ئـەڤین بـارزانـی

ژ سالا ٢٠٠٣ و هەتا نها، پشتی هەلوەشاندنا ڕژێما بەعس، ئیراق د ناڤ زنجیرەیەكا قەیرانێن سیاسی یێن كویر و بەردەوام دا دژیت. ئەو هیڤیێن هەین كو ئیراق ببیتە وەلاتەكێ دیموكراتی و فیدرال، ب مخابنی ڤە د بن سیبەرا ناكۆكیێن مەزهەبی، دەستێوەردانێن دەرەكی و گەندەلیێ دا بەرزە بوون. د ناڤ ڤێ تابلۆیا ئالۆز دا، كورد وەكو پێكهاتەیەكێ سەرەكی نە تەنێ بەشەكن ژ كێشێ یان چارەسەریێ، بەلكو فاكتەرێ هەرە گرنگ یێ ڕاگرتنا هەڤسەنگیێ (بەلانسێ) نە.
ژێدەرێ ئالۆزیان بجهنەئینانا سیستەمێ فیدرالی یە، ئەگەرێ سەرەكی یێ ئالۆزیێن سیاسی ل ئیراقێ ڤەدگەریت بۆ سیستەمێ نها یێ سیاسی كو ئەو ژی بۆ هندێ ڤەدگەریت فیدرالیەت وەكو خوە ل ئیراقێ نەهاتە بجهئینان، هەر چەندە ئەڤ سیستەمە ل دەستپێكێ بۆ هندێ هاتبوو دانان كو هەموو پێكهاتە پشكدار بن، لێ د پراكتیكێ دا بوویە ئەگەرێ ئیفلیجبوونا دەولەتێ. ئالیێن شیعی د ناڤ خوە دا ل سەر پۆستێ سەرۆكوەزیران ناكۆكن، سوننە ژ بەر نەبوونا سەركردایەتییەكا بهێز لاواز بووینە، و ئەڤ یەكە داهێلیت كو حوكمەتێن ئیراقێ نەشێن خزمەتگوزاریان پێشكێش بكەن و سەروەریا وەلاتێ خۆ بپارێزن.
هەروەسا، دەستێوەردانێن وەلاتێن جیران و زلهێزێن جیهانی، گۆرەپانا سیاسی یا ئیراقێ كریە مەیدانا شەڕێ وەكالەتێ. ئەڤ ڕەوشە وەسا ل بڕیارێن سیاسی ل بەغدا دكەت كو نە ل دیڤ بەرژەوەندیێن خەلكێ ئیراقێ، بەلكو ل دیڤ ئەجێندایێن دەرەكی بهێنە دان.
ڕۆلێ كوردان: د ناڤبەرا هەڤسەنگی و پاراستنا دەستكەفتان دا
د ڤێ هەڤكێشەیا دژوار دا، كورد و هەرێما كوردستانێ خوەدان ڕۆلەكێ تایبەتن. ئانكو پرانیا جاران بێی ڕازیبوونا كوردان حوكمەت ل بەغدا ناهێنە پێكئینان. پۆستێ سەرۆككۆمارێ ئیراقێ بۆ كوردانە و ئەڤە ژی هێمایێ هەڤپشكیا كوردانە د دەولەتێ دا.
لێ ڕۆلێ كوردان تەنێ د پێكئینانا حكومەتان دا سنوردار نینە. سەركردایەتیا سیاسی یا كوردستانێ هەردەم بزاڤێ دكەت كو دەستوورێ ئیراقێ (دەستوورێ ٢٠٠٥) ببیتە بنەمایێ چارەسەریێ. لێ مخابن، دەسهەڵاتا ناڤەندی یا بەغدا گەلەك جاران پرەنسیپێن فیدرالیزمێ بنپێ دكەت.
كێشەیێن هەلاویستی: پەترۆل، بودجە و ئاخ
پەیوەندیێن هەولێر و بەغدا ل سەر سێ دۆسیەیێن سەرەكی ئاسێ ماینە:
١. دۆسیەیا ئابووری: كێشەیا هنارتنا مووچەیێن فەرمانبەرێن هەرێمێ و پشكا بودجەی بوویە كارتەكا فشارێ د دەستێ بەغدا دا ل دژی هەرێمێ. هەروەسا، یاسایا پەترۆل و غازێ هێشتا نەهاتیە دەرخستن، كو ئەڤ یەكە بوویە ئەگەرێ ناكۆكیێن مەزن و بڕیارێن دادگەها فیدرالی ل دژی سێكتەرێ پەترۆلا كوردستانێ.
٢. ماددێ ١٤٠: دەڤەرێن كوردستانی یێن ل دەرڤەی ئیدارەیا هەرێمێ (وەك كەركووك و شنگال) هێشتا چارەنڤیسێ وان نەهاتیە دیاركرن و گەلەك جاران تووشی عەرەبكرنێ دبن.
٣. سەروەری و ئەولەكاری: هەبوونا گروپێن چەكدار یێن نەیاسایی ل ئیراقێ گەفێ ل ئاساییشا هەرێما كوردستانێ دكەن.
گرنگیا ئێكڕێزیا ناڤخوەیی

بۆ هندێ كو كورد بشێن د ڤێ ئالۆزیا سیاسی دا ڕۆلێ خوە بپارێزن و مافێن خوە بدەستڤە بینن، ئێكڕێزیا د ناڤبەرا ئالیێن كوردی (ب تایبەتی پارتی و ئێكەتی) دا گەلەك یا گرنگە. دەمێ كورد ل بەغدا ب دو گۆتاران و دو دەنگان دئاخڤن، هەلوێستێ وان لاواز دبیت و ئالیێن بەرامبەر ڤێ یەكێ ل دژی بەرژەوەندیێن كوردستانێ بكار دئینن.
د ئەنجام دا، ئالۆزیێن سیاسی یێن ئیراقێ نە تەنێ دەمكی نە، بەلكو ئەنجامێ سیستەمەكێ شكەستی نە. ڕۆلێ كوردان د ڤێ قۆناغێ دا گەلەك هەستیارە؛ دڤێت ئەو هەڤسەنگییەكێ د ناڤبەرا پاراستنا قەوارەیێ هەرێما كوردستانێ و پشكداریا كارا ل بەغدا دا ببینن. ئارامیا ئیراقێ گرێدایی جێبەجێكرنا دەستووری و ڕێزگرتنا ل مافێن كوردانە، لێ یا گرنگتر ئەوە كو كورد ب ئێكدەنگی ڕووبڕوویێ ڤان تەحەدیان ببن. بێی چارەسەركرنا كێشەیێن هەولێر و بەغدا، ئیراق دێ هەر د ناڤبەرا قەیرانان دا مینیت.

