرەتێ كار بهێتە كرن ناڤەندەكا ئافرەتێن كوردستانی ل سەر ئاستێ هەموو كوردستانێ بهێتە ئاڤا كرن، دا بشێت وان ئافرەتان هەموویێ ل ژێر سیبەرا خوە كۆم بكەت، ئەرێ ما دەم نەهاتیە ئەكادیمیا ئافرەتێن كوردستانێ بهێتە ئاڤاكرن، دا ژ ئافرەتێن كورد یێن ل ئۆرۆپا و ئەمریكا و هەموو وەلاتێن دی یێن جیهانێ بشێن د ناڤەندەكا وەسا دا جه بگرن.
راستە ئەڤرۆكە ل هەرێما كوردستانێ ئافرەتا كورد خوەدان رۆلەكا باشە، د گەلەك سازی و دەزگەهێن حوكمەتێ و جڤاكێ سڤیل دا خوەدان رۆلن، ب سەدان ئافرەتێن كورد خوەدان ناسنامە نە، لێ دڤێت ئەم ڤێ راستیێ بدەینە بەرچاڤ كو ئافرەتا كورد بێی پشتەڤانیا زەلامی تا چ رادە شیایە بگەهیتە ئاستەك وەسا، ل گۆر دیتنا من هێشتا ژی ئاستێ ئافرەتا كورد ل هەرێما كوردستانێ گەلەك لاوازە و دڤێت پتر كار ل سەر بهێتە كرن دا ئافرەتا كورد بگەهیتە ئاستەكێ بلند یێ زانستی و ببیتە خوەدان كەسایەتیا بهێز، بابەت تنێ وەرگرتنا پۆستان و باوەرنامان نینە، بەلكو دڤێت ئافرەتا كورد ببیتە خوەدان كەسایەتیا خوە یا بهێز و بشێت وەكو ئافرەت و بێی پشتەڤانیا زەلامی گەلەك كارێن مەزن بكەت.
هەكە ئەم بەرێ خوە بدەینە ئێكەتیا ئافرەتان، ئاستێ چالاكیێن وان، براستی ژی گەلەك كلاسیك ماینە و ل گۆر پێدڤیاتێن دەمی نینە، ئەرێ ئێكەتیا ئافرەتان و سازیێن وان شیاینە تا چ رادە رێگریێ ل خوە كوشتنا ئافرەتان بكەن، تا چ رادە شیاینە رۆلەكا كاریگەر بۆ رەوشەنبیركرنا ئافرەتا كورد بگێرن، تا رادە شیاینە ببنە پالدەر دا ئافرەتا كورد بگەهیتە وێ ئاستێ دا بشێت خوەدان كەسایەتیا خوە بیت و وەكو نیڤا جڤاكێ ب ئەركێن خوە رابیت.

ئــەڤین بـارزانـی

پەسەندكرنا پرۆژێ بۆدجێ یا د ناڤبەرا هەولێر و بەغدایێ دا ل پەرلەمانێ ئیراقێ بوویە جهێ دلخوەشیا وەلاتیێن هەرێما كوردستانێ، سەرۆكێ هەرێمێ و سەرۆكێ حوكمەتا هەرێما كوردستانێ ژی پشتەڤانیا خوە پەسەندكرنا وی پرۆژەیی دیار كرن و داخواز كرن كو بەغدا ئەركێن خوە بجه بینیت و ئێدی ئاستەنگیان ل هەمەر هنارتنا مووچێ فەرمانبەرێن هەرێما كوردستانێ دروست نەكەت.
ئەم باش دزانین كو ژ بەر گوهۆڕینێن نها ل دەڤەرێ و لاوازیا شیعەیان هەلوەستێ بەغدا ژی ل هەمبەر هەرێما كوردستانێ نەرم بوویە، هەكە نە هێزێن شیعە یێن ل بەغدا كو هەردەم دژبەریا هەرێما كوردستانێ دكەن وەسا رازی نەدبوون پرۆژێ بۆدجێ ل پەرلەمانی بهێتە پەسەند كرن. چونكی نها هێزێن شیعە وەسا دبینن ل سووریێ هێزەكا سوننە كو ل دژی شیعانە هاتیە سەر دەستهەلاتێ و هەروەسا ژ بەر گەفێن ئەمریكا و ئسرائیلێ نها هێزێن حەشدا شەعبی ژی نەشێن وەكو جاران ب ئاشكرا دژبەریا هەرێما كوردستانێ بكەن و خوە بێدەنگ كرینە، هێزێن شیعە یێن ل بەغدا ژی وەسا دبینن هەكە نها ل هەمبەر هەرێما كوردستانێ نەرم نەبن دبیت پاشی رەوش گەلەك ئالۆز ببیت و مەترسی بۆ وان دروست ببن.