ئەڤین بارزانی

ئێرشا ڤێ دووماهیێ ل سەر بنگەهێ غازا كورمور بەردەوامیا سیاسەتا دۆرپێچكرنا هەرێما كوردستانێ یە، بەردەوامیا سیاسەتا لاوازكرنا پێگەهێ ئابووری یێ هەرێما كوردستانێ یە، یێن ئێرشی كورمور كرین هەمان ئەون یێن ب سالانە مووچەی وەكو كارتەكێ ل دژی هەرێما كوردستانێ بكار دئینن و دخوازن ب سیاسەتا برسیكرنێ وەسا بكەن دا هەرێما كوردستانێ خوە رادەست بكەت.
ئێرشا ل سەر كورمور د دەمەكێ دا هاتە كرن كو پڕانیا هەرێما كوردستانێ ببوو خوەدان كارەبا ٢٤ دەمژمێری و ژیانا خەلكی گەلەك خوەش ببوو، لێ دیسان دلێن رەش و دەستێن پیس نەهێلان دا خەلكێ كوردستانێ د خوەشیا دا بن و ئێرشی بنگەهێ غازێ كرن و بوونە ئەگەر كارەبا پڕانیا هەرێما كوردستانێ كێم ببیت، ئێرشا كورمور سەلماند كو دژبەر و نەیارێن هەرێما كوردستانێ ناخوازن هەرێما كوردستانێ پێشكەڤیت، یێن هەتا دوهی هەرێما كوردستانێ تاوانبار دكرن كو بوویە ئەگەر ئیراق مووچەی رەوانە ناكەت نزانم كا نها وان چ هەیە بێژن، چونكی هەرێما كوردستانێ ل گۆر دستوورێ ئیراقێ یا ل سەر ملێن خوە بجه ئینایە، لێ دیسان بەهانەیێن بەغدا تەمام نابن و ئێرشا كورمور سەلماند كو مەترسی ل سەر ژێدەرێن ئابووری یێن كوردستانێ دێ بەردەوام بن و دڤێت هەرێما كوردستانێ هزر د رێیەكا ستراتیژی و بنگەهین بكەت دا ئێدی ئێرشی كورمور و جهێن دی یێن ئابووری نەهێنە كرن.
لێ ئێرشا كورمور و سیاسەتا برسیكرنێ ل هەمبەر هەرێما كوردستانێ شكەستنێ ئیناینە، چونكی هەرێما كوردستانێ خوەدان سەرۆك وەزیرەك خۆراگرە و هەتا نها شیایە ل هەمبەر گەفان و ئێرشان ل ئالیەكێ هەرێما كوردستانێ بپارێزیت و ل ئالیێ دی ژی بەردەوامیێ بدەتە كاروانێ ئاڤەدانیێ، یێن ل بەغدا گەلەك حێبەتی ماینە كا چاوا سەرەرای نەبوونا بۆدجەی، لێ مەسرور بارزانی شیایە گەلەك پرۆژەیێن سراتیژی ئەنجام بدەت، ئەو یەك د دەمەكێ دایە كو ب ملیار دۆلاران پارە ل بەر دەستێ بەرپرسێن حوكمەتا ئیراقێ هەنە لێ نەشیاینە كێمترین خزمەتگوزاری بۆ دەڤەرێن دی یێن ئیراقێ دابین بكەن، ئەوا نها ل هەمبەر هەرێما كوردستانێ دهێتە كرن د راستی دا نیشا ددەت وان نەڤێت كوردستانێ پێشكەڤیت.
لێ جهێ داخێ یە كو ل هەرێما كوردستانێ ژی هندەك هێز و كەس هەنە ژ بۆ بەرژەوەندیێن خوە یێن تەنگ دژبەریا پرۆژەیێن رێزدار مەسرور بارزانی دكەن و ب جهێ پشتەڤان بن هەردەم دخوازن ئاستەنگان ژی دروست بكەن، براستی ژی جهێ داخێ یە كو هێزەك د ناڤ حوكمەتێ دا بیت و بخوازیت ئاستەنگان ل هەمبەر پرۆژەیەكا ستراتیژی وەكو پرۆژەیێ رۆناهی دروست بكەت كو خەونا ب سالان یا خەلكێ كوردستانێ یە كو كوردستان ببیتە خوەدانا كارەبا ٢٤ دەمژمێری، لێ دیسان بەهانەیێن وان تەمام نەبووینە و هەروەسا گەفا بڕینا غازێ دكرن، ئانكو یا هندەك هێزێن ناڤخوە ل هەمبەر پێشكەفتنا هەرێما كوردستانێ دروست دكەن ژ یا دوژمنێن گەلێ كوردستانێ كێمتر نینە و ئەو یەك جهێ داخێ یە.
لێ د كەلتورێ پارتی و مالا بارزان دا هەردەم خۆراگری و سەركەفتن هەبوویە، پارتی شیایە ل هەمبەر هەموو ئاستەنگان كوردستانێ ئاڤا بكەت و ئەڤرۆكە ژی مەسرور بارزانی بەردەوامیێ ددەتە كاروانێ ئاڤەدانیێ و سەرۆك وەزیرێن خۆراگر یێ رژدە كوردستانێ بكەتە ئێك ژ دەڤەرێن هەرێ پێشكەفتی ل رۆژهەلاتا ناڤین، ڤێجا گرنگە ئەم ژی وەكو وەلاتی ب هەموو رەنگەكێ پشتەڤانێ جەنابێ سەرۆك وەزیرێن خۆراگر بین.