نوری مالكی كەسایەتیێ هەری كاریگەر یێ سیاسی ل ئیراقێ بەری چەند رۆژان دیار كر نابیت ئەو رێ بدەن ئەزموونا سووریێ ل ئیراقێ بهێتە دوبارە كرن، هەڤدەم گەلەك ژ سیاسەتمەدارێن ئەمریكی ژی دیار دكەن پشتی سووریێ نها دێ ل ئیراقێ ژی گوهۆڕین دەستپێكەن، بێگومان نها هەر گوهۆڕینەك ل ئیراقێ دەستپێ بكەت د بەرژەوەندیا وان هێزێن شیعە دا نینە یێن كو هەردەم دژبەریا هەرێما كوردستانێ دكەن. ب سالانە هەرێما كوردستانێ دڤێت پرسێن هەی ل گەل بەغدا چارەسەر بكەت، ب تایبەتی ژی كابینا نەهێ گەلەك بزاڤ كرن و ژ ئەنجامێ فشارێن ناڤخوەیی و دەرڤە و گوهۆڕینێن ڤێ دووماهیێ هەلوەستێ بەغدا ل هەمبەر هەرێما كوردستانێ هاتە گوهۆڕین، لێ یا گرنگ ئەوە كا دێ بەغدا تا چ رادەیەكێ پێگیر بیت و دیسان ئالۆزیان دروست نەكەت.
وەكو هەرێما كوردستانێ مە دیتیە هەتا نها گەلەك جاران رێككەفتن د ناڤبەرا بەغدا و هەولێرێ دا هاتینە كرن، لێ بەغدا هەردەم ئاریشە دروست كرینە، ژ بەر ڤێ یەكێ ژی ئەم ب گومانین كا دێ دیسان بەغدا ئاریشان دروست كەت یان نە، ب تایبەتی ژی بابەتێ هنارتنا پەترۆلا هەرێما كوردستانێ بۆ بازارێن جیهانێ پێشڤەچوونەكا گەلەك دلخوەشكەرە بۆ هەرێما كوردستانێ و بۆ ئیراقێ ژی، چونكی ئەو یەك دێ بیتە ئەگەر فشارێن ئابووری یێن ل سەر بەغدا ژی كێمتر لێ بهێن، لێ یا گرنگ ئەوە دێ سودانی شێت ل هەمبەر فشارێن هێزێن شیعە یێن سەر ئیرانێ خوە راگریت و پێگیر بیت ب رێككەفتنا ل گەل هەرێما كوردستانێ یا نە؟
ئاشكرایە هەكە ڤێجارێ بەغدا ئالۆزیان دروست بكەت نە تنێ هەرێما كوردستانێ بەلكو دێ ئەمریكا و وەلاتێن دی یێن رۆژئاڤایی ژی ل هەمبەر بەغدا هەلوەستەك توند نیشا دەن، چونكی نها ئەمریكا و پڕانیا وەلاتێن رۆژئاڤایی ژی دزانن بەغدا ب سەرێ خوە نەشێت چو بكەت و ب فەرمانێن تەهرانێ بزاڤان دكەت، ڤێجا نها هەر بریارەكا خراب ژ ئالیێ بەغدایێ ڤە ل دژی هەرێما كوردستانێ بهێتە دان دێ ئەنجامێن وێ بۆ بەغدا ژی گەلەك خراب بن.