ئەڤین بارزانی

هەكە ئەم بەرێ خوە بدەینە پرۆسیسا سیاسی یا پشتی سالا ٢٠٠٣ هەتا نها ل ئیراقێ بۆ مە دیار دبیت كو گەلەك پیلان ل بەغدا ل دژی هەرێما كوردستانێ هاتنە گێران، هێزێن شیعە ب هەموو رەنگەكێ كار كرن دا هەرێما كوردستانێ نەمینیت، یا ژ دەستێ وان دهات ئەنجام دان، لێ ل هەمبەر پیلانێن وان ب سەرۆكاتیا رێبەرێ كوردان سەرۆك مەسعود بارزانی بەرخوەدانەك مەزن هاتە كرن و د ئەنجام دا مە دیت كا چاوا هەموو پیلانێن بەغدا هاتنە ژناڤبرن، ئەڤرۆكە ژی هەكە ژ دەستێ وان بهێت دخوازن تشتەك ب ناڤێ هەرێما كوردستانێ نەمینیت.
بەغدا هەموو كارتێن هەی ل دژی هەرێما كوردستانێ بكار ئینا، مخابن ل هەرێما كوردستانێ ژی هندەك هێز ژ بۆ بەرژەوەندیێن خوە هاریكاریا بەغدا كرن و نها ژی دكەن، لێ سەرۆك بارزانی ب ئاشكرا گۆت كەس نەشێت ئیرادەیا گەلێ كوردستانێ ژناڤ ببەت، هەر كەس دزانیت ل هەرێما كوردستانێ تنێ ئێك هێز هەیە كو ئارمانجا وێ كوردستانە، ئارمانجا وێ ئاڤاكرنا دەولەتا كوردی یە، ئارمانجا وێ دابینكرنا ژیانەكا باشە بۆ خەلكی، ئەو ژی پارتی دیموكراتی كوردستانە، ئانكو هەتا پارتی هەبیت دێ كوردستان هەبیت، دێ ئیرادەیەكا بهێز ل دژی دوژمنان هەبیت، ژ بەر ڤێ یەكێ ژی گرنگە د ڤێ قووناغا هەستیار دا ئەم هەموو هەست ب بەرپرسیاریا خوە ل هەمبەر وەلاتێ خوە بكەین و پشتەڤانیێ ل لیستا سەرۆك بارزانی بكەین، لیستا ٢٧٥ نوونەراتیا كوردان دكەت و گرنگە ئەم ژی دەنگێ خوە بدەینە لیستا ٢٧٥.
ل ئالیێ دی نها ل رۆژهەلاتا ناڤین گوهۆڕینێن بلەز و مەزن روو ددەن، هەموو ئالی دخوازن جارەكا دی وەكو سەدسالا بیست كورد بێی ماف بمینن، لێ تنێ هێزا ل هەمبەر پیلانێن دوژمنان شەڕی بۆ مافێن رەوا یێن گەلێ كوردستانێ دكەت پارتی دیموكراتی كوردستانە، بهێزبوونا پارتی ل بەغدا دێ بیتە ئەگەرێ بهێزبوونا پێگەهێ كوردان نە تنێ ل ئیراقێ بەلكو ل هەموو رۆژهەلاتا ناڤین، كوردێن پارچەیێن دی یێن كوردستانێ ژی هەردەم پشتەڤانیا پارتی و سەرۆك بارزانی دكەن، چونكی ژی باش دزانن هەتا پارتی هەبیت و بهێز بیت دێ بەرەڤانیێ ل هەموو كوردان كەت.
دڤێت پارتی بهێزتر ژ جاران بچیتە بەغدا چونكی ل پێشیا مە قووناغەكا گەلەك هەستیار هەیە، پرۆژەیێ نەفت و گازێ دێ چیتە پەرلەمانێ ئیراقێ و گرنگە پارتی ل وێرێ بهێز بیت دا بشێت بەرگریێ ل مافێن رەوا یێن مە هەموویان بكەت، پارتی هەر ژ رۆژا هاتیە دامەزراندن هەتا نها ئارمانجا وێ دابینكرنا ژیانەكا خوەش بۆ خەلكێ كوردستانێ بوویە، ژ بەر ڤێ یەكێ ژی هەم د شەڕێ ل دژی داعشێ و حەشدێ و هەم ژی ل بەغدا دا پارتی شەڕ بۆ مانا كوردستانێ كریە، هەكە ئەم بەرێ خوە بدەینە خالێن مە ل سەری دیار كری بۆ مە هەموویان دیار دبیت تنێ هێزا بشێت بەرگریێ ل كوردستانێ بكەت پارتی دیموكراتی كوردستانە، ڤێجا ئەڤە و گەلەك خالێن دی هەنە كو وەسا دكەن ئەم ب هەموو هێزا خوە پشتەڤانیێ ل لیستا سەرۆك بارزانی بكەین، سەركەفتنا پارتی د ڤان هەلبژارتنێن گرنگ دا سەركەفتنا ئیرادەیا گەلێ كوردستانێ یە.

ئەڤین بارزانی

كاریزما چەمكەكە كو ب تنێ د ناڤ هێز و گۆتوبێژان دا كورت نابیت؛ كاریزما واتا وێ یە كو شیانێ هندێ هەبیت دەست ل دلی و باوەریا خەلكی بدەت. ناڤێ مەسعود بارزانی د دیرۆكا كوردستانێ دا هەردەم ناڤەك گەش بوویە، سەركردەیەك كو كاریزمایا وی ژ ناڤ دلی خەلكی دەرهاتیە و ب ئێش و ئومێدێن وانڤە گرێدایە.
مەسعود بارزانی كوڕێ خێزانەكێ یە كو سەركردایەتی وەك میراتەكێ ئەخلاقی و مرۆڤی نەوە ب نەوە ڤەگۆهاستیە. بابێ وی، مەلا مستەفا بارزانی، ب خوە ئێك ژ سەركردێن كاریزما یێ سەدسالا بیستێ بوو؛ زەلامەك بوو كو شەرێ وی بۆ ئازادیێ و جوانكرنا تاكێ كورد و بۆ مرۆڤایەتیێ بوو و سیاست ب وەلاتیبوونا خەلكی رۆمەتدار كر. مەسعود بارزانی ل دەڤ وی فێر بوو كو سەركردایەتی ب دووركەفتنا ژ خەلكی چێنابت، بەلكو ب نێزیكبوونێ ژ وان دهێتە ئاڤاكرن.
لێ كاریزمایا مەسعود بارزانی ب تنێ میراتێ بابێ وی نینە؛ بەلكو بەرهەمێ ب سالان یێ كەد و خەباتا وی بوویە، كاریزمایا وی ل چیا ل گەل پێشمەرگان دۆستانەیە و ل پایتەختێن جیهانێ دبلۆماتكارەك بهێزە. ئەوی نیشاندا كو دێ شێی كوڕێ بەرخۆدانێ بی و ب هەڤڕا زمانێ دبلۆماسیا جیهانێ تێبگەهی. ئەڤ ڤەگۆهاستنە ژ كاریزمایا مەیدانی بۆ كاریزمایا جیهانی، مەسعود بارزانی كرە رۆخسارەكێ بێ وێنە ل رۆژهەلاتا ناڤین.
تایبەتمەندیا كاریزمایا بارزانی د كەسایەتیا وی یا جوان و مرۆڤایەتیا وی دایە. د دیتن و بێدەنگیا وی دایە، د هندێ دایە كو هەردەم پێشمەرگە یە، د گۆهدان ل ئێش و خەمێن دایكەكا دلسۆتی دایە، و د رێزگرتن ل كەلتورێ كوردی دا، كاریزمایەك دهێتە دیتن كو ژ وێڤەتر سیاسەتێ یە. ئەو سەركردەیان دئینتە بیرا مە كو هێزا وان د راستگۆیی و باوەریێ دانە، نە د نمایش و درووشمان دا.
ئەڤ كاریزمایە شیایە پارتی دیموكراتی كوردستانێ بكەتە سیمبولەكێ مەزن د قەیرانان دا، بۆ خەلكی ببیتە ژێدەرەكێ مەزن یێ ژیانێ و خەلك هەردەم پشتا خوە ب پارتی گەرم دكەن. ل سەر ئاستێ جیهانی ژی، كاریزمایا بارزانی كوردستان چەندین جاران ئینایە سەر ئارمانجێن سەرەكی؛ نە ب توندوتیژیێ، بەلكو ب رێزگرتنێ.
ئەڤرۆ كاریزمایا مەسعود بارزانی ب تنێ د ناڤ وی دا كورت نابیت؛ بەلكو بۆ میراتەكێ كەلتوری و سیاسی بۆ نەوەیێن داهاتی گۆهۆڕیە. میراتەك كو فێر دكەت سیاسەت دشێت ببیتە گۆڕەپانا وەلاتیبوون و رۆمەتێ، نە ب تنێ مامەلە و دەستهەلاتخوازی.