بەغدا ب سالانە هەموو تشتەكێ بۆ لاوازكرنا هەرێما كوردستانێ دكەت و ب تایبەتێ ژی دەمەكە بەغدا یێ بزاڤا ڤێ یەكێ دكەت هەموو ئاریشێن كوردان تنێ وەكو ئاریشا مووچەی نیشا بدەت، ئانكۆ وەسا بكەت تنێ كورد بێژن ئاریشا مە ل گەل بەغدا مووچە یە و هەكە بەغدا مووچێ خەلكێ كوردستانێ بدەت وی دەمی چو ئاریشێن دی نینن، مخابن هندەك هێز و كەسێن بناڤ سیاسی ل هەرێما كوردستانێ ژی ب هەلوەستێن خوە خزمەتا وێ سیاسەتا بەغدا كرن.
ل هەمبەر ڤێ سیاسەتا دوور ژ هەموو رەوشتان یا بەغدایێ سەرۆك وەزیرێن هەرێما كوردستانێ دەست ب بزاڤەكا مەزن كر و د سەرەدانا خوە یا بۆ داڤۆسێ بۆ هەموو بەرپرسێن جیهانێ دیار كر كو ئاریشا كوردان ل گەل بەغدا ئاریشا ئاخێ یە و دڤێت ماددێ ١٤٠ یێ دستوورێ ئیراقێ بهێتە بجهئینان و دڤێت بەغدا هەموو مافێن دستووری یێن خەلكێ كوردستانێ بدەت و نابیت تنێ بابەتی د دابینكرنا مووچەیی دا كورت بكەت، ئەڤ بزاڤا سەرۆك وەزیران ل دژی بەغدا بێگومان د جهێ خوە دایە و هەروەسا مرۆڤ دشێت بێژیت نها بەغدا تەنگاڤ بوویە، چونكی رێككەفتنا ڤێ دووماهیێ یا سودانی ل گەل بریتانیا سەبارەت ب بەرهەمئینانا پەترۆلێ ل كەركووكێ بوویە جهێ دلگرانیا هەموو كوردان و دڤێت هەرێما كوردستانێ ببیتە شریك د وێ رێككەفتنێ دا و هەكە بەغدا ئەو یەك قەبوول نەكر وی دەمی دڤێت هەرێما كوردستانێ ب هەموو رەنگەكێ كار بكەت دا نەهێلیت ئەو رێككەفتنە بهێتە بجهئینان.
ئاریشێن مە یێن ل گەل بەغدا بێگومان ب سالانە بەردەوامن و دێ بەردەوام ژی بن، چونكی ئەزموونا چەندین سالێن بۆری سەلماندیە نیەتا بەغدا نەڤێت پرسێن هەی ل گەل هەرێما كوردستانێ چارەسەر بكەت، بەلكو وان دڤێت هەردەم ئاریشان بۆ هەرێما كوردستانێ دروست بكەن، لێ نابیت هێزێن سیاسی یێن ل هەرێما كوردستانێ كو ب دەنگێ خەلكی بووینە خوەدان هێز ل هەمبەر پیلانێن كرێت یێن بەغدا بێدەنگ و بێ هەلوەست بن، دڤێت هەموو هێزێن سیاسی یێن ل هەرێما كوردستانێ پشتەڤانیێ ل بزاڤێن سەرۆك وەزیران بكەن و ببنە هێزەكا كاریگەر و كارتێن فشارێ ل دژی بەغدا، چونكی یا نها سودانی و هێزێن شیعە ل دژی خەلكێ هەرێما كوردستانێ دكەن گەلەك مەترسیدارە و هەكە كورد بێدەنگ بن باوەر بكەن پشتی چەند سالێن دی ئەو پارەیێ وەكو مووچە بۆ هەرێما كوردستانێ رەوا دكەن دێ هزار بەهانەیێن دی ئینن و وی پارەیی ژی نادەن.