مەسعود بارزانی نموونەیەكێ بێ وێنە یە ژ سەركردایەتیا كاریزماتیك؛ سەركردەیەك كو شیا سیاسەتێ بۆ ئاستەكێ مرۆڤی بلند بكەت. كاریزمایا وی د جانێ خەلكی دا هاتیە نەخشاندن و هەر ئەڤە رازێ مان و نەمانا وی یە؛ چونكی هەتا ئەگەر رۆژەكێ ژ گۆڕەپانێ دوور بكەڤیت، كاریزمایا وی هەردەم د دلی نەتەوا وی دا ساخ دێ مینیت.

ئەڤین بارزانی

رەوشا سووریێ گەلەك ئالۆزە، دو سیاسەتێن جودا د ئاستێ هەرێمی و نێڤدەولەتی دا سەبارەت ب پاشەرۆژا سووریێ هەنە، یا ئێكێ ئەمریكا و ئسرائیل كو ژ بەر پێگەهێ ستراتیژی یێ ئسرائیلێ ل رۆژهەلاتا ناڤین و هەڤپەیمانیا وێ ل گەل ئەمریكا نها وەسا دكەت ئەمریكا نەشێت دژبەریا سیاسەت و ستراتیژیا ئسرائیلێ ل سووریێ بكەت، ئسرائیل ل دژی هەبوونا دەولەتا بهێز و ناڤەندی یە ل سووریێ، ئسرائیلێ دڤێت كورد و دورزی ل سووریێ ببنە خوەدان هەرێم و هەروەسا شام ژی دەستهەلاتەكا لاواز هەبیت، ژ بیر نەكەین هەر زوو پشتی ژناڤچوونا رژێما بەشاری ئسرائیلێ سیستەمێ بەرگریێ، چەكێن گران و سیستەمێ دەریایی یێن سووریێ هەموو ژناڤبرن.
ئەمریكا پشتەڤانیێ ل ئسرائیلێ دكەت لێ د هەمان دەمی دا ئارامیێ ل سووریێ ژ بۆ ئەمریكا گەلەك یا گرنگە، ئەمریكا دڤێت كورد و دورزی بگەهنە مافێن خوە، لێ هەتا نها ژی سیاسەتا ئەمریكا ل دۆر مافێن كوردان ل سووریێ یا زەلال نینە و هەموو داخویانیێن بەرپرسێن ئەمریكا سەبارەت ب سووریێ د چارچۆڤەیێ شەڕێ ل دژی داعشێ دایە و ئەو یەك ژی وەسا كریە د كۆمبوونێن گرنگ یێن سەبارەت ب پاشەرۆژا سووریێ وەكو پێدڤی بەحسێ چارەنڤیسێ كوردان ناهێتە كرن.
ل هەنبەر سیاسەتا ئسرائیلێ سیاسەتەكا دی ل سووریێ هەیە كو توركیا سەركێشیا وێ دكەت، ژ بۆ توركیا گرنگە ل سووریێ ئەحمەد شەرع ل سەر دەستهەلاتێ بیت، سیستەم یا ناڤەندی بیت و كورد ژی وەكو وەلاتیێن سووریێ ب ئارامی ل وی وەلاتی بژین، ئانكو ب كورتی توركیا ل دژی ڤێ یەكێ یە كورد ل سووریێ خوەدان هەرێما خوە بن، خوەدان هێزەكا چەكدار بن، توركیا هەموو كارتێن خوە ل دژی ڤێ یەكێ بكار دئینیت و دبیت د كۆمبوونا ٢٥ ڤێ مەهێ یا ئەردۆغانی دا ل گەل ترامپی ژی گەلەك تشت روو بدەن كو ب دلێ كوردێن سووریێ نەبیت، ڤێجا ل ڤێرێ گرنگە كورد ل سووریێ كو نها تا رادەیەكێ باش د ناڤ خوە دا ئێكگرتی نە، بزانن كا دێ چاوا سەرەدەریێ ل گەل رەوشا نها ل سووریێ كەن، بێگومان كوردان ژی پشتەڤان هەنە، ئەمریكا ل دژی مافێن كوردان نینە و ل ئالیێ دی نها ل سووریێ هێزا ئێكێ یا بریاردانێ نە توركیا یە و نە ژی ئەمریكا، د پراكتیكێ دا ئسرائیل خوەدان بریارە، ئسرائیل ژی ل دژی مافێن گەلێ كورد ل سووریێ نینە و هەكە كوردان ستراتیژیەكا راست و دروست ل سووریێ هەبیت و بزانن ل گۆر راستیێن هەی كار بكەن دێ شێن گەلەك پیلانێن هەی ژناڤبەن.
ئاشكرایە سەرۆك بارزانی گەلەك بزاڤان دكەت دا چو مەترسی ل سەر رۆژئاڤایێ كوردستانێ دروست نەبن، هەبوونا رۆژئاڤایێ كوردستانێ ژ بۆ هەرێما كوردستانێ و ب گشتی ژ بۆ پاشەرۆژا كوردان گەلەك یا گرنگە، ژ بەر ڤێ ئێكێ ژی دڤێت هەموو هێز و ئالیێن سیاسی یێن هەر چار پارچەیێن كوردستانێ پشتەڤانیێ ل رۆژئاڤایێ كوردستانێ بكەن، پشتەڤانیا سیاسی یا هەموو هێزێن كوردی دێ كاریگەریا خوە هەبیت، بهێزبوونا رۆژئاڤایێ كوردستانێ دێ بیتە ئەگەرێ گوهۆڕینێن گەلەك باش ل سووریێ و بێگومان هەكە كورد ل سووریێ بهێز بن ئەو یەك دێ بیتە ئەگەرێ بهێزبوونا پێگەهێ كوردان ل رۆژهەلاتا ناڤین.