هەرێما كوردستانێ دشێت ببیتە هێزەكا كاریگەر و كارتەكا مەزن یا فشارێ ل دژی بەغدا، ب تایبەتی ژی د دەمەكێ دا كو ئیران وەكو پشتەڤانا هەری مەزن یا هێزێن شیعە یێن بەغدا لاواز بوویە و ب هاتنا ترامپی دێ گەلەك لاوازتر ژی بیت، ژ بەر ڤێ یەكێ گرنگە هەموو هێز و ئالیێن سیاسی یێن ل هەرێما كوردستانێ ژ بۆ بەرژەوەندیێن نەتەوەیی یێن خەلكێ كوردستانێ پشتەڤانیێ ل سیاسەت نها یا جەنابێ سەرۆك وەزیران بكەن، بهێزبوونا مە وەكو هەرێما كوردستانێ ل هەمبەر پیلانێن بەغدا دێ بیتە ئەگەر بەغدا نەچار بیت هەموو داخوازیێن كوردان قەبوول بكەت، هەلوەستێ لاواز یێن هێزێن ئۆپۆزسیۆنێ ل هەرێما كوردستانێ د بەرژەوەندیا بەغدا دایە و دڤێت ئەو پێداچوونێ د هەلوەستێ خوە دا بكەن.

پشتی سەرەدانا سۆدانی بۆ بریتانیا و ئیمزاكرنا رێككەفتنەكا نوو ل گەل بریتانیا ژ بۆ بەرهەمئینانا پەترۆلێ ل كەركووكێ دیسان بەغدا یێ كار دكەت دا پێگەهێ هەرێما كوردستانێ لاواز بكەت، نها شیعە ب هەموو رەنگەكێ كارتا ئابوورێ ل هەمبەر هەرێما كوردستانێ بكار دئینن، بابەتێ مووچێ فەرمانبەرێن هەرێما كوردستانێ و هەروەسا ئاستەنگێن ل هەمبەر هنارتنا پەترۆلا هەرێما كوردستانێ هەموو شەڕێ هێزێن شیعە نە ل دژی هەرێما كوردستانێ، ئەو نها نەشێن ب چەكی ئێرشی هەرێما كوردستانێ بكەن، لێ كارتا ئابوورێ یێ ب رەنگەكێ باش ل دژی هەرێما كوردستانێ بكار دئینن، مخابن هندەك هێزێن سیاسی ل هەرێما كوردستانێ هێشتا ژی وەسا دبینن بەغدا یا مافدارە و هەرێما كوردستانێ تاوانبار دكەن.
پتر ژ ١٠ سالانە هێزێن شیعە ناهێلن بۆدجێ هەرێما كوردستانێ ژ بەغدا بهێت، كابینا نەهێ ب هەموو رەنگەكێ بزاڤ كرن دا ل گەل بەغدا بگەهیتە رێككەفتنەكا نوو دا بشێت پرسێن هەی چارەسەر بكەت، پڕانیا داخوازیێن بەغدا ژی ژ ئالیێ هەولێرێ ڤە هاتنە بجهئینان، لێ بەهانەیێن بەغدا چو دەمەكێ تەمام نەبوون و نابن ژی، گەلەك سەیرە هەتا نها سیاسەتمەدارێن كورد یێن ل بەغدا ب تایبەتی ژی پەرلەمانتارێن كورد نەشیاینە خواندنەكا راست بۆ سیاسەتا بەغدا ل هەمبەر خەلكێ كوردستانێ بكەن، جهێ داخێ یە هەتا نها ژی هندەك پەرلەمانتارێن كورد ل سەر شاشەیان یێ دبێژن هەرێما كوردستانێ ئاریشان بۆ بەغدا دروست دكەت، دڤێت بەری هەر تشتەكێ وەكو خەلكێ كوردستانێ ئەم ڤان كەسێن وەسا شەرمزار بكەین كو هەتا نها ژی نزانن كا دوژمنێ گەلێ كوردستانی چ سیاسەتەكێ ژ بۆ برسیكرنا خەلكێ كوردستانێ بكار دئینیت.
سودانی پشتی سەرەدانا بریتانیا كری نها گوهۆڕینەكا دی د پرۆژەیێ پشنیاز كری یێ بۆ بۆدجەی ب تایبەتی ژی پشكا هەرێما كوردستانێ كریە، ئاشكرایە ئارمانجا سودانی ئەوە ب رێیا زێدەكرنا بەرهەمئینانا پەترۆلێ ل كەركووكێ ئێدی وەسا بكەت پێدڤیا ئێراقێ ب پەترۆلا هەرێما كوردستانێ نەمینیت، وان دڤێت كارتا پەترۆلێ ژ دەستێ هەرێما كوردستانێ دەربخینن، ژ بەر ڤێ یەكێ ژی دڤێت هەموو هێزێن سیاسی یێن كوردستانێ هەست ب پیلانا مەترسیدار یا بەغدا بكەن و پێكڤە ل دژی وێ سیاسەتێ دەركەڤن.
شەڕێ ل دژی بەغدا تنێ ئەركێ پارتی نینە، سیاسەتا برسیكرنا خەلكێ كوردستانێ تنێ ل دژی پارتی نینە، ب سالانە فەرمانبەرێن هەرێما كوردستانێ یێ بووینە قوربانیێن سیاسەتا شوفینی یا شیعەیان و فەرمانبەر تنێ كەسێن سەر ب پارتی نینن، ئانكۆ ب گشتی خەلكێ كوردستانێ یێ بووینە قوربانیا سیاسەتا نوو یا بەغدا و بەر ڤێ یەكێ ژی دڤێت هەموو هێزێن سیاسی یێن كوردستانێ ب ئەركێ خوە رابن و پێكڤە ل هەمبەر سیاسەتا كرێت و دوور ژ رەوشتی یا بەغدا دەركەڤن.
گوهۆڕینێن نها ل دەڤەرێ تا رادەیەكێ پێگەهێ ئیراقێ و هێزێن سەر ب وێ ل رۆژهەلاتا ناڤین لاواز كرینە، ب هاتنا ترامپی گرۆپێن چەكدار یێن شیعە ل بەغدا نەوێرن چو لڤینان بكەن، ئەو یەك دەلیڤەكا گەلەك باشە بۆ كوردان، بلا تنێ جارەكێ هەموو فراكسیۆنێن كوردستانی یێن ل پەرلەمانێ ئێراقێ پێكڤە بێژن ئێدی بەسە، ئێدی ئەم ڤێ سیاسەتا بەغدا قەبوول ناكەین، هەكە بەغدا بەردەوامیێ بدەتە سیاسەتا برسیكرنا خەلكێ مە ئەم دێ خوە ژ پرۆسیسا سیاسی ل بەغدا ڤەكێشین، ئەز ب باوەرم هەكە هێزێن كوردی كارەكێ وەسا بكەن دێ بەغدا نەچار بیت دەست ژ ڤێ سیاسەتا خوە بەردەت، لێ مخابن هەتا هێزێن كوردی ل سەر سیاسەتا خوە یا نها بەردەوام بن و ب جهێ بەغدا بەردەوام هەولێرێ تومەتبار بكەن دێ سیاسەتا هێزێن شیعە ل دژی خەلكێ كوردستانێ ژی یا بەردەوام بیت.

ئـەڤین بـارزانـی

پشتی ژناڤچوونا رژێما بەشاری ل سووریێ دەلیڤەیەكا دیرۆكی بۆ كوردان هاتیە پێش، ب سالان رژێما بەشاری زۆرداری ل كوردان دكر، ل وی پارچەیێ كوردستانێ گەلەك كوردان ناسنامە ژی نەبوون، پشتی سالا ٢٠١١ ل سووریێ قۆناغەكا نوو دەستپێكر و كوردان شیان هەبوونا خوە بسەلمینن و ب ژناڤچوونا رژێما بەشاری ژی نها سووریێ بەر ب قۆناغەكا نوو ڤە دچیت و بێگومان د دەمەكێ وەسا دا د ئاستێ نێڤدەولەتی و هەرێمی پیلانێن گەلەك جودا جودا هەنە.
توركیا دڤێت سیستەمێ نوو یێ سووریێ ب تەمامی ل گۆر دلێ وێ بیت و نها توركیا دڤێت ب هەر رەنگێ هەی سیستەمەك وەسا ل سووریێ بهێتە ئاڤاكرن كو ل ژێر كۆنترۆلا وێ دا بیت و د هەمان دەمی دا توركیا یا رازی نینە كوردان ل سووریێ چو پێگەهەك هەبیت و ب هەموو رەنگەكێ دژبەریا مافێن رەوا یێن گەلێ كورد دكەت، لێ ل هەمبەر دا ئەمریكا، ئسرائیل و گەلەك وەلاتێن رۆژئاڤایی ژی پشتەڤانیا خوە بۆ مافێن رەوا یێن گەلێ كورد ل سووریێ دیار كرینە و نها رۆژ ب رۆژێ پشتەڤانیا بۆ كوردان ل سووریێ زێدەتر دبیت و ئەو یەك ژی بێگومان جهێ دلخوەشیێ یە.