ئەڤین بارزانی

هەكە ئەم بەرێ خوە بدەینە سەد سالێن بۆری چو دەمەكێ وەكو نها دوژمنێن كوردان لاواز نەبووینە، دو وەلاتێن داگیركەرێن كوردستانێ ئانكو سووریێ و ئیراق نها د رەوشەكا گەلەك لاواز دانە و ل ئیرانێ و توركیا ژی دەستهەلات د ناڤ ناكۆكیێن گەلەك مەزن دانە، لێ مخابن كورد د ناڤ خوە دا ئێكگرتی نینن كو بشێن دەلیڤەیێن هەی باش بكار بینن و ئێدی ببنە هێزەكا هەری كاریگەر ل رۆژهەلاتا ناڤین.
بەرۆڤاژی هندەك كەسان كو وەسا دبینن دەستهەلاتا نها یا بەغدا بهێزە و دژبەریا كوردان دكەت راستی وەسا نینە، بەغدا گەلەك یا لاوازە و ئەو یەك د دەمەكێ دایە كو پێگەهێ كوردان ل ئیراقێ باشە، لێ ناكۆكیێن ل هەرێما كوردستانێ وەسا كرینە بەغدا بهێز دهێتە بەرچاڤ، ئانكو هندەك هێز ل هەرێما كوردستانێ ژ بۆ بەرژەوەندیێن خوە یێن تەنگ هەردەم وەسا نیشا ددەن كو بەغدا یا بهێزە و دڤێت هەرێما كوردستانێ هەموو تشتێن بەغدا دڤێت بجه بینیت، ئەو یەك د دەمەكێ دایە كو نیەتا بەغدا چارەسەركرنا پرسێن نها نینە، بەلكو هەر دەستهەلاتەك ل بەغدا كار بۆ ڤێ یەكێ دكەت هەرێما كوردستانێ و ناكۆكیێن هەی بۆ كۆمكرنا دەنگان بكار بینیت، یا نها سودانی دكەت بەردەوامیا سیاسەتا بەری نها یا مالكی و عەبادی یە.
هەكە ئەم بەرێ خوە بدەینە دو سالێن دووماهیێ براستی ژی حوكمەتا هەرێما كوردستانێ ب سەرۆكاتیا بەرێز مەسرور بارزانی گەلەك بزاڤ كرن كو پرسێن هەی ل گەل بەغدا ب رێیا دانوستاندنان چارەسەر بكەت، ب سەدان شاندێن هەرێمێ چوونە بەغدا و بەرپرسێن بەغدا ژی گەلەك جاران سۆز دان كو دێ پرسا مووچێ فەرمانبەرێن كوردستانێ چارەسەر بیت، لێ هەتا نها ژی رەوش وەكو خوە مایە، ئانكو هەر جارێ بەهانەیەكێ دئینن دا هەرێما كوردستانێ و رایا گشتی یا خەلكێ كوردستانێ ب بابەتێ مووچەیی ڤە مژوول بكەن و ئەو یەك سیاسەتا بەغدایە ل هەمبەر هەرێما كوردستانێ، مخابن هندەك هێز ل هەرێما كوردستانێ ژی هاریكاریا سیاسەتا بەغدا كرینە و ئەو یەك ژی بوویە ئەگەر بەغدا بەردەوامیێ بدەتە سیاسەتا برسیكرنێ و زێدەباری دەستێوەردانێن دەرەكی كو پرسا مووچەیی چارەسەر بیت لێ هەتا نها ژی رەوش هەر یا ئالۆزە.
د دەمەكێ وەسا دا دڤێت ئێدی هەرێما كوردستانێ بریارا خوە بدەت، ئەز باوەرم ناكەم ل هەرێما كوردستانێ ژ بلی هندەك هێزێن بناڤ ئۆپۆزسیۆن كو كارێ وان هەردەم دژبەریا هەرێما كوردستانێ یە، چو كەسێن دی ژ رەوشا نها رازی بن، ئانكو هەكە پێكڤەكاركرن هەبیت و هێزێن سیاسی ب تایبەتی ژی یێن نها ژ بەغدا توورە نە پێكڤە هەلوەستێ نیشا بدەن و جڤاكێ نێڤدەولەتی ژی ئاگەهدار بكەن و د ئاستێ جیهانی دا رەوشا هەی بگەهیننە وەلاتێن دوستێن هەرێما كوردستانێ دێ رەوش هێتە گوهۆڕین، دڤێت ژبیر نەكەین گەلەك وەلاتێن جیهانێ پشتەڤانیێ ل هەرێما كوردستانێ دكەن و هەكە كارەك باش بهێتە كرن دێ فشارەكا گەلەك زێدە ل بەغدا هێتە كرن و دێ بەغدا نەچار بیت دەست ژ سیاسەتا خوە یا برسیكرنا خەلكێ كوردستانێ بەردەت، ئانكو بریار ل هەولێرێ یە، ڤێجا دڤێت لەز د بریاردانێ دا بهێتە كرن، چونكی رەوشا ژیانا خەلكی باش نینە و ئەز باوەرم هەر بریارەكا حوكمەتا هەرێمێ و هێزێن كوردستانی ل دژی بەغدا بدەن دێ خەلك ب هەموو هێزا خوە یا پشتەڤان بیت و ئەو یەك ژی بێگومان گەلەك یا گرنگە.