لێ خالا هەری گرنگ كو نها بوویە جهێ دلخوەشیا هەموو كوردان هەلوەستێ دیرۆكی یێ سەرۆك بارزانی یە كو ب رەنگەكێ ئاشكرا دیار كر دڤێت كورد ل سووریێ بگەهنە مافێن خوە و ژ بۆ چارەسەركرنا ئاریشێن د ناڤبەرا هەر دو جڤاتێن كوردی دا ژی سەرۆك بارزانی جارەكا دی دەست ب بزاڤەكا مەزن و دیرۆكی كر، كۆمبوونا سەرۆك بارزانی ل گەل مەزلوم عەبدی بێگومان دەستپێكەكا دلخوەشكەرە بۆ هەموو كوردان ب تایبەتی ژی كوردێن رۆژئاڤایێ كوردستانێ.
ئاشكرایە د ئاستێ هەر چار پارچەیێن كوردستانێ دا سەرۆك بارزانی وەكو لێڤەگەرێ گەلێ كورد دهێتە قەبوول كرن و هەموو كورد ژی گوهداریا شیرەتێن جەنابێ سەرۆكی دكەن، چونكی سەرۆك بارزانی د چەند سالێن بۆری دا شیایە ب سیاسەتەكا حەكیمانە گەلەك مەترسیێن هەی ل سەر گەلێ كورد نەهێلیت و ژ بەر ڤێ یەكێ ژی یا نها سەرۆك بارزانی بۆ كوردێن رۆژئاڤایێ كوردستانێ دكەت گەلەك گرنگە و دڤێت هەموو كورد پشتەڤانیێ ل بزاڤێن سەرۆك بارزانی بكەت.
ئەمریكا و وەلاتێن ئێكەتیا ئۆرۆپا ژی نها كوردان وەكو هەڤپەیمانێ خوە دبینن، گەلەك جاران بەرپرسێن ئەمریكا و وەلاتێن ئێكەتیا ئۆرۆپا ب رەنگەكێ ئاشكرا دیار كرینە كو دڤێت كورد بگەهنە مافێن خوە، ژ بەر ڤێ یەكێ ژی نها ئێكەتیا هێزێن كوردی ل رۆژئاڤایێ كوردستانێ گەلەك یا گرنگە دا وەسا پێگەهێ كوردان بهێز كەڤیت و حسابەكا تایبەت بۆ كوردان بهێتە كرن، ل ڤێرێ رۆل و بزاڤێن سەرۆك بارزانی گەلەك گرنگن، چونكی د ئاستێ نێڤدەولەتی و رۆژهەلاتا ناڤین دا ژی نها ژ بۆ چارەسەریا پرسا كوردی هەر كەس چاڤەرێی نێرینێن تایبەت یێن سەرۆك بارزانی نە.
گرنگە هەموو هێزێن سیاسی یێن هەر چار پارچەیێن كوردستانێ، رێكخستنێن كوردی و كەسایەتیێن كاریگەر، رەوشەنبیر و زانایێن كورد ل هەموو جیهانێ پشتەڤانیا خوە بۆ بزاڤێن سەرۆك بارزانی دیار بكەن، چونكی رۆژ رۆژا ئێكەتیا كوردانە، رۆژا بهێزبوونا كوردانە، دیرۆكی ژی سەلماندیە هەر دەمێ كورد ئێكگرتی بن دێ بهێز كەڤن و وی دەمی دێ هەر كەس حسابەكێ بۆ كوردان كەت، لێ دەمێ كورد د ناڤا خوە دا پارچە بن بێگومان دێ لاواز بن و د گوهۆڕینێن نوو یێن ل دەڤەرێ دا ژی چو حسابەك بۆ كوردان ناهێتە كرن، سەرۆك بارزانی ئەڤ راستیە باش دیت و ژ بەر ڤێ یەكێ ژی دەست ب بزاڤەكا دیرۆكی بۆ بدەستڤەئینانا مافێن كوردان ل سووریێ كریە.