ئەڤین بارزانی

یاسا حەشدا شەعبی بوویە ئاریشەیەكا گەلەك مەزن بۆ ئیراقێ، ئەمریكا ب فەرمی گەف ل ئیراقێ كرینە كو ب چو رەنگەكێ رێ نادەت ئیراق كارەكێ وەسا بكەت، چونك تێپەراندنا یاسایەكا وەسا دێ ئیراقێ زێدەتر كەتە ژێر كاریگەریا ئیرانێ و ژ بەر ڤێ یەكێ ژی ئەمریكا رێ نادەت تشتەك وەسا روو بدەت، ل ئالیێ دی ئیران و چەكدارێن حەشدا شەعبی ژی گەفان دكەن و دخوازن ب رێیا یاسایەكا وەسا خوە ب فەرمی بكەنە پشكەك ژ سیستەمێ سیاسی ل ئیراقێ و بێگومان هەكە تشتەك وەسا روو بدەت دێ ئیراق تووشی قەیرانەكا گەلەك مەزن بیت.
رژدبوونا مالكی و سەركردەیێ دی یێن ئیراقێ بۆ قانوونا حەشدا شەعبی ڤێ راستیێ نیشاددەت كو وان دڤێت ب وی رەنگی رێگریێ ل هلوەشاندنا حەشدا شەعبی بكەن، چونكی دەمەكە ئەمریكا ب ئاشكرا دبێژیت پێدڤیە گرۆپێن چەكدار ل ئیراقێ نەمینن، ئیراقێ لەشكرێ خوە هەیە و پێدڤیا ئیراقێ ژی ب گرۆپێن چەكدار نینە، ب تایبەتی ژی گرۆپێن چەكدار یێن كو سەر ب ئیرانێ نە و چو وەفایەكا وان بۆ ئیراقێ ژی نینە، نها ژ ئالیێ سەركردەیێن ئیراقێ ژی داخوازا هلوەشاندنا حەشدێ دهێتە كرن، سەدری گەلەك جاران دیار كریە پێدڤیا ئیراقێ ب گرۆپێن میلیشا نینە و دڤێت بهێنە هلوەشاندن.
گەفێن ئەمریكا و فشارێن ل سەر سودانێ وەسا كرینە هەكە چارەسەریەكا گونجای نەهێتە دیتن دێ ئیراقێ تووشی قەیرانەكا گەلەك مەزن بیت، چونكی بەری دەمەكێ بەرپرسێن ئەمریكا ب ئاشكرا گەف ل ئیراقێ كرینە كو دڤێت حەشد بهێتە هلوەشاندن و هەكە تشتەك وەسا نەهێتە كرن دێ ئەمریكا ئیراقێ سزا دەت، هەكە ئەمریكا دەست ب سزادانا ئیراقێ بكەت دێ چ روو دەت؟ ئاشكرایە ئەمریكا دشێت ب رێیا سزایێن ئابۆری ئیراقێ تووشی قەیرانەكا گەلەك مەزن بكەت، چونكی ل ئیراقێ هەتا نها ژی سەقامگیریا ئابۆری نینە، رەوشا سیاسی یا ئالۆزە و هەر سزایەك ژ ئالیێ ئەمریكا ڤە ل سەر ئیراقێ بهێتە سەپاندن دێ رەوشا ئیراقێ ژ ئالیێ سیاسی و ئابۆری ڤە گەلەك خراب بیت و ژ بەر ڤێ یەكێ ژی نها هەموو كەس چاڤەرێنە كا دێ سودانی وەكو كەسێ ئێكێ یێ دەستهەلاتدار ل ئێراقێ شێت ڤێ مەترسیا گەلەك مەزن ژ ئیراقێ دوور كەت یان نە؟
كورد و سوننە و پشكەك ژ هێزێن شیعە دزانن كا هندەك هێزان ب رێیا یاسایەكا وەسا دڤێت ئیراقێ تووشی چ كارەساتەكێ بكەن، لێ خالا گرنگ ئەوە ئایا بەرپرسێن ئیراقێ هەست ب ڤێ یەكێ ناكەن د رەوشەكا وەسا یا گەلەك ئالۆز دا ئیراق نەشێت ل هەمبەر فشار و سزایێن ئەمریكا خوە راگریت، د دەمەكێ دا گەلەك مەترسی ل سەر ئیراقێ هەنە و ئیراقێ ژ بلی داهاتێ نەفتێ چو داهاتێن دی نینن و داهاتێ نەفتێ ژی هەموو ب رێیا بەنكێن ئەمریكی دهێتە ئیراقێ، وی دەمی بۆچی هندەك ژ بەرپرسێن ئیراقێ دخوازن ب یاسایەكا وەسا ئیراقێ تووشی قەیرانەكا گەلەك مەزن بكەن؟

ئـەڤین بـارزانـی

روودانێن گەلەك بلەز ل رۆژهەلاتا ناڤین روو ددەن، ئالۆزیێن نها ل سووریێ و شەڕێ ئیرانێ و ئسرائیلێ سەلماند كو رەوشا ئالۆز یا دەڤەرێ دێ بەردەوام بیت، د هەمان دەمی دا دەمەكە ئەمریكا ب رەنگەكێ ئاشكرا داخواز ژ حوكمەتا سۆدانی دكەت، كو دڤێت حەشدا شەعبی ل ئیراقێ بهێتە هلوەشاندن و ل هەمبەر دا گرۆپێن سەر ب حەشدا شەعبی دەمەكە ل ئیراقێ ئالۆزیان دروست دكەن و ئێرشی كۆمپانیێن پەترۆلێ یێن ئەمریكی ل هەرێما كوردستانێ كرن، ئانكو ب رەنگەكێ ئاشكرا حەشدا شەعبی شەڕێ بەرژەوەندیێن ئەمریكا دكەت و بەری چەند رۆژان ژی دیسان گرۆپێن سەر ب حەشدا شەعبی ل بەغدا ل هەمبەر گوهۆڕینا رێڤەبەرێ خوە شەڕێ هێزێن ئێمناهیێ ژی كرن.
كاریگەریا گرۆپێن چەكدار ل سەر ئیراقێ گەلەك خرابە، گرۆپێن چەكدار ئانكو ب رەنگەكێ ئاشكرا بێژین حەشدا شەعبی حوكمێ ل ئیراقێ دكەت، هەر بریارەك ب دلێ وان نەبیت دێ ئالۆزیان دروست كەن، ئەو یەك د دەمەكێ دایە كو پارەیەك گەلەك زێدە بۆ وان هاتیە تەرخانكرن، ئەرێ دەمێ ئیراقێ لەشكرێ خوە هەیە بۆچی دڤێت گرۆپێن چەكدار هەبن، هەبوونا ڤان گرۆپێن چەكدار د دەمەكێ دا كو گوهداریا فەرمانێن سەرۆك وەزیران و فەرماندارێ گشتی یێ هێزێن چەكدار ناكەن دێ بیتە مەترسیەكا گەلەك مەزن و سوباهی ئەو دشێن كۆدەتایەكا سەربازی ژی ل دژی حوكمەتا ئیراقێ بكەن.
گەلەك بەحسێ ناكۆكیێن د ناڤبەرا هەولێر و بەغدایێ دا دهێتە كرن، ئەرێ بۆچی هەتا نها ناكۆكیێن مە وەكو هەرێما كوردستانێ ل گەل بەغدایێ نەهاتینە چارەسەركرن؟، ئەرێ مە پرسیار ژ خوە كریە كا كینە یێن ناهێلن پرسێن هەی بهێنە چارەسەركرن، بۆچی هندەك هێز ئاستەنگان دروست دكەن، بێگومان دەمێ ئەم بەرێ خوە بدەینێ دیار دبیت دیسان هەمان گرۆپێن چەكدارن كو ناخوازن پەیوەندیێن هەرێما كوردستانێ ل گەل حوكمەتا بەغدا باش بیت، سودانی گەلەك جاران دبێژیت ئەو ب سەرێ خوە نەشێت گەلەك بریاران بدەت، ب تایبەتی ژی بریارێن ل دۆر هەرێما كوردستانێ، دبێژیت ئەو نەشێت دستووری بنپێ بكەت، لێ دەمێ بابەت دبیتە چەكدارێن حەشدا شەعبی سۆدانی هەر نزانیت كا دەستوور چیە، ئەو یەك ژی نیشا ددەت سۆدانی نەشێت ل هەمبەر گۆتنا بەرپرسێن حەشدا شەعبی بئاخڤیت، ئانكو یێ حوكمێ ل سودانی دكەت حەشدا شەعبی یە و وان ژی ب چو رەنگەكێ نەڤێت پرسێن نها د ناڤبەرا هەرێما كوردستانێ و بەغدا دا بهێنە چارەسەركرن، ئالۆزیێن هەی د بەرژەوەندیا وان دانە.
بەرپرسێن ئەمریكی هەتا نها گەلەك جاران ل دۆر مەترسیا گرۆپێن چەكدار یان ژی ئەم بێژین حەشدا شەعبی هوشداری داینە بەغدا، لێ دیارە سۆدانی نەشێت وان گرۆپان هلوەشینیت، د پاشەرۆژێ دا دێ گرۆپێن حەشدا شەعبی ئاریشەیێن گەلەك مەزن بۆ پرۆسیسا سیاسی ل ئیراقێ دروست كەن، دیارە مالكی وەكو كەسەك ب هێز ب هەموو رەنگەكێ د گەل هندێ دایە كو حەشدا شەعبی بمینیت، چونكی ئەو گرۆپێن چەكدار د دەمێ پێدڤی دا بۆ بەرژەوەندیێن خوە بكاردئینن، لێ ئەڤرۆكە نەبیت ژی سوباهی دێ گرۆپێن چەكدار ل ژێر كۆنترۆلێ دەركەڤن و دێ بنە مەترسیەكا گەلەك مەزن بۆ ئیراقێ.

ئەڤین بارزانی

كابینەیا نەهێ یا حوكمەتا هەرێما كوردستانێ ب سەرۆكاتیا مەسرۆر بارزانی شیا د رەوشەكا گەلەك سەخت و دژوار دا دەست ب كارێ خوە بكەت و هەردەم شیا گەلەك ئاستەنگان ژی دەرباز بكەت، ل ئالیێ گەشەپێدانا ئابووری، خزمەتگوزاری و پەیوەندیێن دبلۆماسی ژی شیا گەلەك كارێن باش بكەت، لێ جهێ داخێ یە كو ب جهێ هاریكاریا كابینەیا نەهێ بهێتە كرن هێزێن بناڤ ئۆپۆزسیۆنێ هەردەم ئاریشە دروست كرن و ل ئالیێ دی بەغدا ژی ب هەموو شیانێن خوە خواست ئاستەنگان ل هەمبەر پێشڤەچوونا هەرێما كوردستانێ دروست بكەت، لێ سەرۆكێ حوكمەتێ سەلماند كابینا وی شیایە ئاستەنگان دەرباز بكەت و خزمەتا هەموو وەلاتیان بكەت.
ئێك ژ كارێن هەری بەرچاڤ و گرنگ یێ كابینەیا نەهێ دروستكرنا رێیێن هاتنوچوونێ بوو، كابینا نەهێ شیا ٢،٦٨٠ كیلومیتر جادەیێن ناڤخوەیی و رێیێن گرنگ یێن د ناڤبەرا باژێرێن كوردستانێ دا دروست بكەت و خزمەتەكا گەلەك مەزن پێشكێشی كوردستانێ بكەت، پرۆژەیێن مەزن یێن وەكو جادەیا ١٢٠ میتری، رێیا د ناڤبەرا دهۆك و هەولێرێ و جادەیێن وەكو لالش و گەلەك رێیێن دی یێن ستراتیژی كو ل سەر بنەمایێ ستانداردێن جیهانی هاتینە دروست كرن نیشا ددەن كابینەیا نەهێ یا حوكمەتێ چەند گرنگ دایە بهێزكرنا ژێرخانا ئابووری یا هەرێما كوردستانێ.
د بیاڤێ وزێ دا ژی كابینەیا بەرێز مەسرور بارزانی شیا كارێن گەلەك مەزن ئەنجام بدەت، گرێبەستێن ل گەل هەر دو كۆمپانیێن مەزن یێن ئەمریكی و پرۆژەیێ كارەبا ٢٤ دەمژمێری، نیشا ددەت كو كابینەیا نەهێ دڤێت ب هەموو رەنگەكێ هەرێما كوردستانێ بهێز كەڤیت و ببیتە خوەدان ئابوورەكا گەلەك بهێز، د بیاڤێ ساخلەمیێ دا ژی كابینەیا نەهێ كارێن گەلەك مەزن ئەنجام داینە، دروستكرنا مەزنترین نەخوەشخانەیا شێرپەنجێ ل سەر ئاستێ هەموو ئیراقێ و رۆژهەلاتا ناڤین كو شیان هەنە خزمەتەكا گەلەك باش بكەت دسەلمینیت كو د ئاستێ ساخلەمیێ دا ژی كابینەیا نەهێ كارێن گەلەك باش ئەنجام داینە، هەكە ئەم نها بەرێ خوە بدەینە هەرێما كوردستانێ، زێدەباری هەموو ئاستەنگان لێ كارێن گەلەك مەزن د هەموو بیاڤان دا بۆ خزمەتكرنا خەلكێ كوردستانێ هاتیە كرن.
د كەرتێ پەروەردێ دا ژی كابینەیا نەهێ كارێن گەلەك گرنگ و ستراتیژی ئەنجام داینە، دروستكرنا ١٩٤ قۆتابخانەیان و نووژەنكرنا ١٦٧٠ قۆتابخانەیان د رەوشەكێ دا كو حوكمەتا ئیراقێ ئێك دینار بۆدجە ژی ژ بۆ گەشەپێدانا هەرێما كوردستانێ رەوانەی هەولێرێ نەكریە، نیشا ددەت كابینەیا نەهێ هزرا هەر تشتەكێ كریە و ئارمانجا كابینا نەهێ ب سەرۆكاتیا رێزدار مەسرور بارزانی ئەو بوویە دا بشێت د هەموو بیاڤان دا خزمەتا خەلكی بكەت، یێن نها دژبەریا كابینا نەهێ دكەن و وەسا نیشا ددەن كو چو نەهاتیە كرن دڤێت ڤەگەرن و راستیێن هەی ببینن، چونكی ئەم دزانین ل بەغدا پیلانەك مەزن ل دژی كابینەیا نەهێ هەیە و دخوازن وەسا نیشا بدەن كو كابینەیا نەهێ چو نەكریە.
زێدەباری هەموو ئاستەنگان د ئاستێ ناڤخوە و دەرڤە دا كابینەیا نەهێ كارێن گەلەك مەزن ئەنجام داینە، بهێزكرنا پەیوەندیێن ل گەل ئەمریكا و وەلاتێن جیهانێ نیشا ددەت پێگەهێ هەرێما كوردستانێ گەلەك بهێزە و ژ بەر هندێ ژی د ئاستێ ناڤخوەیی و دەرڤە دا گەلەك دژبەریا هەرێما كوردستانێ دهێتە كرن.

ئـەڤین بـارزانـی

هەرێما كوردستانێ وەكو پشكەك ژ ئیراقێ هەردەم كار بۆ ئارامیێ، باشتركرنا رەوشا ژیانا وەلاتیان و هەبوونا پەیوەندیێن باش ل گەل بەغدا كریە، هەرێما كوردستانێ چو دەمەكێ ئالۆزی و ئاریشە بۆ بەغدایێ دروست نەكرینە، هەرێما كوردستانێ هەردەم د چارچۆڤەیەكێ فیدرالی دا و ل گۆر ئەو مافێن د دستوورێ ئیراقێ دا بۆ هاتیە دیاركرن، كاركریە، وی دەمی ئەڤ پرسیارە ل دەف مرۆڤی دروست دبیت كا بۆچی ئیراق هەردەم دژبەریا هەرێما كوردستانێ دكەت؟ بۆچی هەردەم بەرپرسێن شیعە ل بەغدا كار بۆ لاوازكرنا هەرێما كوردستانێ دكەن؟ د دەمەكێ دا كو هەرێما كوردستانێ نەبوویە مەترسی بۆ بەغدا و هەردەم هاریكاریا ئیراقێ ژی كریە، نموونەیا شەڕێ ل دژی داعشێ، بێی هەرێما كوردستانێ بەغدا و هێزێن شیعە نەدشیان مووسلێ ژ دەستێ داعشێ ئازاد بكەن.
هەرێما كوردستانێ د چارچۆڤەیێ ئیراقا فیدرال دا كار بۆ پێشڤەبرنا دیموكراسیێ و پێكڤەژیانێ كریە، تشتێ هەرێما كوردستانێ كریە هەردەم ژ ئالیێ جڤاكێ نێڤدەولەتی ڤە ب گرنگی بەحس ژێ هاتیە كرن، پتر ژ چەند ملیۆن ئاوارەیێن عەرەب هاتنە هەرێما كوردستانێ، هەتا نها ژی هژمارەك زێدە ئاوارەیێن ل دەڤەرێن دی یێن ئیراقێ ل هەرێما كوردستانێ دژین، ئەو یەك ژی نیشا ددەت هەرێما كوردستانێ هەردەم پەناگەهەك ئارام بوویە بۆ هەموو وەلاتیێن ئیراقێ، وی دەمی دژبەریا نها یا بە‌غدا ل دژی هەرێما كوردستانێ دڤێت مرۆڤ چاوا بخوونیت؟
د بیاڤێ ئابووری دا ژی سەرەرای گەفێن بەغدا لێ د چەند سالێن بۆری دا هەرێما كوردستانێ شیایە تا رادەیەكێ باش خزمەتا خەلكێ خوە بكەت، رەوشا ژیانا وەلاتیان باش بوو، لێ هەردەم بەغدا ئاستەنگی ل هەمبەر گەشەپێدانا ئابووری ل هەرێما كوردستانێ دروست كریە، ب سالانە هەرێما كوردستانێ داخوازا دەرخستنا یاسایا نەفت و گازێ دكەت، هەكە ئەو یاسایە ل پەرلەمانێ ئیراقێ دەركەڤیت دێ د بەرژەوەندیا هەموو ئیراقێ و هەرێما كوردستانێ دا بیت، لێ مخابن هەتا نها ژی بەغدا رێ نادەت تشتەك وەسا دروست ببیت.
سەرۆك بارزانی و سەركردایەتیا سیاسی یا هەرێما كوردستانێ گەلەك جاران دیار كرینە، پێشڤەچوونا هەرێما كوردستانێ د هەمان دەمی دا پێشڤەچوونا ئیراقێ یە، لێ مخابن هەتا نها ژی گەلەك سەركردەیێن ئیراقێ ب نێرینەكا تەنگ بەرێ خوە ددەنە هەرێما كوردستانێ، ئەو پێشڤەچوونێن ل هەرێما كوردستانێ وەكو مەترسی بۆ خوە دبینن، د دەمەكێ دا كو هەرێما كوردستانێ هەردەم ژ بۆ وان ژی جهەكێ گرنگ بوویە، دڤێت سەركردەیێن سیاسی یێن ئیراقێ ب تایبەتی ژی شیعە هەلوەستێ خوە یێ خراب ل هەمبەر هەرێما كوردستانێ بگوهۆڕن.
ل ئالیێ دی هیڤیدرم ئەو هێزێن كو ب ناڤ ئۆپۆزسیۆن ل هەرێما كوردستانێ ژی كار دكەن، ئێدی هزرا خەلكێ خوە بكەن، مخابن گەلەك ژ وان هێزان د بەرژەوەندیا ئیراقێ و هێزێن شیعە یێن كو بەردەوام ل دژی هەرێما كوردستانێ نە سیاسەتێ دكەن، وان دڤێت هەرێما كوردستانێ ل ژێر ناڤێ رێككەفتنێ هەموو داخوازیێن بەغدا قەبوول بكەت، ئەو یەك ژی ژ ئالیێ خەلكێ هەرێما كوردستانێ ڤە ناهێتە قەبوول كرن.
د ئەنجام دا من دڤێت بێژم هەرێما كوردستانێ چو دەمەكێ دوژمناتیا ئیراقێ نەكریە و ناكەت ژی، بەلكو هەرێما كوردستانێ دڤێت ل گۆر ئەو مافێن د دستوورێ ئیراقێ دا هەی پێش بكەڤیت و ئەو یەك ژی بێگومان مافەك دستووری یە و نابیت بەغدا ب بەهانەیێن جودا جودا و بڕینا مووچەیێن خەلكێ كوردستانێ دژبەریا هەرێما كوردستانێ بكەت، ئەو یەك چو ئەنجامێن خوە بۆ بەغدا ژی نابیت.